1 Corintius 4:1-21
4 Llapan nunakunapis Cristupa yanapaqninkunatanö* y Diospa pakarëkaq sagrädu noticianta rikaq encargädutanömi rikäyämänan.+
2 Kë asuntuchöqa, encargädukunapitaqa shuyaräyan confiakuypaq kayänantam.
3 Qamkuna juzgayämänëkita o nunakuna patsätsiyanqan cortichö kaqkuna juzgamänampaq kaqtaqa, manam noqaqa cuentapaq churätsu. Rasumpa kaqchöqa, manam kikïpis juzgakütsu.
4 Noqaqa limpiu concienciäyoqmi këkä, peru manam tsërëkurtsu allita ruraqnö rikashqa këkä. Noqata juzgamaqqa Jehovämi.*+
5 Tsëmi Señor shamunqanyaq, manaraq dispunishqa tiempunchöqa ama imatapis juzgayëtsu.+ Pëqa ampichö o tsakëchö* pakarëkaqkunamanmi aktsita atsikyätsinqa, y nunakuna shonqunkunachö imata pensayanqantam rikätsikunqa. Tsënam cada ünu Teyta Diospita alabashqa këta chaskinqa.+
6 Wawqikuna y panikuna, tsëkunataqa qamkunapa biennikikunapaqmi noqapaq y Apöluspaq+ parlar nirqö, tsënöpa noqakunapita këta yachakuyänëkipaq: “Qellqarëkaqchö ninqampita mastaqa ama rurayëtsu”. Tsënöpa mana allish tukuyänëkipaq+ y jukpa biennin yarqur jukpa contran mana kayänëkipaq.
7 ¿Pitan wakimpita jukläyata tikratsishunki? Rasumpa kaqchöqa, ¿ima kapushunqëkitataq chaskirqunkitsu?+ Tsëqa, chaskishqa këkarqa, ¿imanirtan mana chaskishqanö allish tukunki?
8 ¿Llapan wanayanqëkinaku* kayäpushunki? ¿Rïcunaku kayanki? ¿Mana noqakunawanku* gobernar qallëkuyarqunki?+ Mëna gobernar qallayankiman karqan, tsënöpa noqakunapis qamkunawan juntu gobernayänäpaq.+
9 Noqakuna apostol kaqkunataqa, noqapitaqa llapankunapa rikëninman ultimuta jipiyanqan wanutsiyänampaq condenashqa kaqkunatanömi+ Teyta Dios churayämashqa. Awmi kë munduchöqa, angelkunapaq y nunakunapaqpis, actuacionman yarqoqkunanömi tikrayarqö.+
10 Noqakunaqa Cristurëkurmi upanö kayä,+ peru qamkunaqa Cristurëkurmi alli juiciuyoq kayanki; noqakunaqa kallpannaqmi kayä, peru qamkunaqa fuertim kayanki; qamkunaqa respetashqam kayanki, peru noqakunaqa despreciashqam kayä.
11 Kanan hörayaqmi mallaqar+ y yakunar këkäyä,+ manam röpäkunapis atskatsu,* maqarmi ushayäman,*+ wayinnaqmi këkäyä
12 y kikïkunam alli trabajayä.+ Insultayämaqkunatapis,+ bendiciyämi; imëkata rurar sufritsiyämaptimpis, pacienciawanmi alli tsarakuyä;+
13 mana kaqpita calumniayämaptimpis, shumaqmi contestayä.+ Kananyaqmi nunakunapaqqa basüra cuenta kayä, llapan imëkapita mana sirweq kaqkuna.
14 Manam penqakatsiyänaqpaqtsu këkunataqa qellqëkämü, sinöqa kuyë tsurïkunatanö consejayänaqpaqmi.
15 Cristupa qateqninkunachö diez mil cuidayäshoqnikikuna* kaptimpis, manam atskaq papäkunayoqtsu kayanki. Awmi, Cristu Jesuswan juknölla karmi alli noticiakunarëkur papänikikuna tikrarqö.+
16 Tsëmi qamkunata rogayaq noqanö këta tïrayänëkipaq.+
17 Kuyë tsurï kaptin y Señorta sirwir confiakuypaq kaptinmi, Timoteuta qamkunaman mandëkämü. Pëmi Cristu Jesuspa kaqchö imatapis imanö ruranqäta yarpätsiyäshunki,+ noqapis mëtsëchö congregacionkuna kanqanchö tsëta rurar këkanqänö.
18 Qamkunaman mana shamunä kaptinnömi, wakinkunaqa allish tukur këkäyan.
19 Peru Jehovä* munaptinqa ichikllachönam qamkunaman shamushaq, y tsëchömi musyarishaq allish tukur parlayanqanta defendita o mana defendita puëdiyanqanta.
20 Diospa Gobiernunta cäsukoq kanqantsikqa manam parlanqantsikchötsu rikakun sinöqa ruranqantsikchömi. Awmi, tsëkunam rikätsikun Diospa poderninta chaskinqantsikta.
21 ¿Imatataq munayanki? ¿Tukruwan shamunätaku+ o kuyakoq y yachanëpaq kanätaku?
Nötakuna
^ O “mandädunchö këkaqkunatanö”.
^ Kënöpis niyanmi: tutapëchö.
^ Kënöpis niyanmi: necesitäyanqëkinaku.
^ O “japallëkikunallaku”.
^ Griëgu idiömachöqa “qalapächum këkäyä” ninmi.
^ O “mana allim tratayäman”.
^ O “yachatsiyäshoqnikikuna”.
