Awmi, Bibliaqa Diospa Palabranmi y Teyta Diosqa llakishqa këkaqkunatam shoqamantsik (2 Corintius 7:6). Llakishqa këkaqkunata yanapaq libru mana kaptimpis, Bibliachö consëjunkunaqa wanutsikuyta munaq mëtsikaq nunakunatam yanapashqa. Bibliachö këkaq consëjukunaqa qamtapis yanapashunkim.

•  ¿Bibliachöqa ima consëjukunatataq tarintsik?

•  ¿Bibliachöqa willakunku wanuyta munaq nunakunapaq?

•  ¿Bibliachö mëqan textutan yanapashunkiman alläpa yarpachakur wanutsikuyta munaptiki?

•  ¿Imatataq rurashwan mëqan amïguntsikpis “manam kawëta munänatsu” nimashqa?

•  ¿Puntatapis wanutsikuyta munashqana kaptïqa?

• ● Imanö sientikunqëkipita parlë.

   Bibliachömi kënö nin: “Rasumpa amïgu karqa, imëpis kuyakoqllam këkanqa, y desgraciakunapa pasayanqan hörapis kuyakoq wawqinnömi dejantsu” (Proverbius 17:17).

   Yachakunqantsik: Alläpa yarpachakunqantsik höraqa pillapis yanapamänatam wanantsik.

   Yarpachakunqëkita pitapis mana willarqa, mas yarpachakurmi imanö këtapis puëdinkitsu. Peru pitapis imanö sientikunqëkita willarqa, manam alläpaqa yarpachakunkinatsu y problëmëkitapis juknöpanam rikanki.

   Këta rurë: Kanan höra pillawampis parlari, capaz juk familiëkiwan o confiakunqëki amïguykiwan. a Imanö sientikunqëkitaqa qellqëtapis puëdinkim.

• ● Alläpa yarpachakoqkunata yanapaq doctorkunaman ëwë.

   Bibliachömi kënö nin: “Sänu këkaqkunaqa manam doctorta wanayantsu, peru qeshyëkaqkunam sïqa” (Mateu 9:12).

   Yachakunqantsik: Qeshyarninqa doctormanmi ëwanantsik.

   Peqankuna o umankuna mana alli kaptin o alläpa yarpachakurmi, höraqa nunakuna wanutsikuyta munayan. Imapitapis qeshyarqa manam penqakuntsiktsu, tsënöllam alläpa yarpachakur o peqantsikpita o umantsikpita mana alli karpis penqakushwantsu. Tsënö qeshyapaqpis jampi kanmi.

   Këta rurë: Kanan höra yanapashunëkipaq doctorman ëwë.

• ● Yarpë Teyta Diospaqqa alläpam välinki.

   Bibliachömi kënö nin: “Pitsqa pichuysankatam ishkë mana alläpa väleq qellëpaq rantikuyan ¿aw? Tsënö kaptimpis, Teyta Diosqa manam mëqantapis qonqantsu. [...] Ama imatapis mantsayëtsu, qamkunaqa mëtsika pichuysankapitapis masmi väliyanki” (Lücas 12:6, 7).

   Yachakunqantsik: Teyta Diospaqqa alläpam välinki.

   Capaz japallëki sientikunki, peru manam japallëkitsu këkanki. Teyta Diosqa musyanmi imakunapa pasëkanqëkita. Kawëta manana munaptikipis, Teyta Diosqa qampaq yarpachakunmi. Salmus 51:17 textum nin Teyta Diosqa ‘shonqunkunachö llakikoqkunataqa mana desprecianqanta’. Teyta Diosqa kuyashunkim y manam wanunëkita munantsu.

   Këta rurë: Bibliata leyir kuyashunqëkita Teyta Dios imanö rikätsishunqëkiman pensë. Acerquémonos a Jehová neq librupa 24 kaq capïtulunchömi Teyta Dios kuyashunqëkipita masllata yachakunki.

• ● Teyta Diosman mañakuy.

   Bibliachömi kënö nin: “Y tsëyaqqa llapan yarpachakuyanqëkita pëman churarkuyë. Pëqa qamkunapaqmi alläpa yarpachakun” (1 Pëdru 5:7).

   Yachakunqantsik: Teyta Diosqa munan imanö sientikunqëkita y imapaq yarpachakunqëkita willanëkitam.

   Teyta Diosqa yamë kanëkipaq y kallpayoq kanëkipaqmi yanapashunki (Filipensis 4:6, 7, 13). Tsënömi Teyta Diosqa pëman witeqkunata yanapan (Salmus 55:22).

   Këta rurë: Kanan höra Teyta Diosman mañakuy. Jutin Jehoväpa parlapar imanö sientikunqëkita willë (Salmus 83:18). Aguantar sïguinëkipaq yanapëkushunëkipaq rogakuy.

• ● Shamoq tiempupaq Bibliachö willakunqanman pensë.

   Bibliachömi kënö nin: “Tsë següru y alli patsakashqa shuyarëkanqantsikqa, barcu ëwakunanta mana dejaq anclanömi vïdantsikpaq” (Hebrëus 6:19).

   Yachakunqantsik: Vientuntin tamya barcuta wakman këman apanqannömi, höraqa imanö sientikunqëkipis cambiarëkanqa. Peru shamoq tiempupaq Bibliachö willakunqanmi tranquïlu kanëkipaq yanapashunki.

   Shamoq tiempupaq Bibliachö willakunqanqa manam cuentullatsu. Teyta Diosqa änikunqannömi imëka sufritsimanqantsikta ushakätsinqa (Apocalipsis 21:4).

   Këta rurë: Diospa alli willakïninkuna neq follëtupa 5 kaq yachatsikuyninchö, shamoq tiempupaq Bibliachö willakunqampita masta yachakuy.

