Qeshyëkaq sirweqninkunataqa, Teytantsik Jehoväqa imëpis yanapëkanllam. Tsëtam Salmus 41:3-chö (Teyta Diospa Willakïnin [TDW]) änikun: “Qeshyar jitaraptinpis kallpan qonmi”. Mana jampikaq qeshyayoq kashqaqa, ¿imaraq yanapamäshun?

1.   Teyta Dios yanapamänapaq mañakushun. Llakikushqaqa, “imëka yarpachakïkuna janampa këkaq Diospa yamë këninmi” yanapamäshun (Filipensis 4:6, 7).

2.   Imëpis kushishqa këkäshun. Bibliachöqa clärum nimantsik, llakishqalla kakushqaqa salornintsikchö mana yanapamanqantsikta. Y tsëtam Proverbius 17:22-chö (TDW) kënö nimantsik: “Kushishqa kawakuq nunaqa manam qeshyapäkuntsu. Llakishqa kawakuq nunaqa qeshyapäkurllam kawakun”.

3.   Shuyaranqantsikqa cumplikanqam. Qeshyapäkurnin llakikushqapis, Teyta Dios änimanqantsikkunaman yarpanqantsikqa kushishqa kanapaqmi yanapamantsik (Romänus 12:12). Shamoq tiempuchöqa, manam ni pï nunapis “qeshyëkämi” ninqanatsu, tsëtam Bibliachö nimantsik (Isaïas 33:24). Nunakunaqa imëkata rurarpis manam qeshyakunata, awkinyëta ni chakwanyëtapis ushakätsiyashqatsu; Teytantsik Jehovällam ushakätsitaqa puëdin. Palabran Bibliachömi kënö nimantsik: “Teyta Dios kachakätsikunmi. Kachakätsimashqaqa jövin kashqantsikmannömi kutirkushun. Cuerpuntsikpis wamra kashqantsikmannömi kutirkunqa” (Job 33:25).

 ¿Imatatan yachakuntsik? Jehoväpa testïgunkunaqa Teyta Jehovä yanapayämänampaq kaqmanmi markäkuyä o yärakuyä. Peru qeshyayanqä höraqa doctorkunamampis ëwayämi (Marcus 2:17). Tsënö kaptimpis, “manam kë jampi alli o mana alli kanqanta” nir puriyätsu. Tsëpa rantinqa, kikïkunam ima jampitapis churakuyänäpaq o mana churakuyänäpaqpis rikäyä.