1 Crönicas 10:1-14
-
Saulwan tsurinkuna wanuyan (1-14)
10 Filisteu soldädukunam israelïtakunawan pelyëkäyarqan. Tsëmi filisteu soldädukuna venciyaptin, israelïtakunaqa qeshpir ëwakuyarqan. Filisteukunaqa Guilboa jirkachömi mëtsikaqta wanutsiyarqan.+
2 Saultawan tsurinkunatam qatikachäyarqan, y taripëkurmi Saulpa tsurin Jonatanta, Abinadabta y Malki-Süata+ wanutsiyarqan.
3 Tsëpitam filisteu soldädukunaqa Saulta atacayarqan, y arcuta manejaq+ soldädukunam Saulta rikëkur flëchawan chëkatsiyarqan.
4 Tsënam Saulqa yanapaqnin soldäduta nirqan: “Espädëkiwan wanuratsimë. Manam munätsu penqëninkunachö mana señalakushqa nunakuna wanutsiyämänanta”.+ Tsënö niptimpis yanapaqnin soldäduqa mantsarmi wanutsita munarqantsu. Tsëmi Saulqa espädanwan kikinlla tuksikurirqan.+
5 Saul wanushqa kanqanta rikëkurmi, yanapaqnin soldädupis kikinlla espädanwan tuksikur wanuskirqan.
6 Tsë junaqmi Saulwan kiman tsurinkuna y pëwan llapan këkaqkuna wanuyarqan.+
7 Y israelïta soldädukuna qeshpir ëwakushqa kayanqanta y Saulwan tsurinkuna wanushqa kayanqanta musyaskirmi, israelïtakunaqa markankunapita qeshpir ëwakuyarqan. Y filisteu nunakunaqa tsë markakunaman ëwëkurmi kawakuyarqan.
8 Waränin junaqnam filisteu soldädukunaqa, wanushqa israelïtakunapa väleq cösasninkunata apakuyänampaq ëwayarqan. Y Guilboa jirkachömi Saultawan tsurinkunata wanushqata tariyarqan.+
9 Saulpa peqantaqa o umantaqa roquyarqanmi, y pelyachö utilizanqan cösasnintapis qotutsiyarqanmi. Tsëpitanam entëru Filistëa markakunaman y santunkunapa templunkunaman willakuyarqan.+
10 Saul pelyachö utilizanqan cösasninkunataqa santunkunapa templunmanmi apayarqan y peqantapis o umantapis Dagon santupa templunmanmi clavayarqan.+
11 Y Jabes-Galaad markachö+ nunakunam musyariyarqan filisteu soldädukuna Saulta tsënö rurayanqanta.+
12 Tsëmi tsë markapita llapan soldädukuna paqaspa ëwëkur Saulpa y tsurinkunapa ayankunata Jabes markaman kutitsiyarqan. Y tullunkunataqa Jabes markachö këkaq jatun monti o jatun qeru chakinmanmi pampayarqan,+ y qanchis junaqpam imatapis mikuyarqantsu.
13 Saulqa tsënö wanurqan o wañurqan Jehovä Diosta dejanqampita, Jehoväta mana cäsukunqampita+ y brüjaman tapukoq ëwanqampitam.+
14 Teyta Jehoväta tapukunampa rantinmi, brüjaman tapukoq ëwarqan. Tsëmi Teyta Diosqa* wanuratsir pëpa rantin Jesëpa tsurin Davidta gobernanampaq churarqan.+
Nötakuna
^ Tsënö nirqa, Jehoväpaqmi parlëkan.
