Rochester markachömi yurirqä, tsëqa këkan Estädus Unïduschömi. Familiäqa catölicum kayarqan. 8 watayoq këkaptïmi, teytäkuna rakikäkuriyarqan. Semänachöqa, mamänïwanmi waktsakuna kayanqan wayichö kayarqä, y semäna ushënam papänïwan. Joqtaqmi kayarqä, tsëmi mamänïta yanapëta munar qellëyoq këta munarqä.

 Papänïqa mas alli kawakunäta munarmi, juk reqishqa universidäman mandamarqan. Noqaqa Teyta Diostam mañakushqa karqa qellëyoq y kushishqa kanäpaq, tsëmi universidächö estudiar kushishqa këkarqä. Universidächöqa pitsqa watapam imëkata estudiarqä, y estudianqämannömi casïnu pukllayanqan hotelchö trabajaq kä. Tsëqa këkarqan Las Vëgas markachömi.

 22 watayoq këkarqa, tsë trabäjuchö mandakoqpa yanapaqninnam karqä. Wakinkunaqa niyaq qellëyoq y alli kawakunqätam. Allitam mikoq kä y chaniyoq vïnuta y washkutam upoq kä. Trabajaq mayïkunaqa kënömi niyämaq: “Yarpë yö, qellëyoq karllam mas alliqa kawakunki”. Pëkunaqa qellëyoq këllatam ashikuyaq.

 Trabajanqämanqa, millonariu nunakuna y warmikunam pukllaq shayämoq. Mëtsika qellëyoq karnimpis, manam kushishqatsu kayarqan. Rasumpa kaqchöqa, noqapis manam kushishqatsu karqä. Qellëta mas gananqämannömi, trabajarlla kakoq kä y punuytapis puëdeqtsu kä. Mana kushishqa karmi, “¿imapaqtan kawä?” nir tapukurqä. Tsëmi Teyta Diosman yapë mañakurqä, kushishqa kanäpaq yanapëkamänampaq.

 Ishkaq panïkunam Jehoväpa testïgun tikrayarqan, y pëkunaqa Las Vëgas markamanmi shayämurqan. Diospita parlapäyämarqa, kikïpa Bibliäwan yachatsiyämänantam munaq kä. Y kikïpis Bibliata leyeqmi kä. Tsëchömi rikarqä, Jesus parlanqankunaqa pukawan këkanqanta. Panïkunaqa Jesusta respetanqäta musyayaqmi, tsëmi Jesuspita mas parlapäyämaq.

 Imëkatam Bibliachö yachakurqä. Jesusqa kënömi nirqan: “Mana [Diosta sirweq] nunakunaqa tsë palabrallawanmi yapëkuryan mañakuyan” (Mateu 6:7, Teyta Diospa Willakïnin [TDW]). Tsëmi yarpätsimarqan, juk cüra Jesuspa fötunta qaramanqanta, y tsë fötuwan chunka padre nuestruta y chunka avemarïata rezakuptïqa, Dios ricuyätsimänampaq kaqtam nimarqan. Peru Jesusqa nirqan kutin kutin tsëllata mana mañakunapaqmi. Y Jesusqa kënöpis nirqanmi: “Kë patsachöqa ama pitapis ‘Teytallantsik’ nir Diostanö respetayëtsu. Jukllëllam Teytëkiqa. Pëqa ciëluchömi këkan” (Mateu 23:9, TDW). Tsëqa, “¿imanirtan catölicukunaqa cürakunata ‘Teytallä’ niyan?”.

 Santiägu cartata leyirkur-ram, imanö kawëkanqäman yarpar qallëkurqä. Santiägu capïtulu 4, versïculu 4-chömi kënö nin: “¿Manaku musyayanki [kë patsachö kaqkunallata kuyarqa] Teyta Diospa contran kayashqëkita?” (Santiägu 4:4, TDW). Peru masqa yanapamarqan Santiägu 4:17 kënö ninqanmi: “Allikunata ruranantsikpaq kashqanta musyëkar mana rurarqa jutsatam rurëkantsik”. Nunakunaqa qellëllatam ashiyan y manam pëkunanö këta munarqätsu. Tsëmi ishkan panïkunata qayarqä, trabäjüta dejanapaq kaqta willanäpaq.

 Teyta Diospita mas yachakuyta, teytäkunawan y wawqi panikunawan mas juntu këtam munarqä. Peru tsëpaqqa, tiemputam rakina karqan, y imëkatam ruranä karqan. Manam fäciltsu karqan. Pï mëmi casïnu pukllayanqan hotelkunachö trabajanäpaq niyämarqan, y gananqäpitapis kima kuti masta pagayämänampaqmi niyämarqan. Tsënö kaptimpis, Teyta Diosman mañakuykurmi tsë trabäjuta dejanäpaq churapakarqä. Tsëpitanam mamänïpa cochëran kaqta ëwakurqä, y imëkata patsätsipakurirmi tsëchö täkurqä. Y juk takshalla negociutam churarqä.

 Bibliachö yachakunqäqa imëkachömi yanapëkämarqan, peru Jehoväpa testïgunkunapa reunionninkunamanqa manam ëwëta munarqätsu. Tsëmi panïkuna kënö niyämarqan: “¿Imanayäshurqunkitan Jehoväpa testïgunkuna?”. Tsëmi nirqä: “Qamkunapa Diosnikikuna Jehoväqa familiakunatam rakin. Noqaqa familiäkunawan juntu karita puëdï Navidächö y cumpleäñu fiestakunallachömi, peru qamkunaqa manam tsëta celebrayankitsu”. Tsëmi jukninkaq panï waqar kënö nimarqan: “Noqakunaqa imëpis shamunëkitam shuyarëkäyä, peru qamqa, fiestakuna junaqllam shamunki. Tsëta wiyarirqa, llakirmi panïwan waqar qallëkuyarqä”.

 Manam noqa yarpanqänötsu karqan. Jehoväpa testïgunkunaqa familiankunata kuyayanmi. Tsëmi reunionkunaman ëwar qallëkurqä. Tsëchömi Këvin jutiyoq wawqita reqirqä, y pëwanmi Bibliapita yachakur qallëkuyarqä.

 Këvinwan warminqa llapan tiempunkunawan Diospita yachatsikuyta munarmi, kayäpunqankunallawan kushishqa kawakuyaq. Africachö y Centroamëricachö Betel wayikunata rurëchö yanapakuyänampaqmi, qellëninkunata juntayaq. Kuyanakuyanqanta y kushishqa kayanqantam rikarqä. Tsëmi noqapis pëkunanö kushishqa këta munarqä.

 Juk kutim, Këvin videuchö rikätsimarqan juk nacionchö yachatsikoq wawqi panikuna kushishqa kayanqanta. Tsëmi noqapis pëkunanö yachatsikuyta munarqä. 1995 watam, joqta killapa Bibliapita yachakurir bautizakurqä. Unëqa ricuyätsimänampaqmi Diosman mañakoq kä. Peru kananqa, “ama rïcuyätsimëtsu ni waktsayätsimëtsu” nirmi mañakü (Proverbius 30:8).

 Kananqa rïcum kä, peru manam mëtsika qellëyoq kartsu, sinöqa Teyta Diosta sirwirmi. Kuyashqa warmï Nuriawanmi, Panamächö y Mëxicuchö Diospita yachatsikuyä. Diospa Palabran Proverbius 10:22-chö ninqanqa rasunllam. Tsëchömi nin: “Teyta Diospa bendicionninwanqa imëkantsikpis kanmi. Bendicionninta chaskiqkunaqa kushikuntsikmi”.