1 Crönicas 19:1-19
19 Tiempuwannam ammonïtakunapa gobernantin Nahas wanukurqan, tsënam tsurin gobernanampaq yëkurqan.+
2 Tsënam David nirqan: “Nahas kuyamanqannöllam*+ noqapis tsurin Hanunta kuyashaq”. Tsënö nirmi Davidqa sirweqninkunata mandarqan, papänin wanushqa kaptin Hanunta consolayänampaq. Peru ammonïtakunapa+ markanman Davidpa sirweqninkuna chäriyaptinmi,
3 ammonïtakunapa dirigeqninkunaqa Hanunta kënö niyarqan: “¿Davidqa rasumpatsuraq papänikita respetan? ¿Rasumpatsuraq consolayäshunëkipaq sirweqninkunata mandamushqa? ¿Manatsuraq ushakätsimënintsikta munar markantsikkunata rikapakuyänampaq mandamushqa?”.
4 Tsënö niyaptinmi Hanunqa David mandanqan nunakunapa cärankunachö shaprankunata* afeitarapur+ y röpankunatapis tseqllan jawanyaq roqurapur qarquskirqan.
5 Tsënö penqakatsishqa kayanqanta gobernanti Davidta willariyaptinmi, willakoqkunata mandarqan kënö niyänampaq: “Shaprëkikuna* winanqanyaq Jericö markallachö quedakuyë,+ tsëpitanam kutikayämunki”.
6 Tiempuwannam ammonïtakunaqa musyariyarqan Davidta cöleratsishqa kayanqanta. Tsëmi Hanunwan ammonïtakunaqa, carrëtakunawan y cawallunkuna montashqa soldädukunawan yanapayänampaq Mesopotamiaman, Aram-Maacäman y Zobäman+ treinta y cuatru mil doscientus kïlus* pläta metalta apatsiyarqan.
7 Treinta y dos mil carrëtakunatam contratayarqan, tsënöllam Maacä gobernantita y soldädunkunatapis contratayarqan. Pëkunam Medebä+ sitiuchö campamentunkuna rurayarqan. Tsënöllam ammonïtakunapis markankunapita guërrapaq yarqayämurqan.
8 Tsëta musyëkurnam Davidqa Joabtawan+ llapan soldädunkunata y mas allin kaq soldädunkunatapis mandarqan.+
9 Ammonïtakunaqa israelïtakunawan pelyayänampaqmi markapa punkunman churanakuyarqan, peru gobernantikunanam pampaman churanakushqa kayarqan.
10 Joabqa, puntampa y qepampa siriu soldädukuna+ atacayaptinmi, mas allin kaq soldädukunata akrëkur pëkunawan pelyayänampaq churarqan.
11 Y ammonïtakunawan pelyayänampaqnam wakin soldädukunata churarqan y wawqin Abisaitam+ diriginampaq mandarqan.
12 Kënömi nirqan: “Siriu soldädukuna+ vencimaptinqa, yanapamänëkipaq shamunki. Peru ammonïta soldädukuna qamta venciyäshuptikiqa noqam shamushaq yanapanaqpaq.
13 Marka mayintsikkunata y Teyta Diosnintsik entregamanqantsik markakunata defendinapaqqa valientim kanantsik.+ Jehovä Diosqa yanapamäshunmi”.
14 Tsënam Joabwan soldädunkuna pelyayänampaq maslla ëwayaptin, siriu soldädukunaqa mantsakarnin qeshpir ëwakuyarqan.+
15 Siriu soldädukuna qeshpir ëwakuyanqanta rikarmi, ammonïtakunapis Abisaipita y soldädunkunapita qeshpir markaman yëkuriyarqan. Tsëpitanam Joabwan soldädunkunaqa Jerusalen markaman kutikuyarqan.
16 Israelïtakuna vencishqa këkäyaptimpis, siriu soldädukunaqa Eufratis mayu*+ kuchunchö täkoq* siriukunatam qayatsiyämurqan, y pëkunapa dirigeqninkunaqa karqan Hadadëzerpa+ soldädunkunapa mandaqnin Sobacmi.
17 Davidta willariyaptinnam, llapan israelïta soldädunkunata jinan höra qayatsirqan. Tsëpitanam Jordan mayuta* tsimparir pelyayänampaq churanakuyarqan. Y siriu soldädukunatam Davidwan soldädunkuna atacayarqan.+
18 Tsëmi siriukunaqa qeshpir ëwakuyarqan. Davidqa carrëta manejaq siëti mil soldädukunatam wanutsirqan, y cuarenta mil soldädukunatapis wanutsirqanmi. Tsënöllam soldädukunapa mandaqnin Sobactapis wanutsiyarqan.
19 Tsënö venciriyaptinmi,+ Hadadëzerpa sirweqninkunaqa israelïtakunawan parlayarqan pëkunapa poderninchöna kayänampaq.+ Y siriukunaqa mananam masqa ammonïta soldädukunata yanapayarqannatsu.
Nötakuna
^ O “alläpa kuyamanqannöllam”.
^ Kënöpis niyanmi: shaprunkunata.
^ Kënöpis niyanmi: Shapruykikuna.
^ Hebreu idiömachöqa “1.000 talentus” ninmi. 1 talentuqa 34,2 kïlusmi karqan. Rikäri “Masllata musyanapaq” neqchö B14 kaqta.
^ Kënöpis niyanmi: riu.
^ Kënöpis niyanmi: täraq; päraq.
^ Kënöpis niyanmi: riuta.
