Kë Patsaqa manam imëpis ushakanqatsu. Manam ninatsu ushakätsinqa ni juk Patsawantsu cambiashqa kanqa. Bibliachömi willakun, Patsataqa nunakuna imëpis kawayänampaq Teyta Dios kamashqa kanqanta.

•   “Allita ruraq nunakunapaqqa kë patsam herenciankuna kanqa, y tsëchömi imëyaqpis alli kawakuyanqa” (Salmus 37:29).

•   “Teyta Diosqa patsapa cimientuntam alli firmi churashqa; y manam imëpis ni pï kuyutsinqatsu” (Salmus 104:5).

•   “Kë patsaqa manam ni imëpis ushakanqatsu” (Eclesiastes 1:4).

•   “Noqa [...] Dios Yaya Jehovämi patsata kamarqö, y këkanqanmanmi alli patsätsirqö. Patsataqa manam mana kaqllapaqtsu kamarqö, sinöqa nunakuna tsëchö kawayänampaqmi” (Isaïas 45:18).

 Teyta Diosqa manam permitinqatsu, mana limpiuta tikratsir, guërrakunata rurar o juknöpapis Patsata ushakätsiyänanta. Tsëpa rantinqa Bibliachömi nin, ‘patsata ushakëkätseqkunata ushakätsinampaq’ (Apocalipsis 11:18). ¿Imanötan tsëta ruranqa?

 Teyta Diosqa Patsata mana cuidëta yachaq gobiernukunatam Gobiernunwan cambianqa (Daniel 2:44; Mateu 6:9, 10). Tsë gobiernuchöqa, Diospa tsurin Jesucristum gobernanti kanqa (Isaïas 9:6, 7). Patsachö këkarmi Jesusqa rikätsikurqan, imëka desgraciakunata, shukukuy vientuta y maskunata controlëta puëdinqanta (Marcus 4:35-41). Diospa Gobiernunchö gobernamurqa, Jesusqa Patsata y Patsachö kaqkunatam controlanqa. Imëkatapis yapë kamaq cuentam, llapantapis Eden huertachö kanqantanö tikratsinqa (Mateu 19:28; Lücas 23:43).

 Manam. Tsënöqa pensayan 2 Pëdru 3:7 ninqanta mana alli entiendirmi. Tsëchömi kënö nin: “Kanan witsan ciëlukuna y patsapis ninawan ushakänampaq[mi] këkan”. Tsëchö ninqanta alli entiendinapaq ishkëllata yachakurishun:

1.  Juk kaq. Bibliachö ciëlukuna, patsa o nina nirqa atskatam entienditsikun. Maslla musyarinapaq, Genesis 11:1 textuchömi kënö nin: “Llapan nunakunam [patsam] juk idiömallata parlayaq”. Tsënö nirqa nunakunapaqmi parlëkan.

2.  Ishkë kaq. 2 Pëdru 3:7 textupa mas qepanchö ninqanmi rikätsikun, ‘ciëlukuna’, ‘patsa’ y ‘nina’ nir imapaq parlëkanqanta. 5 y 6 kaqchömi willakun, Noë kawanqan witsan alläpa tamya kanqampaq. Tsë witsan nunakuna ushakäyaptimpis, Patsaqa manam ushakarqantsu. Tsë tamyaqa, tsë witsanchö “Patsata” o mana allita ruraq nunakunatam ushakätsirqan (Genesis 6:11). Tsënöllam “ciëlukunatapis” o tsë witsan nunakunata gobernaqkunatapis ushakätsirqan. Tsëmi rikätsikun kë Patsa mana ushakanqanta, sinöqa mana allita ruraq nunakuna ushakäyanqanta. Tsënö kaptimpis, Noëwan familianqa salvakuyarqanmi, y pëkunapa familiankunawanmi Patsaqa yapë juntar qallëkuyarqan (Genesis 8:15-18).

 Tsë tamya nunakunata ushakätsinqannöllam, 2 Pëdru 3:7 textuchö ‘ninapis’ o ushakëpis mana allita ruraq nunakunata ushakätsinqa, peru kë Patsaqa manam ushakanqatsu. Teyta Diosqa ‘mushoq ciëlukuna y mushoq patsa’ kanampaqmi änimantsik, “tsëchöqa alli kaqta rurarllanam kawayanqa” (2 Pëdru 3:13). Tsë “mushoq patsata[qa]” o Patsachö kawaqkunataqa, ‘mushoq ciëlukunam’ o mushoq gobiernum gobernanqa, tsëqa Diospa Gobiernunmi kanqa. Tsë gobiernu gobernamuptinqa, entëru Patsam shumaq tikranqa (Apocalipsis 21:1-4).