Bibliachö Miguel nirqa (wakin religionkunachöqa “san Miguel” nirmi reqiyan), Jesuspaqmi parlëkan. Patsaman manaraq shamuptin, y ciëluta kutinqampitam Jesustaqa tsë jutiwan reqiyan. a Bibliachömi willakun Miguelqa, Moises wanuriptin Diabluwan discutinqanta y Dios ninqanta Danielta musyatsinampaq juk angelta yanapanqanta (Daniel 10:13, 21; Jüdas 9). Miguelqa Jehoväpa autoridänintam respetatsin y Diosta chikeqkunawanmi pelyan. Tsëmi tsë jutitaqa apan. Miguel jutiqa, “¿Pitan Teyta Diosnöqa?” ninanmi (Daniel 12:1; Apocalipsis 12:7).

 Arcangel Miguel Jesus kanqanta imanö musyanqantsikpita yachakurishun.

•   Miguelqa “arcangel[mi]” (Jüdas 9). Arcangel carguqa, “angelkunapa mandaqnin” ninanmi y Bibliachöqa ishkë kutillam tsë palabra yurin. Ishkan kutichöpis arcangel nirqa, jukllëllapaqmi parlëkan. Tsëmi rikätsikun juk angel-lla tsë carguyoq kanqanta. Kawarimushqana Jesuspaq parlarmi juk kaq textuchöqa kënö nin: “Kikin Señormi mandakur arcangelnö parlar [...] ciëlupita urämunqa” (1 Tesalonicensis 4:16). Tsënö ninqanmi rikätsikun Jesusqa arcangelnö parlanqanta. Tsëmi rikätsikun arcangel Miguelqa Jesus kanqanta.

•   Miguelqa ciëluchö angelkunapa mandaqninmi. “Miguelwan angelninkunam mantsëpaq jatun culebrawan [Diabluwan] pelyayarqan” (Apocalipsis 12:7). Miguelqa ciëluchö mëtsika autoridäyoqmi. Bibliachömi nin Miguelqa, “angelkunapa mandaqninkunapa mas mandaqnin” y “mandakoq” kanqanta (Daniel 10:13, 21; 12:1). Bibliachö Miguelpaq tsënö ninqanmi rikätsikun “ciëluchö angelkunapa mandaqnin” kanqanta (Mushoq Testamentupita imëkata musyaq David Aune jutiyoq nunam Miguelpaq tsënö nin).

   Bibliachömi willakun Miguelpita apartiqa, juk nuna maslla ciëluchö angelkunata mandëta puëdinqanta. Awmi, Bibliachömi parlan “Señor Jesus puëdeq angelninkunawan ciëlupita yurimunqan” witsampaq (2 Tesalonicensis 1:7, 8; Mateu 16:27). 1 Pëdru 3:21, 22 textuchönam Jesuspaq kënö nin: “Ciëluta ëwakushqa karmi, Teyta Diospa derëcha lädunchö këkan, y angelkuna, y autoridäta y poderta chaskishqa kaqkunam, pëpa cargunman churashqa kayashqa”. Jesus o Miguel nir tsë nunallapaq mana parlëkaptinqa, manachi Teyta Diosqa pëkunata chikinakatsirnin angelkunata mandayänampaq ishkanta churanmantsu karqan. Tsëmi rikätsikun Jesus o Miguel nirqa, tsë nunallapaq parlëkanqanta.

•   ‘Sufrimientu kanqan’ witsanmi Miguelqa “yanapanqa” o favornin sharkunqa (Daniel 12:1). Daniel libruchö “yanapanqa” o favornin sharkunqa nirqa, juk gobernanti imatapis ruranqampaqmi parlëkan (Daniel 11:2-4, 21). “Teyta Diospa Palabran” nirpis reqiyanqan Jesucristuqa, “gobernaqkunapa Gobernaqnin” karmi, Teyta Diosta chikeqkunata ushakätsinqa y Diospa sirweqninkunata salvanqa (Apocalipsis 19:11-16). Tsëtaqa ruranqa, alläpa sufrimientu kanqan witsanmi. “Tsënö sufrimientuqa manam nunakuna kawar qallanqampita kashqaraqtsu, y manam yapëqa kanqanatsu” (Mateu 24:21, 42).