1 Rëyes 13:1-34
13 Juk kutim, Jehovä Dios+ mandaptin Judäpita juk willakoqnin Betel markata ëwarqan. Chärirnam altarchö qarëkunata rupatsinampaqna këkaqta Jeroboanta tarirqan.+
2 Tsënam Teyta Jehovä nishqa kaptin altarta fuertipa parlapar kënö nirqan: “¡Altar, altar! Këtam Jehovä Dios nishqa: ‘Mana alli sacerdötikunam sagrädu sitiukunapita* shamuykur janëkichö animalkunata rupëkätsiyan. Tsëmi, ¡Davidpa kastampita Josïas jutiyoq+ wamra yurinqa! Y pëmi tsë sacerdötikunata y nunakunapa tullunkunata janëkichö rupatsir ushanqa’”.+
3 Tsëpitanam nirqan: “Jehovä Dios nimanqanta creiyänëkipaqmi kanan junaq altar pakirinqa y wirallana uchpapis mëtsëmanmi ëwanqa”.
4 Teyta Diospa willakoqnin altarta tsënö niptinmi, Jeroboanqa altarchö këkanqampita makinwan señalarnin, “¡tsë nunata prësuyë!”+ nirqan. Tsënam señalëkanqan rikrantaqa kuyutsita puëdirqannatsu.*+
5 Tsë höram Jehovä Diospa willakoqnin ninqannö altar pakiriptin uchpapis mëtsëman ëwarqan.
6 Tsënam gobernantiqa Teyta Diospa willakoqninta kënö nir rogakurqan: “Makillä alliyänampaq Jehovä Diosnikita roguëkallämuy”.+ Tsënö niptinnam Teyta Jehoväman rogakurqan, tsëmi rikranqa alliyärirqan.
7 Rikran alliyäriptinnam Jeroboanqa Diospa willakoqninta kënö nirqan: “Imallatapis mikurinëkipaq wayïta aku ëwashun, y apanëkipaqmi imallatapis qarashqëki”.
8 Peru Diospa willakoqninnam nirqan: “Palaciuchö kapushunqëkita pullanta rakipëkamaptikipis manam qamwanqa ëwashaqtsu. Manam këchöqa imatapis mikushaqtsu ni yakutapis upushaqtsu.
9 Jehovä Diosmi kënö nimashqa: ‘Ama tsëchöqa imatapis mikunkitsu ni yakutapis upunkitsu ni ëwanqëki nänipapis ama kutimunkitsu’”.
10 Tsënö niskirmi Betel markaman ëwanqan nänipaqa kutirqannatsu, juk nänipanam kutikurqan.
11 Peru Betel markachöqa Diospa juk willakoqninmi täkurqan,* pëqa awkinnam karqan. Tsë awkintam tsurinkuna willayarqan Judäpita Betel markaman Diospa willakoqnin shamushqa kanqanta. Y willayarqanmi tsë junaq llapan ruranqanta y gobernanti Jeroboanta llapan ninqantapis. Tsënö willariyaptinnam,
12 tsë awkinqa tsurinkunata kënö nirqan: “¿Më nänipatan kutikushqa?”. Tsënam tsurinkunaqa rikätsiyarqan Diospa willakoqnin ëwakunqan nänita.
13 Tsënam awkinqa tsurinkunata nirqan: “Ashnulläta karunarkayämuy”. Karunariyaptinnam ashnunta montarkur qepanta ëwarqan.
14 Y Diospa willakoqnintaqa jatun montipa o jatun qerupa chakinchö jamëkaqta tariparqan. Tsënam kënö tapurqan: “¿Qamku kanki Judäpita shamoq, Teyta Diospa willakoqnin?”.+ Tsënam pëqa, “awmi teytë, noqam kallä” nirqan.
15 Tsënam awkinqa, “aku wayïta ëwashun imallatapis mikurkunëkipaq” nirqan.
16 Peru Diospa willakoqninnam kënö nirqan: “Manam wayikita kutita puëdïtsu y manam këchöqa imatapis mikuyta ni yakutapis upuyta puëdïtsu.
17 Jehovä Diosmi kënö nimashqa: ‘Ama tsëchöqa imatapis mikunkitsu ni yakutapis upunkitsu y ëwanqëki nänipaqa ama kutimunkitsu’”.
