1 Crönicas 14:1-17
14 Tïru markapita gobernanti Hiram-mi+ willakoqkunata Davidman mandarqan parlayänampaq. Tsëpitanam cedru qeruta, carpintërukunata, albañilkunata mandarqan palaciu wayita Davidpaq rurayänampaq.+
2 Y Davidqa cuentata qokurqan+ Teyta Jehovä akrashqa kanqanta y israelïtakunata alli gobernanampaq yanapëkanqanta.+
3 Davidqa Jerusalen markachömi mas warmikunawan casakurqan.+ Tsë warmikunachömi ollqupis warmipis mas tsurinkuna kapurqan.+
4 Jerusalen markachö+ yureq tsurinkunam kayarqan Samüa, Sobab, Natan,+ Salomon,+
5 Ibhar, Elisüa, Elpëlet,
6 Noga, Nëfeg, Jafïa,
7 Elisamä, Beeliadä y Elifëlet.
8 Israelpa gobernantin+ kanampaq Davidta churashqa kayanqanta musyëkurmi filisteukunaqa pëwan pelyayänampaq asheq ëwayarqan.+ Tsënam Davidqa pëkunawan pelyanampaq yarqurqan.
9 Filisteukunaqa Refaim pampa urëman churanakurirmi atacayarqan.+
10 Tsënam Davidqa Teyta Diosta kënö tapurqan: “¿Ëwämanku filisteukunawan pelyaq? ¿Vencinäpaq yanapamankitsuraq?”. Jehovänam, “awmi, ëwëlla, yanapashqëkim vencinëkipaq” nirqan.+
11 Tsëmi Davidqa Baal-Perazim+ sitiuta ëwar filisteukunata vencirqan. Tsëpitanam kënö nirqan: “Perqata yaku ishkitseqnömi, Teyta Diosqa chikimaqnïkunata ushakätsishqa”. Tsënö nirmi tsë sitiutaqa Baal-Perazim nir jutin churarqan.
12 Filisteukunaqa santunkunata dejarirmi qeshpir ëwakuyarqan. Tsënam Davidqa tsë santukunata ninawan rupatsiyänampaq mandakurqan.+
13 Filisteukunaqa yapëmi ura pampaman kutïkur atacayarqan.+
14 Tsënam Davidqa Teyta Diosta yapë tapurqan, pënam kënö contestarqan: “Ama puntankunapaqa ëwankitsu, sinöqa qepankunapa ëwëkur mana rikäyäshunëkipaq bacä* niyanqan montikunapa rurinman yëkunki y tsëpita atacanki.+
15 Bacä montikunapa altu puntankunachö soldädukuna pureqtanö wiyarqa, filisteukunata vencinäpaq puntëkita ëwëkanqäta musyanki, tsë höram yarqur atacanëki”.+
16 Davidqa Teyta Dios ninqannömi rurarqan,+ tsëmi filisteukunata Gabaon markapita Guëzer markayaq+ qati qatïkur wanutsiyarqan.
17 Gobernanti David tsënö ushakätsishqa kanqantam mëtsëchö musyayarqan. Y Jehovä Diosmi permitirqan mëtsë nacionchö nunakuna Davidta mantsayänampaq.+
Nötakuna
^ O “bekja”.