• ● Imatapis gustashunqëkita rurë.

   Bibliachömi kënö nin: “Shonqunkunachö kushishqa kayanqanqa jampi cuentam” (Proverbius 17:22).

   Yachakunqantsik: Imatapis gustamanqantsikta ruranqantsikqa, mana alläpa llakikunapaq o yarpachakunapaqmi yanapamantsik.

   Këta rurë: Imatapis gustashunqëkita rurë. Alli sientitsishunqëki müsicata wiyë, animashunëkipaq imatapis leyi o imatapis mas gustashunqëkita rurë. Jukkunata imallawampis yanaparqa masmi kushikunki (Hëchus 20:35).

• ● Salornikita cuidë.

   Bibliachömi kënö nin: ‘Ejerciciuta rurëqa [...] yanapakunmi’ (1 Timoteu 4:8).

   Yachakunqantsik: Ejerciciuta ruranqëki, alli pununqëki y salornikipaq alli kanqanta mikunqëkim, alli saloryoq kanëkipaq yanapashunki.

   Këta rurë: 15 minütullapis cörri cörrilla pureq yarquy.

• ● Yarpë, imapis cambiarëkanqannömi imanö sientikunqantsikpis cambiarëkan.

   Bibliachömi kënö nin: “Qamkunaqa manam musyayankitsu warë imanö këkäyänëkipaq kaqta” (Santiägu 4:14).

   Yachakunqantsik: Yarpakachätsimanqantsik problëmakunaqa, mana altsakänampaq kaqta pensashqapis, höraqa ichikllapa ichikllapam altsakärin.

   Kanan pasëkanqëki mana aguantëpaqnö kaptimpis, capaz warëqa jukläyana kanqa. Ama manana puëdinqëkitaqa pensëtsu (2 Corintius 4:8). Tiempuwanqa problëmëkikuna altsakärinmanmi, peru wanutsikunqëkitaqa manam imapis cambiëta puëdinqanatsu.

   Këta rurë: Alläpa llakikur wanuyta munaq nunakunapaq Bibliachö willakunqanta leyi. Tiempuwanqa hasta mana pensayanqannö vïdankuna imanö cambianqampita yachakuri. Bibliachö willakunqan wakin nunakunapita yachakurishun.

 Awmi. Bibliachöqa willakunmi “wanuytam munä” neq nunakunapaq. Teyta Diosqa manam pëkunawan cölerakurqantsu, sinöqa yanaparqanmi. Tsënöllam qamtapis yanapashunki.

Elïas

•  ● ¿Pitan Elïasqa karqan? Pëqa Diospa willakoqnin y valienti nunam karqan, tsënö kaptimpis höraqa alläpam llakikurqan. Santiägu 5:17 textuchömi nin “Elïasqa noqantsiknö sentimientuyoq” nuna kanqanta.

•  ● ¿Imanirtan wanuyta munarqan? Juk kutim Elïasqa japallan sientikurqan, alläpa mantsakarqan y imapaqpis mana välinqanta pensarqan. Tsëmi “¡kanan höra juklla wanuykatsimë!” nir Teyta Diosman rogakurqan (1 Rëyes 19:4).

•  ● ¿Imatan yanaparqan? Elïasqa imanö sientikunqantam Teyta Diosta willarqan. ¿Imanötan Jehoväqa yanaparqan? Pëpaq yarpachakunqanta y alläpa puëdeq kanqantam musyatsirqan. Alläpa kuyanqantapis nirqanmi y cuidanampaqmi yanapaqnin churarqan.

•  ▸ Elïas pasanqampita leyi: 1 Rëyes 19:2-18.

Job

•  ● ¿Pitan Jobqa karqan? Pëqa atska tsuriyoq rïcu nunam karqan, y Teyta Diostapis mana dejëpam sirwirqan.

•  ● ¿Imanirtan wanuyta munarqan? Illaqpitam Jobtaqa imëka mana allikuna y desgraciakuna pasarqan. Llapan kapunqanmi ushakarqan, llapan tsurinkunam wanuyarqan y alläpa nanatsikoq feyu qeshyawanmi sufrirqan. Manam tsëllatsu, tsë llapanta pasëkanqanqa kikimpa culpan kanqantam niyarqan. Jobqa alläpa sufrirmi kënö nirqan: “Kawënïta melanarmi kawëtapis munänatsu” (Job 7:16).

•  ● ¿Imatan yanaparqan? Jobqa Jehovämanmi mañakurqan y jukkunawampis parlarqanmi (Job 10:1-3). Amïgun Elihüqa pasëkanqanta entiendirmi shumaq parlaparqan, y pasëkanqanta juknöpa rikänampaqmi yanaparqan. Peru masqa, Jobqa Teyta Dios ninqantam wiyakurqan y yanapanantam dejarqan.

•  ▸ Job pasanqampita leyi: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moises

•  ● ¿Pitan Moisesqa karqan? Pëqa unë witsan israelïtakunapa dirigeqnin y Diospa willakoqninmi karqan.

•  ● ¿Imanirtan wanuyta munarqan? Moisesqa imëka trabäjuyoqmi karqan, pëpitam seguïdu quejakuyaq y alläpa utishqa o pishipashqam sientikurqan. Tsëmi “jukllana wanuykatsimë” nir Teyta Diosman rogakurqan (Nümerus 11:11, 15).

•  ● ¿Imatan yanaparqan? Moisesqa Teyta Diostam imanö sientikunqanta willarqan. Teyta Diosqa trabäjunta japallan mana ruranampaqmi yanaparqan.

•  ▸ Moises pasanqampita leyi: Nümerus 11:4-6, 10-17.