1 Crönicas 21:1-30
21 Israelïtakunata mana alliman ishkitsita munarmi, Satanasqa Davidta pensaratsirqan censuta ruratsinampaq.+
2 Tsëmi Davidqa Joabta+ y dirigentikunata qayëkatsir nirqan: “Ëkaq kayanqanta musyanäpaq Israelchö llapan kastakunaman jinan höra ëwar, Danpita+ Beer-Sëbayaq censuta rurayämuy”.
3 Tsënam Joabqa gobernanti Davidta nirqan: “Teytallë, ¿imapaqtan censuta ruranäta munanki? ¿Manaku llapampis qampa sirwishoqnikikuna kayan? Jehovä Diosnintsik nunakunata kanan këkanqampita cien kuti masta atskayätsitsun. Censuta ruratsirqa llapan israelïtakunatam jutsaman* ishkitsinki”.
4 Joab tsënö niptimpis, Davidqa ëwananllatam munarqan. Tsëmi Joabqa entëru Israelchö censuta ruraskir Jerusalen markaman kutimurqan.+
5 Tsëpitanam Joabqa, censanqanta gobernanti Davidta entregarqan. Y llapan Israelchöqa un millon cien mil guërrapaq espädayoq soldädukunam kayarqan, y Judächönam cuatrocientus setenta mil espädayoq soldädukuna kayarqan.+
6 Peru Joabqa, gobernanti ninqan mana alli kanqanta+ pensarmi Levïpa kastankunata y Benjaminpa kastankunataqa censarqantsu.+
7 David censatsinqanta mana gustarmi Teyta Diosqa israelïtakunata castigarqan.
8 Tsëmi Davidqa Teyta Diosta nirqan: “Këta rurarqa jutsallakurqömi,*+ upakuna rurayanqantam rurarqö.+ Teyta Dios perdonëkallämë”.+
9 Davidqa Diospa willakoqnin Gadtam+ imëpis tapoq. Tsënam Teyta Jehoväqa willakoqnin Gadta kënö nirqan:
10 “Ëwar Davidta kënö nï: ‘Jehovämi këta nishunki: “Kë kiman castïgupita jukninta akrë”’”.
11 Tsënam Gadqa ëwarnin Davidta kënö nirqan: “Jehovämi këta nishunki: ‘Kë castïgukunapita jukta akrë:
12 mëqantataq munanki, ¿mikuy mana kaptin entëru nacionchö kima watapa mallaqë kanantaku?+ ¿Chikiyäshoqnikikuna kima killapa qatikachäyäshunëkitaku?+ O ¿kima junaqpa Teyta Jehoväpa espädan castigayäshunëkitaku? Këqa kima junaqpa raslla o saslla wanutsikoq qeshyam kanqa.+ Kë kima kaqta akraptikiqa entëru Israelchömi Jehoväpa angelnin nunakunata espädawan wanutsinqa’.+ Kananqa alli pensëkur mëqantapis akrë, mandamaqnïta willanäpaq”.
13 Tsënam Davidqa Gadta kënö nirqan: “¡Alläpa llakishqam këkä! Manam chikimaqnïkuna wanutsiyämänanta munätsu.+ Musyämi Jehovä Dios llakipäkoq* kanqanta,+ mejorqa kikin castiguëkamätsun”.
14 Tsënam Jehovä Diosqa Israelchö täkoqkunata* raslla o saslla wanutsikoq qeshyawan+ castigarqan y setenta milmi wanuyarqan o wañuyarqan.+
15 Jerusalen markachö täkoqkunata* ushakätsinampaqpis Jehovä Diosqa juk angelnintam mandarqan. Peru tsë angel ushakätsinampaqna këkaptinmi, Jehovä Diosqa israelïtakunata llakipar*+ angelta nirqan: “¡Tsëllachöna,+ ama wanutsinatsu!”. Angelqa jebuseu+ Ornan nunapa+ ëran lädunmampam këkarqan.
