1 Pëdru 1:1-25
1 Cristu Jesuspa apostolnin+ Pëdrupita, Pontuchö, Galaciachö, Capadociachö,+ Asiachö y Bitiniachö forastërunö kawaq akrashqakunapaq.
2 Awmi, puntallapitana musyëta puëdinqannö Teyta Dios akranqankunapaq,+ y cäsukoq y Jesucristupa yawarninwan tsaqtsushqa kayänampaq santu espïritunwan limpiuyätsishqa kaqkunapaq:+
Teyta Dios masraq qamkunawan alli këkutsun y imëpis yamë kayänëkipaq yanapëkuyäshuy.
3 Señornintsik Jesucristupa Diosnin y Teytan alabashqa këkutsun. Pëqa alläpa llakipäkoq* karmi, wanushqampita Jesucristuta kawaritsimur+ imëpis shuyarar+ këkänapaq yapë yurikunantsikta permitishqa.+
4 Tsënöpa mana ismoq y mana imëpis ushakaq herenciata chaskinapaq.+ Tsëqa ciëluchömi qamkunapaq këkan,+
5 markäkoq o yärakoq kayanqëkirëkur, ushanan witsanchö rikakunampaqna këkaq salvacionta tariyänëkipaq, Teyta Dios poderninwan cuidëkanqan kaqkunapaq.
6 Tsëmi qamkunaqa alläpa kushishqa këkäyanki. Tsënö kaptimpis, precisanmi wallka tiempulla tukuyläya pruëbakunata pasar llakishqa kayänëki.+
7 Tsënöpa imëkawan probashqa* markäkuynikikunarëkur o yärakuynikikunarëkur,+ Jesucristu rikakämunqan tiempuchö, alabashqa, mas väleqpaq churashqa y respetashqa kayänëkipaq. Tsënö markäkuyanqëkiqa, ninapa pasatsishqa këkar* ushakäreqlla örupitapis mas väleqmi.+
8 Mana imë rikashqa karpis, qamkunaqa kuyayankim. Kanan mana rikëkarpis, pëmanmi markäkuyanki o yärakuyanki, y espantëpaqmi alläpa kushishqa këkäyanki,
9 markäkoq o yärakoq kayanqëkipita salvacionta tarishqa karnin.+
10 Tsë salvacionpitam, Diospa alläpa alli këninta chaskiyanqëkipita musyatsikoq Diospa willakoqninkuna, alli averiguar llapan puëdiyanqanta yachakuyta munayarqan.+
11 Pëkunaqa, Cristu imanö sufrinampaq kaqta y tsëpitaqa imëka bendicionkuna shamunampaq kaqta* puntallapitana willakunqan,+ imë tiempu o imë witsan cumplikänampaq kaqta santu espïritu willakunqantam averiguar kayarqan.+
12 Pëkunatam Teyta Dios musyatsirqan, willakuyanqankuna kikinkunapaq mana kanqanta, sinöqa qamkunapaq kanqanta. Tsë willakuyanqantam ciëlupita shamoq santu espïritu yanapaptin alli noticiakunata willakoqkuna, kanan qamkunata willayäshurqunki.+ Tsëkunatam angelkunapis shumaq entiendita munayan.
13 Tsëmi alli trabajayänëkipaq pensënikikunachö listu këkäyë,+ imëpis alli juiciuyoq kayë+ y Jesucristu rikakämunqan tiempuchö Dios alläpa alli kanqanta rikäyänëkipaq kaqta, llapan shonquykikunawan shuyarar këkäyë.
14 Cäsukoq wamrakuna karnin, amana Teyta Diosta mana reqiyanqëki tiempuchönöqa portakuyënatsu,
15 sinöqa qayayäshoqniki Limpiu Diosnö, portakuyanqëkichö limpiu kayë.+
16 Kënömi qellqarëkan: “Noqaqa limpium kä. Tsëmi qamkunaqa llapanchö limpiu kayänëki”.+
17 Llapankunatapis rurayanqanmannö igualpa juzgaq Teytaman mañakuykarqa,+ forastërunö kawayanqëki witsanchö Teyta Diosta respetar shumaq portakuyë.+
18 Qamkunaqa musyayankim unë kastëkikuna yachatsiyäshunqëki* imapaqpis mana sirweq kawëpita, ismur ushakaq öruwan o plätawan mana salvashqa kayanqëkita,+
19 sinöqa, sänu y limpiu orqu* üshapa+ yawarninwannömi,+ Cristupa alläpa väleq yawarninwan salvashqa kayarqunki.+
20 Rasunmi, pëqa patsachö nunakuna yurikur qallayanqampitam akrashqa* karqan,+ peru qamkunarëkurmi ushanan tiempukunachö rikakämushqa.+
21 Përëkurmi wanushqampita kawaritseq+ y puëdeq këman churaq+ Teyta Diosman creikuyanki.+ Tsëtaqa Dios rurarqan markäkuyänëkipaq o yärakuyänëkipaq y pëman confiakuyänëkipaqmi.
22 Rasumpa kaqta cäsukur Teyta Diospa rikëninchö limpiuna karnin, familianö rasumpa estimanakuykarqa,+ jukniki juknikikuna llapan shonquykikunawan alläpa kuyanakuyë.+
23 Qamkunaqa manam ismoq murupitatsu+ yapë yuriyarqunki,+ sinöqa kawëkaq y mana imëpis ushakaq Diospa palabranwanmi, mana ismoq murupita* yuriyarqunki.+
24 Awmi, “nunakunaqa plantanömi kayan, y shumaq kayanqampis chakrachö wëtanömi; plantaqa tsakirinmi y wëtapis ushakärinmi,
25 peru Teyta Jehovä* llapan ninqankunaqa manam imëpis ushakantsu”.+ Tsë “llapan ninqankunaqa”* qamkunata willayäshunqëki alli noticiakunam kayan.+
Nötakuna
^ Kënöpis niyanmi: ankupäkoq; kuyapäkoq.
^ O “alliyätsishqa”.
^ O “ninawan alliyätsishqa këkar”.
^ O “puëdeq këta chaskinampaq kaqta”.
^ O “costumbritanö yachatsiyäshunqëki”.
^ Kënöpis niyanmi: mächu.
^ O “reqishqa”.
^ Tsënö nirqa, wayuyta puëdeq murupaqmi parlëkan.
^ O “palabranqa”.
