1 Crönicas 13:1-14
13 Davidmi parlapänampaq qayatsirqan mil soldädukunapa y cien soldädukunapa mandaqninkunata y llapan dirigentikunata.+
2 Chäriyaptinnam llapankunata kënö nirqan: “Jehovä Dios munaptinqa y qamkuna munayaptikiqa mëtsëchö këkaq israelïta mayintsikkunaman, sacerdötikunaman y qewayoq chakrakunachö täkoq* levïtakunaman+ willakushun shamurnin yanapamänapaq.
3 Teyta Diosnintsikpa Sagrädu Cäjantam apamushun”.+ Tsënöqa nirqan Saul gobernanqan witsan Sagrädu Cäjata qonqëkushqa kayaptinmi.+
4 Llapan nunakunapis David tsënö ninqanwanqa acuerdum kayarqan.
5 Tsëmi Davidqa Quiryat-Jearim+ markachö këkaq Diospa Sagrädu Cäjanta apatsimunampaq, Egiptu mayu* lädunchö täkoqkunapita qallëkur Lebö-Hamatyaq*+ täkoq* israelïtakunata qayatsirqan.
6 Tsëpitanam Davidqa, llapan israelïtakunawan Judächö këkaq Baalä+ (Quiryat-Jearim) markata ëwayarqan Teyta Diospa Sagrädu Cäjanta apayämunampaq. Nunakunaqa tsë Sagrädu Cäjapa puntanchömi, querubinkuna+ jananchö këkaq Jehovä Diospa jutinta mañakuyaq.
7 Diospa Sagrädu Cäjantaqa, Abinadabpa wayimpitam mushoq carrëtaman+ churarkur apayarqan. Y Abinadabpa tsurinkuna Uzäwan Ahiömi carrëta lädumpa ëwayarqan.+
8 Davidwan llapan israelïtakunaqa kushishqam këkäyarqan. Tsëmi Diospa rikëninchö cantayarqan y arpakunata, cuerdayoq instrumentukunata, panderëtakunata,+ platïllukunata+ y trompëtakunata+ tocayarqan.
9 Kidonpa ëranman chäriyaptinnam carrëtaqa cäsi tikrakaskirqan, tsëmi Uzäqa Teyta Diospa* Sagrädu Cäjan mana jeqanampaq tsarëkurqan.
10 Tsëmi mana jeqanampaq tsarëkunqampita*+ Jehovä Diosqa cölerarnin Uzäta wanuratsirqan.+ Y Uzäqa Diospa* Sagrädu Cäjan lädunmanmi ishkirqan.
11 Tsëmi Jehovä Dios Uzäta* wanuratsiptin Davidqa cölerarqan,* tsëmi tsë sitiutaqa Përez-Uzä nir kananyaq reqiyan.
12 Davidqa Teyta Diosta mantsarninmi, “kananqa manam apashaqnatsu Teyta Diospa Sagrädu Cäjanta” nirqan.+
13 Tsëmi Davidqa, täkunqan* markanman* Teyta Diospa Sagrädu Cäjanta apanampa rantin, guitïta Obed-Edompa wayinman apëkatsirqan.
14 Teyta Diospa Sagrädu Cäjanqa kima killapam guitïta Obed-Edompa wayinchö churararqan, tsëmi Jehovä Diosqa Obed-Edompa familianta y kapunqankunata bendicirqan.+
Nötakuna
^ Kënöpis niyanmi: täraq; päraq.
^ Kënöpis niyanmi: riu. O “Sihorpita”.
^ O “Hamatman yëkunanyaq”.
^ Kënöpis niyanmi: täraq; päraq.
^ Hebreu idiömachöqa “rasumpa Diospa” ninmi. Rikäri “Bibliachö palabrakunata entiendinapaq” neqta.
^ Kënöpis niyanmi: achkunqampita.
^ Hebreu idiömachöqa “rasumpa Diospa” ninmi. Rikäri “Bibliachö palabrakunata entiendinapaq” neqta.
^ Tsë jutiqa, “Uzäpa contran tikrashqa” ninanmi.
^ O “mana alli sientikurqan”.
^ Kënöpis niyanmi: täranqan; päranqan.
^ Hebreu idiömachöqa “David Marka” ninmi.
