Calgary markachömi yurirqä, tsëqa këkan Canadächömi. Wamrallaraq këkaptïmi teytakunaqa rakikäkuriyarqan. Tsëmi mamänïwan awëlitukunapa wayinman ewkuyarqä. Awëlitukuna kuyakoq kayaptinmi kushishqa kayarqä. Imanö kushishqam tsë junaqkunata yarpä.

 7 watayoq këkaptïmi mamänïqa papänïwan yapë casakuriyarqan. Casakuriyaptinmi Estädus Unïdusta ëwakuyarqä. Tsëchömi rikarqä, papänïqa alläpa mana alli kanqanta. Juk kutim yanaqikuna maqayämarqan, y noqaqa manam imatapis rurarqätsu. Tsëta musyarirmi papänïqa alläpa piñakur mas maqamarqan. Papänïpitam maqakoq këta yachakurqä.

 Papänï geniunta tsarëta mana yachaptinmi mamänïwanqa imëpis qayapänakurlla kakuykäyaq. 11 watayoq këkarninmi washkuta upyar y drögakur qallëkurqä, y cällikunachömi maqanakurlla purikoq kä. Estudiüta ushanäpaqqa pasëpa feyu y lïsu nunanam tikrarishqa karqä.

 18 watayoq këkarmi, Estädus Unïduschö ejercituman ëwarqä. Lïsu nunaman karqä, peru tsëchöqa wanutsikuytam yachakurqä. Pitsqa wata ejercituchö karirmi, mas reqishqa policïa këta munar universidäman estudiaq yëkurqä. Estädus Unïduschö y Canadächömi estudiarqä.

 Universidäman ëwanqächöqa, nunakuna chiki y kikinllapaq yarparäkoq kayanqantam rikarqä. Tsëmi mana alli rurëkunaqa imëpis mana ushakänampaq kaqta yarparqä. Y nunakunaqa tsëkunata mana altsëta puëdiyänampaq kaqtam rikarqä.

 Imapis mana altsakänampaq kaqta rikarmi, qellëta ashiman, washkuta upuyman y drögakuyllaman yarparäkoq kä. Y jukwan jukwanmi imëpis kakoq kä. Ejercituchö pelyëta yachakushqa karmi, pï mëwampis pelyaq kä. Wakinkunata mana alli tratëkaqta rikarqä, yanapëta munarmi pï mëta kutakachareq kä. Alläpa maqakoq y feyu nunam karqä.

 Juk kutim juk amïgüwan wayïchö pasëpa drögakushqa këkäyarqä. Y pakëllapa rantikuyänäpaqmi drögata alistëkäyarqä. Tsëchömi amïgü kënö tapumarqan, “¿qamqa Diosman creinkiku?”. Tsëmi nirqä: “¡Dios kë mana allikunapita culpayoq kaptinqa, manam pëpita imatapis musyëta munätsu!”. Waränin junaqnam, trabajaq mayi kënö tapumarqan: “¿Diostsuraq kë mana alli pasanqankunapita culpayoq?”. Pëqa Jehoväpa testïgunmi karqan. Pëwanqa joqta killapam parlakuyarqä. Noqapaqa mëtsika tapukuynïkunam karqan. Y pëqa Bibliawanmi tsë tapukuynïkunapita yachatsimarqan.

 Warmïqa manam Diospita ni imatapis musyëta munarqantsu. Juk kutim Bibliapita yachatsiyämänampaq Testïgukuna shayämunampaq kaqta nirqä. Waränin junaq trabäjupita kutirinäpaqqa, llapanninkunata apakurkurmi ewkushqa kanaq. Tsëmi waqtata yarqurir waqarqä, Teyta Diosmanmi yanapëkämänampaq mañakurqä. Tsë kutichöraqmi Teyta Jehovämanqa jutimpa mañakurqä (Salmus 83:18).

 Ishkë junaq pasariptinllam, Testïgukunaqa Bibliapita yachatsiyämänampaq shayämurqan. Usted puede vivir para siempre en el paraíso en la Tierra neq librutam qarayämarqan. Tsë paqasllam leyir usharirqä. a Tsëchöqa Jehovä Dioswan tsurin Jesus kuyakoq kayanqantam yachakurqä (Isaïas 63:9). Iman masqa gustamarqan, Jehovä Dios noqata kuyamanqanta y Jesus noqarëkur wanushqa kanqanta yachakunqämi (1 Juan 4:10). Jehovä Diosqa noqapaq yarpachakunmi y manam munantsu ushakänäta, tsëpa rantinqa arrepentikunätam munan (2 Pëdru 3:9). Tsëchömi rikärirqä Jehovä Dios kuyamanqanta (Juan 6:44).

 Tsë semänallachömi reunionman ëwarqä. Jatun aqtsashqa, arëtisqam ëwarqä y mantsëpaqmi karqä. Tsënö kaptimpis, unëna mana rikashqa familiantanömi wawqi panikunaqa chaskiyämarqan. Tsëqa yarparätsimarqan awëlitukunachö karnin yamë kanqätam, peru tsëpitapis mas allim sientikurqä.

 Tsëpitaqa Bibliachö yachakunqämannömi kawar qallëkurqä. Aqtsatam rutukurqä, washku upuytawan drögakuytam dejarqä. Y warmin warmin kakuytapis dejarqämi (1 Corintius 6:9, 10; 11:14). Teyta Jehovä kushishqa kanantam munarqä. Tsëmi ima mana allitapis rurarirqä, tsapakunäpa rantin llakikoq kä. Y kënö neq kä: “Mananam yapëqa rurashaqtsu”. Yachakunqä imëkachö yanapëkämanqantam rikarqä. Tsëmi Bibliapita yachakur qallanqäpita joqta killa pasariptinlla, 1989 wata 29 de juliu killa Jehoväpa testïgun kanäpaq bautizakurirqä.

 Bibliachö yachakunqäqa imëkachömi yanapamashqa. Unëqa imatapis niyämaptin piñakoqmi kä. Peru kananqa llapan nunakunawan yamë kawakunäpaqmi kallpachakü (Romänus 12:18). Jehovä yanapamashqa kaptinmi tsëtaqa rurä, manam kikïpitatsu. Jehovä Diosqa kallpanwan y Palabranwanmi mas alli kawakunapaq yanapamantsik (Gälatas 5:22, 23; Hebrëus 4:12).

 Jukwan jukwan kakunäpa, drögakunäpa y maqakur kakunäpa rantinmi, kananqa Jehovä Dios munanqannöna kawakü. Bautizakurinqäpita ichik tiempullachömi juk nacionta Diospita yachatsikoq ëwarqä. Tsë markachö yachatsinqä nunakuna jukläyana kawakuyanqanta rikarmi, kushishqa karqä. Peru masqa kushikü, mamänï imanö portakunqäta y kawënï imanö cambiashqa kanqanta rikarnin Jehovä Diosta sirwinampaq churapakanqampitam.

 1999 watachömi Ishkë Killa Duraq Escuëlaman invitayämarqan. Tsëchöqa mas alli yachatsikunäpaq y wawqi panikunata mas alli yanapanäpaqmi yachakurqä. Tsëpitanam kuyashqa warmï Eugeniawan casakuyarqä. Kananqa kushishqam llapan tiempükunawan Guatemälachö yanapakuykäyä.

 Unëqa maqanakurlla kakur y juk warmiwan juk warmiwan kakurmi kushishqatsu karqä. Peru kananqa Teyta Jehoväta reqishqa karmi, alli y kushishqa kawakü. Diospa markanchöqa llapäkunapis kuyanakuyämi. Tsëmi shonqupita patsë kushishqa këkä.