1 Samuel 11:1-15
11 Jabes+ markachö täkoqkunawan* pelyanampaqmi, ammonïta+ nunakunapa gobernantin Nahasqa soldädunkunawan Galaadchö campamentunkuna rurayarqan. Tsëmi Jabes markapita ollqukunaqa Nahasta niyarqan: “Mana wanutsiyämänëkipaq o wañutsiyämänëkipaq acuerduta rurashun, tsëqa sirwishoqnikikunam kayäshaq”.
2 Tsënam ammonïta nunakunapa gobernantin Nahasqa nirqan: “Acuerdutaqa rurashunmi, peru imam sïqa derëcha kaq nawikikunatam jipiramushaq. Tsëran israelïtakunaqa penqakuychö quedayanqa”.
3 Jabes markachö dirigentikunaqa kënömi niyarqan: “Entëru Israelpam willakoqkunata mandayäshaq, tsëyaq qanchis junaqkuna shuyëkayämë. Y pillapis salvayämänampaq mana kaptinqa sirwiyashqëkim”.
4 Tsëmi willakoqkunaqa, Saulpa Guibeä+ markanman chärir llapankunata willayarqan, tsënam llapan nunakuna mantsakar alläpa waqayarqan.
5 Saulnam chakrapita wäkankunawan chärir, “¿imanirtan llapankuna waqëkäyan? ¿Imatan pasakushqa?” nir nunakunata tapurqan. Tsëmi Jabes markapita nunakuna niyanqanta willayarqan.
6 Tsëta Saul musyariptinmi Teyta Diospa podernin yanapar qallëkurqan,+ tsëmi willayanqanta wiyarir alläpa cölerakurqan.
7 Y ishkë töruta atskaman roqukacharkurmi, willakoqkunatawan entëru Israel markakunapa apatsirqan. Y kënö nir willakuyänampaqmi mandarqan: “Saultawan Samuelta mana yanapaq kaqkunapataqa kënömi wäkankunata roqukacharkushaq”. Jehovä Diosqa israelïtakuna mantsakäyänantam* permitirqan, tsëmi llapankuna juntakarkur yanapaq ëwayarqan.*
8 Tsënam Saulqa Bëzec sitiuchö llapan ëwaqkunata yuparqan, Israelpitam trescientus mil kayarqan y Judäpitanam treinta mil kayarqan.
9 Jabes markapita willakoq ëwashqakunatam niyarqan: “Jabeschö täkoqkunata* willayë, warë pullan junaqpaqmi salvayäshaq”. Tsënam willakoqkunaqa ëwarnin willakuyarqan, y Jabes markachö täkoqkunaqa alläpam kushikuyarqan.
10 Tsënam Jabes markapita ollqukunaqa ammonïta soldädukunata kënö niyarqan: “Warëmi sirwishoqnikikuna tikrayäshaq, y munayanqëkita imatapis rurëkayämë”.+
11 Waräninnam Saulqa llapan nunakunata kima grüpuman rakirqan. Madrugädam* ammonïta+ soldädukunapa campamentunkunaman illaqpita yëkuyarqan, y pullan junaqyaqmi mëtsikaqta wanutsiyarqan. Mana wanutsiyanqan kaqkunaqa mëtsëpam japallankunalla qeshpir ëwakuyarqan.
12 Tsënam nunakunaqa Samuelta kënö niyarqan: “¿Pikunataq munayarqantsu Saul gobernamaqnintsik kananta?+ Këman apayämutsun wanutsiyänäpaq”.
13 Saulnam nirqan: “Jehovä Diosmi kanan junaqqa Israelta salvashqa, y manam pitapis wanutsishuntsu”.+
14 Tsëpitanam Samuelqa llapankunata nirqan: “Guilgal+ markata ëwashun gobernamaqnintsik kanampaq Saulta yapë churanantsikpaq”.+
15 Tsëmi llapan israelïtakuna Guilgal markata ëwayarqan, tsëchömi Teyta Jehoväpa rikëninchö Saulta gobernantinkuna kanampaq churayarqan. Y Jehovä Dioswan amïgu kayanqanta rikätsikurmi+ pishtashqa animalkunata rupatsiyarqan. Saulwan israelïtakunaqa alläpam kushikuyarqan.+
Nötakuna
^ Kënöpis niyanmi: täraqkunawan; päraqkunawan.
^ Rikäri “Bibliachö palabrakunata entiendinapaq” neqta.
^ Hebreu idiömachöqa “juk yarpëlla” ninmi.
^ Kënöpis niyanmi: täraqkunata; päraqkunata.
^ Tsëqa, 2 de la mañänapita 6 de la mañänayaqmi karqan.