18 Tsënam awkinqa uliparnin o llullaparnin kënö nirqan: “Noqapis qamnömi Diospa willakoqnin kä, Jehovä Diospa juk angelninmi kënö nimashqa: ‘Tantata mikunampaq y yakuta upunampaq ëwar wayikiman pushamuy’”.
19 Tsënö niptinmi Diospa willakoqninqa tsë awkimpa wayinman kutirqan mikunampaq y yakuta upunampaq.
20 Mësachö këkäyaptinmi Jehovä Diosqa tsë awkinta parlaparqan.
21 Tsënam awkinqa Judäpita shamushqa Diospa willakoqninta fuertipa kënö nirqan: “Jehovä Diosmi këta nin: ‘Qamqa munënikita rurarmi Jehovä Dios nishunqëkita mana kaqpaq churarqunki y Jehovä Dios mandashunqëkitam cäsukurqunkitsu.
22 Y “ama imatapis mikunkitsu ni upunkitsu” nikaptïmi kutïkur mikurqunki y yakutapis upurqunki. Tsëta ruranqëkipitam ayëkiqa familiëkikuna pamparanqanchö pamparanqatsu’”.+
23 Tsëpitanam awkinqa, Diospa willakoqnin mikur y upur ushariptin ashnun karunarkapurqan ëwakunampaq.
24 Tsënam Diospa willakoqninqa ëwakurqan, peru nänipa ëwakuykaptinmi juk leonqa wanuratsirqan.+ Tsëmi ayanqa nänichö jitarëkar quedarqan, y ashnuwan leonqa aya lädunchömi këkäyarqan.
25 Tsëpa pasaq nunakunam nänichö aya jitarëkaqta y lädunchö juk leon këkaqta rikäyarqan. Tsënam tsë awkimpa markanman chärir rikäyanqanta willakuyarqan.
26 Willakuyanqanta awkin musyarirnam kënö nirqan: “Tsë wanushqa nunaqa Diospa willakoqninmi, pëqa manam Teyta Jehoväta cäsukushqatsu.+ Jehoväqa parlanqanta cumplinmi, tsëmi Jehoväqa permitishqa juk leon wanutsinanta”.+
27 Tsëpitanam tsurinkunata, “ashnullä karunarkayämuy” nirqan. Tsënam ashnunta karunariyaptin,
28 awkinqa ëwarqan y nänichömi wanushqa nunata tarirqan. Lädunchömi ashnuwan leonpis këkäyänaq. Leonqa manam ni ashnuta ni ayatapis mikushqatsu kanaq.
29 Tsënam awkinqa kikimpa markanchö waqanampaq y pampanampaq Diospa willakoqnimpa ayanta ashnuman cargarkur kutikurqan.
30 Tsëpitanam kikin pampakänampaq kaqman tsë ayata pampëkurqan, y “¡allaw wawqillä!” nirmi waqayarqan.
31 Ayata pamparirnam tsurinkunata kënö nirqan: “Noqa wanukuptïqa Diospa willakoqnin pamparanqan lädunman pampëkayämanki, y tullütapis tullun lädunman churëkuyanki.+
32 Betel markachö altarpaq y Samaria markakunapa sagrädu sitiunkunachö* templukunapaq,+ Diospa willakoqnin parlanqanqa Jehovä Dios ninqannöllam cumplikanqa”.+
33 Tsë llapan pasanqanta rikëkarpis Jeroboanqa mana allikunatam rurëkarqan. Pëqa sagrädu sitiukunachö*+ templukunamanmi pitapis munaq kaqta sacerdöti kanampaq churaq. Lluta nunakunata churarirmi kënö neq: “Pëpis sagrädu sitiukunachö* sacerdöti kanampaq ëwatsun”.+
34 Tsë jutsata* ruranqampitam Jeroboanpa+ kastankunaqa pasëpa* ushakäyarqan.+
Nötakuna
^ Hebreu idiömachöqa “altu sitiukunapita” ninmi.
^ Hebreu idiömachöqa “tsakirirqan” ninmi.
^ Kënöpis niyanmi: tärarqan; pärarqan.
^ Hebreu idiömachöqa “altu sitiunkunachö” ninmi.
^ Hebreu idiömachöqa “altu sitiukunachö” ninmi.
^ Hebreu idiömachöqa “altu sitiukunachö” ninmi.
^ Kënöpis niyanmi: pecäduta.
^ Kënöpis niyanmi: jankat.
