1 Corintius 5:1-13
5 Rasumpa kaqchöqa, qamkunachö oqllanakur melanëpaqkunata rurëkäyanqantam* willayämashqa,+ tsënö oqllanakur melanëpaq rurëtaqa* manam mana creikoqkunapis* rurayantsu: juk nunash papänimpa warminwan kawëkan.+
2 ¿Kushishqaku këkäyanki qamkunachö tsë mana alli rurë kanqampita? ¿Manaku llakishqa këkäyankiman?+ ¿Manaku tsë mana allita ruraq nunata qamkunapita qarquyankiman?+
3 Noqa qamkunawan mana këkarpis, pensënïchöqa* qamkunawanmi këkä, y qamkunawan këkaqnömi tsëta ruraq nunata juzgarqöna.
4 Qamkuna Señornintsik Jesuspa jutinchö juntakarqa, pensënïchö* y Señornintsik Jesuspa poderninwan qamkunawan këkanqäta musyar
5 tsë nunata Satanasta entregayë,+ tsënöpa tsë nunapa muyakoq* mana alli rurëninta ushakätsiyänëkipaq, y congregacionchö kaqkuna juknölla pensayanqan Señorpa junaqninchö salvashqa kanampaq.+
6 Manam allitsu alabakur këkäyanqëki. ¿Manaku musyayanki wallka levadüralla llapan masata poquratsinqanta?+
7 Mana poqushqa mushoq masa kayänëkipaq, levadürayoq këkaq unë masata jitayë. Rasumpa kaqchöqa, Pascua Fiestapaq pishtana orqu* üshantsik+ Cristuqa qarënömi wanushqa o wañushqa.+
8 Tsëqa ama levadürayoq unë masawan ni jutsata* y mana alli rurëkunata rikätsikoq levadürawanqa fiestata rurashuntsu.+ Sinöqa alli kaqta y rasumpa kaqta rikätsikoq levadürannaq tantallata mikushun.
9 Cartäta qellqamurmi, oqllanakur melanëpaqkunata ruraq* nunakunawan juntakuyta* dejayänëkipaq niyarqaq.*
10 Tsënö nirqa manam kë munduchö oqllanakur melanëpaqkunata ruraq* nunakunawan, imëkatapis ërayëpa munaqkunawan, suwakoqkunawan, santukunata adoraqkunawan mana juntakuyänëkipaqtsu niyarqaq.*+ Tsënö kanan kaptinqa, kë munduchö nunakunapitachi rakikäkuriyankiman.+
11 Peru kananqa qamkunaman qellqëkämü, pï nunapis creikoq mayikikuna kanqanta nikar, oqllanakur melanëpaqkunata ruraptin,* imëkatapis ërayëpa munaptin,+ santukunata adoraptin, y insultakoq, machakoq+ o suwakoq kaptinqa+ pëwan manana juntakuyänëkipaqmi.*+ Tsë nunawanqa ama juntu mikuyëllapistsu.
12 ¿Imanirtan noqaqa mana creikoq kaqkunata juzgäman? ¿Manaku qamkuna creikoq kaqkunata juzgayanki,
13 y Teyta Diosna mana creikoq kaqkunata juzgan?+ “Qamkunachö këkaq mana allita ruraq nunata qarquyë”.+
Nötakuna
^ O “juk nacion nunakunapis”.
^ Griëgu idiömachö: pornëia. Rikäri “Bibliachö palabrakunata entiendinapaq” neqta.
^ Griëgu idiömachö: pornëia. Rikäri “Bibliachö palabrakunata entiendinapaq” neqta.
^ Griëgu idiömachöqa “espïrituchöqa” ninmi.
^ Griëgu idiömachöqa “espïrituchö” ninmi.
^ Kënöpis niyanmi: shukukoq.
^ Kënöpis niyanmi: mächu.
^ Kënöpis niyanmi: pecäduta.
^ Rikäri “Bibliachö palabrakunata entiendinapaq” neqta.
^ O “amïgu këta”.
^ Kënöpis niyanmi: nirqä.
^ Rikäri “Bibliachö palabrakunata entiendinapaq” neqta.
^ Kënöpis niyanmi: nirqä.
^ Rikäri “Bibliachö palabrakunata entiendinapaq” neqta.
^ O “amïgu kayänëkipaqmi”.
