1 Corintius 3:1-23
-
Corintuchö cristiänukuna wakinkunanöraq pensayan (1-4)
-
Teyta Diosmi winatsir sïguin (5-9)
-
Diospa yanapaqninkuna (9)
-
-
Nina mana ushakätsinqan kaqkunawan sharkatsinapaq (10-15)
-
“¿Manaku musyayanki Teyta Diospa templun kayanqëkita?” (16, 17)
-
Nunakuna yachayanqanqa, Diospaqqa manam imapaqpis välintsu (18-23)
3 Tsëmi wawqikuna y panikuna, qamkunataqa santu espïritu pushanqan nunakunatanö parlapëta puëdirqätsu,+ sinöqa kë munduchö nunakunanö pensaqkunatanömi, awmi, Cristuta qatichö llullu wamranöraq këkaqkunatanö.+
2 Manaraq fuerti kayaptikim, chukru mikuyta qarayänaqpa rantin lichita qarayarqaq. Awmi, kanampis manaran fuertiraqtsu këkäyanki.+
3 Qamkunaqa nunakunanöran pensëkäyanki.+ Chikinakur y pleytur karqa, ¿manaku nunakunanö pensëkäyanki,+ y manaku nunakunanö portakuykäyanki?
4 Jukniki “noqaqa Pablupa qateqninmi kä” nir, y juknikikunana “noqaqa Apöluspa qateqninmi kä”+ nirqa, ¿manaku wakin nunakunanölla portakuykäyanki?
5 ¿Imatan Apölusqa? ¿Imatan Pabluqa? Pëkunaqa cada ünuta Señor permitinqannömi,+ creikoq tikrayänëkipaq yanapayäshoqnikikuna kayan.
6 Noqam plantarqä,+ Apölusmi regarqan,+ peru Diosmi winatsir sïguirqan.
7 Tsëmi plantaqpis ni regaqpis alabashqatsu kayan, sinöqa winatseq Teyta Diosmi.+
8 Tsënö kaptimpis, plantaqpis y regaqpis juknöllam kayan, peru cada nunam ruranqanmannö premiuta chaskinqa.+
9 Noqakunaqa Teyta Diospa yanapaqninkunam kayä. Qamkunaqa kikin trabajëkanqan Teyta Diospa chakranmi kayanki, awmi, Teyta Diospa wayinmi kayanki.+
10 Teyta Dios noqawan alläpa alli kanqannömi, noqaqa alli yachaq obra ruraq maestrunö* cimientuta churarqä,+ peru jukmi tsë cimientu jananchö rurëkan. Tsë cimientu jananchö imanö rurëkanqanta, cada nuna alli rikätsun.
11 Cimientu churashqana këkaptinqa, manam pï nunapis juk cimientuta churëta puëdinnatsu, tsë cimientuqa Jesucristum.+
12 Peru tsë cimientu jananchömi sïqa pï nunapis, öruwan, plätawan y alläpa shumaq rumikunawan kar o qeruwan, oqshawan y päjawan karpis rurëta puëdin.
13 Tsëpitanam cada ünu imapita ruranqanqa cläru rikakunqa. Imanö kanqantaqa ninam rikätsikunqa y tsëqa pruëba junaqmi rikakunqa.+ Awmi, ninam rikätsikunqa cada ünu imanö sharkatsishqa kanqanta.
14 Juk nuna cimientu jananchö sharkatsinqan alli tsarakuptinqa, premiutam chaskinqa.
15 Peru juk nuna ruranqan ninawan ushakaptinqa, llapantam oqranqa, peru kikinqa salvakunqam; tsënö kaptimpis ninapita salvakoqnömi salvakunqa.
16 ¿Manaku musyayanki Teyta Diospa templun kayanqëkita,+ y Diospa santu espïritun qamkunachö këkanqanta?+
17 Diospa templunta ushakätseq nunataqa, kikin Teyta Diosmi ushakätsinqa. Diospa templunqa sagrädum, y qamkunam tsë templu kayanki.+
18 Ama pï nunapis kikin engañakutsuntsu: mëqëkipis kë munduchö nunakunapa rikëninchö yachaq kayanqëkita pensarqa, rasumpa yachaq kayänëkipaq mana yachaqnö kayë.
19 Kë munduchö nunakuna yachayanqanqa, Diospaqqa manam imapaqpis välintsu. Awmi, kënö nirmi qellqarëkan: “Pëqa yachëyoq nunakunatam yachayanqankunawan ishkitsin”.+
20 Kënöpis qellqarëkanmi: “Teyta Jehoväqa* musyanmi yachaq nunakuna pensayanqanqa mana imapaq sirwinqanta”.+
21 Llapan imëkapis qamkunapam, tsëmi pï nunapis nunakuna rurëta puëdiyanqampita alabakutsuntsu.
22 Pablupis, Apöluspis, Cëfaspis,*+ kë mundupis, kawëpis, wanuypis, kanan witsan kaqkunapis o shamoq tiempuchö kanampaq kaqkunapis, llapanmi qamkunapa.
23 Tsënöllam qamkunapis Cristupa kayanki,+ y Cristunam Diospa.