16 Tsënam Davidqa altupa rikachakunqanchö rikëkurqan Jehovä Diospa angelninta espädanwan+ Jerusalen markaman apuntarëkaqta. Tsënö rikëkurmi Davidwan dirigentikunaqa chukru tëlakunata vistikurkur+ patsaman lätakäriyarqan.+
17 Y Davidmi Teyta Diosta nirqan: “Teyta Dios, kë nunakunaqa* manam imatapis rurayashqatsu. Noqam culpayoqqa kä, noqam jutsataqa* rurarqö.+ Jehovä Diosllä, noqata y papänïpa familianta castiguëkayämë. Peru kë nunakunataqa ama castiguëkullëtsu”.+
18 Tsënam Jehoväpa angelninqa Gadta+ mandarqan, Davidta ninampaq jebuseu Ornan nunapa+ ëranchö Jehovä Diospaq altarta ruranampaq.
19 Gat tsënö willaptinmi Davidqa Jehovä Dios mandanqannö witsarqan.
20 Ornanqa chuskun tsurinkunawanmi trïguta jaruykätsiyarqan, tsënam Ornanqa tumëkur Teyta Diospa angelninta rikëkurqan, tsëmi ratakuyarqan o tsinkakuyarqan.*
21 Tsëpitanam Ornanqa David witsëkaqta rikëkur, ëra kaqpita ëwar puntanman qonqurikurqan.
22 Tsënam Davidqa Ornanta nirqan: “Ërëkita rantikamänëkipaqmi shamurqö, preciun ëka kaptimpis pagashqëkim. Tsëchömi Jehovä Diospaq juk altarta rurashaq. Tsënöpam nunakuna raslla o saslla wanutsikoq qeshyawan wanuyanqanatsu”.+
23 Tsënam Ornanqa Davidta nirqan: “Ëraqa këchömi këkan teytallë, qarëkushqëki. Këchömi këkan rupatsinëkipaq törukunapis y trïgupis, y yantapaqpis törukuna sutayanqan tablakunapis+ kanmi. Teytallë kë llapantam qarëkoq”.
24 Tsënam Davidqa Ornan nunata nirqan: “Preciuntam pagashqëki, manam qaramankitsu.+ Qarëtukuyllawanqa manam Jehovä Diospaq pishtashqa animalta rupëkatsïmantsu”.
25 Tsënö nirmi Davidqa qanchis kïlunö* öruwan ërata rantirqan.
26 Y tsëchömi Davidqa altarta rurëkur,+ Teyta Dioswan amïgu kayanqanta* rikätsikoq qarëkunata y pishtashqa animalkunata Jehovä Diospaq rupatsirqan y Jehoväman rogakurqan. Tsënam Teyta Diosqa rogakunqanta wiyëkur altarman ninata mandamurqan.+
27 Tsëpitanam Jehovä Diosqa angelninta nirqan+ churaränanman espädanta kutitsinampaq.
28 Rogakunqanta jebuseu Ornanpa ëranchö Jehovä Dios wiyanqanta musyarirmi, Davidqa mas qarëkunata rupatsirqan.
29 Tsë witsampaqqa, tsunyaq jirkachö Moises ruratsinqan Jehoväpa carpa* wayin y qarëkunata rupatsiyänan altarqa Gabaon+ markallachöran sagrädu sitiuchö* këkarqan.
30 Peru Davidqa Jehoväpa angelninta espädan aptashqata rikashqa karmi alläpa mantsakarqan, tsëmi Teyta Diosta tapunampaq Gabaon markata ëwëta puëdirqantsu.
Nötakuna
^ Kënöpis niyanmi: pecäduman.
^ Kënöpis niyanmi: pecädutam rurarqö.
^ Kënöpis niyanmi: ankupäkoq; kuyapäkoq.
^ Kënöpis niyanmi: täraqkunata; päraqkunata.
^ Kënöpis niyanmi: ankupar; kuyapar.
^ Kënöpis niyanmi: täraqkunata; päraqkunata.
^ Hebreu idiömachoqa “üshakunaqa” ninmi.
^ Kënöpis niyanmi: pecädutaqa.
^ Kënöpis niyanmi: illaririyarqan; pakakuyarqan.
^ Hebreu idiömachöqa “600 siclus” ninmi. 1 sicluqa 11,4 grämusmi lasaq. Rikäri “Masllata musyanapaq” neqchö B14 kaqta.
^ Rikäri “Bibliachö palabrakunata entiendinapaq” neqta.
^ Kënöpis niyanmi: toldu.
^ Hebreu idiömachöqa “altu sitiu” ninmi.
