Familiäqa Tongapitam y tsëchöqa 170 islakunam kan. Täräyanqächöqa manam luznïkuna ni cärrukuna karqantsu. Peru iman sïqa, yakuqa atskam karqan. Y juk ishkë wallpakunatapis wätayarqämi. Escuëlaman mana ëwayanqä killachöqa papänïtam plätanusta, ñämita, täruta y yucata murupakurnin yanapayaq kayä. Täräyanqächöqa familiäpis Bibliatam alläpa respetayaq y iglesiamampis ëwayaqmi. Tsënö kaptimpis, mas alli kawakuyta munarmi juk nacionman ëwakuyta munayarqä.

 16 watayoq këkaptïmi, Estädus Unïduspa California markanman tiyüqa apayämarqan. Tsëchö yachakëqa manam fäciltsu karqan. Qellënïkuna kayäpamaptimpis waktsa markachömi täräyarqä. Tsëchöqa imëka mana allikunam kaq drögakuyaq y paqaspanaqa illapanakuyaqmi. Tsëchö täraq nunakunaqa illapankuna oqllashqam puriyaq. Juk kutim, bälata chëkatsiyämarqan y kananyaqmi tsë cirata katsï.

 Jövin mayïkunawan këta munarmi fiestakunam ëwarqä, washkuta upurqä y drögakurqä. Drögata rantinäpaq qellënï mana kaptinmi, suwakur qallëkurqä. Familiäqa religiösum kayarqan y iglesiamampis ëwayaqmi. Tsënö karpis, manam mana allikunata rurëkanqätaqa michäyämarqantsu. Y alläpa lïsu tikrakuriptïmi, atska kuti tsariyämarqan y tiempuwanqa carcelchömi usharqä.

 Tongachö nunakunaqa Navidätam alläpa respetayan. 1997 watachömi prësurëkaq mayi Bibliata katsinqäta rikärir, ¿musyankiku Jesus imë yurinqanta? nir tapumarqan. Tsënö nimaptinmi ima nitapis puëdirqätsu. Pëqa rikätsimarqan, Jesuspaq Bibliachö ima ninqantam. Rikarqämi Bibliachö Navidäpaq mana yachatsikunqanta (Mateu 2:1-12; Lücas 2:5-14). Tsëta musyarirmi, ¿Bibliaqa ima mastatan yachatsikun? nir tapukurqä. Carcelchö kayanqa nunam, cada semäna Jehoväpa testïgunkunapa reunionninkunaman ëwaq. Tsëmi noqapis ëwarqä, y tsë reunionchöqa Apocalipsis librupitam yachakuykäyarqan. Y manam allillaqa entiendirqätsu. Tsënö kaptimpis, rikarqämi Bibliapita yachakuyanqanta.

 Jehoväpa testïgunkuna Bibliapita yachatsiyämänampaq niyämaptinmi raslla o saslla änikurirqä. Kë Patsa Shumaq Huertaman tikrarinampaq kaqta niyämaptinqa, alläpam kushikurqä (Isaïas 35:5-8). Tsëchö kanäpaqqa, mana alli rurënïkunatam cambianä karqan. Jehovä Diostaqa manam gustantsu mana allikunata ruranqantsik (1 Corintius 6:9, 10). Tsëmi mana alli geniüta, cigärru shoquyta, washku upuyta y drögakuyta dejarirqä.

 1999 watam manaraq sentencia ushaptin, juk carcelman apayämarqan. Juk watapam Testïgukunata rikëta puëdirqätsu. Tsënö kaptimpis, Jehovä munanqannö kawanäpaqmi kallpachakurqä. 2000 watanam, Estädus Unïduspita Tonga nacionnïman qarqarayämarqan.

 Tongaman chärirllam, Jehoväpa testïgunkunata Bibliapita yachakunäpaq ashirqä. Estädus Unïduschö Bibliawan yachatsiyämanqannöllam këchöpis yachatsiyämarqan. Y tsëqa alläpam gustamarqan.

 Papänïqa iglesianchö juk carguyoq karninmi reqishqa karqan. Tsëmi Jehoväpa testïgunkunawan Bibliapita yachakuptï, familiäkunaqa piñakuyarqan. Peru tsëpitaqa Bibliapita yachakunqä yanapamanqanta rikarmi, alläpa kushikuyarqan.

 Noqataqa washku upyëmi alläpa gustamaq. Markachöqa kava washkutam pimientapa watsimpita rurayaq. Amïgükunawanmi cada paqas fiestakunaman ëwayaq kayä. Y tsëchöqa, imatapis mana musyanqäyaqmi upoq kä. Amïgükunaqa Biblia yachatsikunqanta manam musyayaqtsu, tsëmi yanapayämaqtsu. Peru Testïgukunaqa, tsë rurëkanqä Teyta Diosta mana gustanqantam niyämarqan. Tsëmi Jehoväta kushitsinäpaq y cambiukunata ruranäpaq kallpachakurqä.

 Llapan reunionkunamanmi ëwarqä. Teyta Diosta kuyaq nunakunawan juntu këqa yanapamarqan viciukunata dejanäpaqmi. Y 2002 watachömi Jehoväpa testïgun kanäpaq bautizakurirqä.

 Teyta Diospa paciencianqa yanapamashqam. Tsëtam Bibliachöpis nin: “Qamkunarëkurmi pacienciakïkan, porqui manam munantsu pipis ushakänanta; tsëpa rantinqa, llapankuna arrepentikuyänantam munan” (2 Pëdru 3:9). Teyta Dios munarqa kë mana allikunata ushakätsinmannam karqan, peru pëqa munan noqanö nunakuna arrepentikuyänantam. Tsëmi agradecikü nunakuna Diosta reqiyänampaq yachatsikunqäpita.

 Jehovä yanapamaptinmi mas allina kawakü. Unëqa viciukunarëkurmi suwakoq kä, peru kananqa nunakunatam Jehovä Diosta reqiyänampaq yanapä. Warmï Teataqa Jehovä Diospa markanchömi reqirqä, pëwanqa kushishqam kawakuyä y juk wamräkunapis kanmi. Ichikllachöna yamë y kushishqa kawakunapaq kaqtam, ishkäkuna vecïnukunata Bibliapita yachatsiyä.