1 Crönicas 17:1-27
17 Davidqa palaciunchö këkarmi, Diospa willakoqnin Natanta+ nirqan: “Noqaqa cedru qerupita+ rurashqa shumaq wayichömi tëkä, peru Jehovä Diospa Sagrädu Cäjanqa carpa* wayillachömi churarëkan”.+
2 Tsënam Natanqa gobernanti Davidta, “Teyta Dios yanapëkäshuptikiqa pensanqëkita rurë” nirqan.
3 Tsë paqasmi Teyta Diosqa Natanta kënö nirqan:
4 “Sirwimaqnï Davidta kënö nï: ‘Jehovämi kënö nin: “Manam qamtsu adorayämänampaq wayita ruranki.+
5 Israelïtakunata salvamunqä junaqpitaqa, manam juk wayichötsu adorayämashqa. Sinöqa carpa* wayikunallachömi wakpa këpa puritsiyämashqa.+
6 Israelïtakuna tsënö puritsiyämanqan witsankunaqa, manam Israelchö juezkunata imatapis nirqätsu. O ¿imëllapis nirqäku, ‘¿imanirtan cedru qerupita wayï rurayämunkitsu?’?”’.
7 Kananqa sirwimaqnï Davidta kënö nï: ‘Angelkunata mandaq Jehovä Diosmi kënö nishqa: “Üshata mitsir purikaptikim, sirwimaqnï israelïtakunapa gobernantin kanëkipaq apamurqaq.+
8 Tsëmi mëta ëwaptikipis noqa yanapashqëki,+ y llapan chikiyäshoqnikikunatam ushakätsishaq.+ Y reqishqa nunakunanö kanëkipaqmi yanapashqëki.+
9 Sirwimaqnï israelïtakunatam sitiun rikätsishaq imëyaqpis tsëchö kawakuyänampaq, manam ni pï imananqatsu. Y manam chikeqninkuna sufritsiyanqanatsu.+
10 Juezkunata churanqäpitaqa+ manam chikeqninkuna sufritsiyanqanatsu. Y llapan chikishoqnikikunata vencinëkipaqmi yanapashqëki.+ Noqa Jehovämi kastëkillapita gobernantikuna kayänampaq permitishaq.
11 Wanukunqëki o wañukunqëki junaq chämuptin y unë kastëkikunanö pampakaptikiqa, tsurikitam+ gobernanampaq churashaq.+
12 Pëmi Sagrädu Cäjä churaränampaq wayï ruramunqa,+ y noqam imëyaqpis gobernanampaq yanapashaq.+
13 Noqam Teytan kashaq y pëmi tsurï kanqa.+ Qampa puntëkita gobernaqta dejashqa karpis,+ tsurikitaqa manam dejashaqtsu y imëpis alläpam kuyashaq.+
14 Sirwimaqnï nunakunapa mandaqninmi kanqa y pëpa familiankunam imëpis gobernayanqa”’”.+
15 Teyta Dios llapan ninqantam Natanqa Davidta willarqan.
16 Tsënam gobernanti Davidqa Teyta Jehoväpa rikëninman jamëkur kënö nirqan: “Jehovä Dios, ¿noqalläqa pitan kä? ¿Manaku familiäpis mana reqishqalla kallan? Qamqa mana merecikäyaptïmi yanapayämarqunki.+
17 Y manam tsëllatatsu rurarqunki Teyta Dios, sinöqa familiäkuna imëyaqpis gobernanampaq+ kaqtapis nirqunkim. Jehovä Dios qamqa rikëkämanki alläpa respetashqa nunatanömi.
18 Kë llapanta noqapaq rurëkämuptikiqa, ¿ima mastaraq nishqëki? Qamqa imanö kanqätapis allim musyanki.+
19 Teyta Jehovä noqapaq yarpachakurmi imëkata rurarqunki, y alläpa puëdeq kanqëkitam rikätsikurqunki.+
20 Teytallä Jehovä, manam qamnöqa ni pï kantsu.+ Y qampita masqa manam Dios kantsu.+ Tsënö kanqëkitaqa llapan wiyayanqäwanmi cläru musyayä.
21 Israel nacionnöqa manam kë patsachö ima nacionpis kantsu.+ Teyta Dios qammi israelïtakunataqa sirwiyäshunëkipaq salvamurqëki.+ Y pëkunata Egiptu nacionpita pushamurmi, poderösu karnin imëkakunata rurarnin+ chikeqninkunata qarqurqëki.+ Tsëta ruranqëkipitam entëru patsachö reqiyäshunki.
22 Y imëyaqpis sirwiyäshunëkipaqmi israelïtakunata akrarqëki,+ qammi Diosninkunaqa kanki Teyta Jehovä.+
23 Kananqa Jehovä Diosllä, noqata y familiäta äniyämanqëkitaqa mana qonqëllata cumplïkullë.+
24 Jutikiqa imëyaqpis katsun+ y nunakunapis niyätsun: ‘Angelkunata mandaq Israelpa Diosnin Jehovämi, Israelpa Diosninqa’. Y familiäkuna puntëkichö imëyaqpis gobernanti kayätsun.+
25 Teyta Dios, qammi nimarqunki familiäkunalla gobernanti kayänampaq. Tsëmi mana mantsakuypa qamta parlapärillaq.
26 Teyta Jehovä, qamllam rasumpa kaq Diosqa kanki y parlanqëkikunataqa cumplinkim.
27 Kananqa familiäkunata bendicïkullë puntëkichö imëyaqpis kayänampaq. Teyta Jehovä, qammi bendicirqunki y imëyaqpis bendicishqam kayanqa”.
