1 Pëdru 5:1-14
5 Tsëmi noqapis anciänu* kar, Cristu sufrinqankunata rikashqa kar, y rikakunampaqna këkaq puëdeq këta chaskeq mayikikuna karnin,+ anciänukunata* këta rogayaq:*
2 anciänu* karnin carguykikunachö këkaq Teyta Diospa üshannö kaqkunata cuidayë,+ peru ama obligashqanöqa, sinöqa Teyta Diospa rikëninchö gänas gänaslla;+ ama mana penqakushpa imatapis tarita munarqa,+ sinöqa empëñu empëñu;
3 ama Teyta Diospa herencian kaqkunapa patronnin tukurqa,+ sinöqa, üshanö kaqkuna qamkunapita yachakuyänampaqnö imatapis rurar.+
4 Y mandakoq mitsikoq rikakunqan tiempuchömi,+ mana ushakaq puëdeq kë premiuta* chaskiyanki.+
5 Tsënölla qamkunapis jövin nunakuna, mayor nunakunata respetar cäsukuyë.+ Teyta Diosqa allish tukoqkunapa contranmi këkan, peru humildikunata tratanqanchöqa alläpa alli kanqantam rikätsikun. Tsënö këkaptinqa, jukniki juknikipis imanö tratanakuyanqëkichö humildi kayë.*+
6 Tsëqa, dispunishqan tiempuchö punta puntaman churayäshunëkipaq, humillakur Teyta Diospa puëdeq makinman churakäyë.+
7 Y tsëyaqqa llapan yarpachakuyanqëkita* pëman churarkuyë.+ Pëqa qamkunapaqmi alläpa yarpachakun.+
8 ¡Imëpis alli juiciuyoq y alkäbu alkäbu këkäyë!+ Chikiyäshoqniki Diabluqa pitapis tragakurkuyta munarmi, leonnö qaparikachar* entëru läduykikunapa purikan.+
9 Peru entëru patsachö wawqikuna y panikunapis qamkunanölla sufrikäyanqanta yarpar,+ alli markäkur o yärakur pëpa contran churakäyë.+
10 Wallka tiempullapa sufrimientuta pasariyaptikinam, Cristuwan juntu imëyaqpis puëdeq kayänëkipaq qayayäshoqniki y alläpa alli kanqanta tukuynöpa rikätsikoq kikin Teyta Dios,+ alistayäshurniki ushanqa. Pëmi alli tsarakoqta tikratsiyäshunki,+ pëmi fuertita tikratsiyäshunki,+ pëmi alli patsakätsiyäshunki.
11 Pëlla imëyaqpis puëdeq kaq katsun. Tsënö kallätsun.*
12 Confiakuypaq wawqi Silvänu*+ yanapamaptinmi, kallpayoq kayänëkipaq y Teyta Dios qamkunawan rasumpa alläpa alli kanqanta musyayänëkipaq, juk ishkë palabrakunallata qamkunaman qellqamurqö. Ama tsëta imëpis oqrayëtsu.
13 Babiloniachö këkaq qamkunanölla akrashqa,* y tsurillä Marcusmi+ salüdunkunata apatsikayämun.
14 Jukniki juknikikuna waqunakur o makallanakur shumaq saludanakuyë.*
Cristuwan juknölla këkaqkuna imëpis yamë këkäyë.
Nötakuna
^ O “consejayaq”.
^ O “cristiänukunata dirigeqkunata”.
^ O “cristiänukunata dirigeq”.
^ O “cristiänukunata dirigeq”.
^ Griëgu idiömachöqa “corönata” ninmi.
^ O “humildi këta röpatanö vistikuyë”.
^ O “preocupatsiyäshunqëkita”.
^ Kënöpis niyanmi: qayarar.
^ O “Amen”.
^ Pëtaqa Sïlas nirpis reqiyaqmi.
^ Tsënö nirqa, capazchi tsë sitiuchö creikoqkunapaq parlëkan.
^ Griëgu idiömachöqa “kuyanakur mutsanakuyë” ninmi.
