1 Corintius 10:1-33
10 Wawqikuna y panikuna, musyayänëkitam munä unë kastantsikkuna pukutë jawanchö kayanqanta+ y llapankuna lamarpa pasayanqanta.+
2 Llapankunam pukutë jawanchö kar, lamarpa pasar y Moiseswan juntu kar bautizashqa kayarqan.
3 Llapankunam Teyta Diospita chaskiyanqan mikuyllata mikuyarqan,+
4 y llapankunam Teyta Diospita chaskiyanqan yakullata upuyarqan.+ Awmi, Teyta Dios entreganqan pëkunata qatir ëwaq qaqapitam upuyarqan y tsë qaqaqa Cristutam rikätsikurqan.*+
5 Tsënö kaptimpis, cäsi llapanmi Teyta Diospa rikëninchö allitsu kayarqan, tsëmi tsunyaq sitiuchö wanuyarqan o wañuyarqan.+
6 Tsëkunaqa noqantsik yachakunapaqmi pasakurqan, tsënöpa pëkuna rurayanqannö mana allikunata mana munanapaq.+
7 Ama santukunata adorashuntsu, pëkunapita wakinkuna rurayanqannö, kënö nir qellqarëkanqannö: “Tsëpitanam llapankuna mikuyarqan, upuyarqan y kushikur qallëkuyarqan”.+
8 Ama oqllanakur melanëpaqkunata rurashuntsu,* pëkunapita wakinkuna oqllanakur melanëpaqkunata rurayanqannö,* tsëmi pëkunapita veintitres mil nunakuna juk junaqllachö wanuyarqan.+
9 Ama Teyta Jehoväta* pruëbaman churashuntsu,+ pëkunapita wakinkuna pruëbaman churayanqannö, pëkunaqa culebrakuna kaniyaptinmi wanuyarqan.+
10 Y ama quejakoq kashuntsu, pëkunapita wakinkuna quejakoq kayanqannö,+ pëkunataqa Teyta Diospa juk angelninmi wanutsirqan.*+
11 Tsëkunaqa pëkunata pasarqan noqantsik yachakunapaqmi,+ tsënöpa kanan witsanchö* kawaqkuna pëkunanö mana kanapaq.
12 Tsëmi alli shëkanqanta* pensaqqa mana ishkinampaq cuidakutsun.+
13 Wakin nunakunaman mana chanqan tentacionkunaqa manam qamkunaman chämushqatsu.+ Peru Teyta Diosqa confiakuypaqmi, y manam permitinqatsu aguantëta puëdiyanqëkipita masqa tentashqa kayänëkita,+ sinöqa tentacion chämuptinmi, tsëpita yarquyänëkipaq y aguantayänëkipaq yanapayäshunki.+
14 Tsëmi kuyë wawqikuna y panikuna, ama imëpis santukunata adorayëtsu.+
15 Noqaqa alli juiciuyoq nunatanömi parlapëkäyaq.* Kikikikuna rikäyë ninqäkuna alli o mana alli kanqanta.
16 Bendicinqantsik bendicion cöpapita upurqa, ¿manaku Cristupa yawarninta provechëkantsik?+ Pakinqantsik tantata mikurqa, ¿manaku Cristupa cuerpunta provechëkantsik?+
17 Juk tantallam kan, tsëmi noqantsik mëtsika karpis, llapantsik tsë jukllëlla tantata mikur, juk cuerpulla kantsik.+
18 Yarpäyë Israel nunakunata. ¿Manaku apayanqan qarëkunata mikoqkunaqa, Teyta Dioswan mikuykaq cuenta kayarqan?+
19 Tsëqa, ¿ima nitataq munëkä? ¿Juk santupaq apayanqan imapis kanqantaku? ¿O juk santu imapis kanqantaku?
20 Manam. Sinöqa juk nacion nunakuna apayanqan qarëkunaqa demoniukunapaq kanqanta, y Teyta Diospaq mana kanqantam nita munëkä;+ y manam munätsu demoniukunawan juntakäyänëkita.+
21 Manam Jehoväpa* cöpampita y demoniukunapa cöpampita upur këta puëdiyankitsu, y manam “Jehoväpa* mësampita”+ y demoniukunapa mësampita mikur këta puëdiyankitsu.
22 ¿O ‘Teyta Jehoväta* cöleratsitaku munëkantsik’?+ Noqantsikqa manam pëpita mas puëdeqtsu kantsik, ¿aw?
23 Llapampis allillam, peru manam llapantsu allipaq. Llapampis allillam, peru manam llapantsu alli kayänampaq wakinkunata yanapan.+
24 Ama pï nunapis biennimpaq kaqllata ashitsuntsu, sinöqa wakimpa biennimpaq kaqta ashitsun.+
25 Ëtsata rantikoqkuna rantikuyanqan ëtsataqa, concienciëkikunarëkur imatapis mana tapukurlla mikuyë.
26 “Teyta Jehoväpam* kë patsa, kë patsachö imëka kaqkunapis”.+
27 Mana creikoq nuna invitayäshuptiki ëwëta munarqa, concienciëkikunarëkur imatapis mana tapukurlla llapan sirwiyäshunqëkita mikuyë.
28 Peru pï nunapis, “këtaqa santukunapaqmi apayashqa” niyäshuptikiqa, niyäshoqnikirëkur y pitapis conciencian mana condenanampaq ama mikuyëtsu.+
29 Tsënö nirqa manam qamkunapa concienciëkikunapaqtsu parlëkä, sinöqa juknin nunapa concienciampaqmi. Awmi, ¿imanirtan libri kanqä juk nunapa conciencianrëkur juzgashqa kanman?+
30 Teyta Diosta agradecikur imatapis mikurqa, ¿imanirtan agradecikur mikunqäpita parlashqa käman?+
31 Tsëmi mikuykarpis, upuykarpis o imata rurëkarpis, Teyta Dios alabashqa kanampaq llapanta rurayë.+
32 Cuidädu kayë, judïukunapaq, griëgu nunakunapaq y Diospa congregacionninchö kaqkunapaq ishkitsikoq ruminö mana kayänëkipaq,+
33 noqa biennïpaq kaqllata mana ashinqänö, sinöqa salvakuyta puëdiyänampaq mëtsikaqpa bienninta ashinqänö,+ llapan nunakunata imëkachöpis kushitsita tïranqänö.+
Nötakuna
^ O “Cristum karqan”.
^ Rikäri “Bibliachö palabrakunata entiendinapaq” neqta.
^ Rikäri “Bibliachö palabrakunata entiendinapaq” neqta.
^ Griëgu idiömachöqa “ushakätsikoqpa makimpam wanuyarqan” ninmi.
^ O “imëkapis imanö këkanqampa ushananchö”. Rikäri “Bibliachö palabrakunata entiendinapaq” neqta.
^ Kënöpis niyanmi: ichirëkanqanta.
^ Kënöpis niyanmi: parlapëkä.
