1 Samuel 15:1-35
15 Samuelnam Saulta nirqan: “Jehovä Dios nimaptinmi, Israel nacionpa+ gobernaqnin kanëkipaq qamta akrarqaq. Y kananmi musyatsishqëki Teyta Jehovä qampaq imata ninqanta.+
2 Angelkunata mandaq Jehovä Diosmi kënö nin: ‘Egiptupita yarqayämuptin israelïtakunawan pelyayanqampitam,+ amalequïta nunakunata cuentata mañashaq.
3 Tsëmi amalequïta+ nunakunaman ëwarnin llapan cösasninkunata ushakätsinëki.+ Y ollqukunata, warmikunata, wamrakunata y llullukunatapis wanutsinëkim.+ Tsënöllam törunkunata, üshankunata, camëllunkunata y ashnunkunatapis llapanta ushakätsinëki’”.+
4 Tsënam Saulqa soldädukunata qayatsirqan y Teläim sitiuchömi ëka kayanqanta yuparqan. Doscientus mil soldädukunam kayarqan, y Judäpitanam+ diez mil soldädukuna kayarqan.
5 Tsëpitanam Saulqa, llapan soldädunkunawan ëwarqan Amalec markapa amänunman, y illaqpita atacayänampaqmi yaku ëwanan sanjakunaman churanakuyarqan.
6 Tsëpitanam Saulqa quenïta+ nunakunata nirqan: “Qamkunaqa llakiparmi* Egiptupita israelïtakuna+ yarqayämuptin yanapayarqëki. Tsëmi kananqa, amalequïta nunakunawan juntu mana ushakäyänëkipaq këpita ëwakuyänëki”.+ Tsënö niptinmi quenïtakunaqa ëwakuyarqan.
7 Tsëpitanam Saulqa soldädunkunawan Haviläpita,+ Egiptupa lädunchö këkaq Sur+ sitiuyaq amalequïta+ nunakunata ushakätsiyarqan.
8 Llapankunatam espädawan wanutsiyarqan. Peru amalequïtakunapa+ gobernaqnin Agagtaqa+ kawëkaqtam prësuyarqan.
9 Saulwan soldädunkunaqa amalequïtakunapa gobernantin Agagtam kawëkaqta dejariyarqan. Y manam ushakätsiyarqantsu mas wira* kaq animalninkunata, mas allin kaq üshankunata, mas allin kaq wäkankunata ni llapan väleq cösasninkunatapis.+ Peru mana munayanqan y mana sirweq cösaskunataqa llapantam ushakätsiyarqan.
10 Tsëpitanam Jehovä Diosqa Samuelta nirqan:
11 “¡Imapaqraq israelïtakunata gobernanampaq Saulta churarqä! Pëqa munëninta rurakurmi llapan ninqäkunata cäsumashqatsu”.+ Tsënam Samuelqa alläpa llakikurnin Jehovä Diosman tsë paqas rogakurqan.+
12 Waräninnam Samuelqa tempränulla ëwarqan Saulwan parlanampaq. Chäriptinnam kënö willayarqan: “Saulqa Carmëlu+ markatam ëwakushqa y tsëchömi kikinta yarpäyänampaq juk jatun wanka rumita* shätsishqa.*+ Tsëpitanam Guilgal markata pasakushqa”.
13 Saulta ashirnin Samuel chäriptinnam, Saulqa nirqan: “Jehovä Dios bendicïkushuy, Jehovä llapan ninqantam cäsukurqö”.
14 Tsënam Samuelqa tapurqan: “Tsëqa, ¿imanirtaq wiyëkä üshakuna y wäkakuna këchö waqëkaqta?”.+
15 Saulnam nirqan: “Animalkunaqa amalequïta nunakunapam kashqa. Soldädükunam apayämushqa mas allin kaq üshakunata y wäkakunata Jehovä Diosnintsikpaq rupatsinapaq. Peru wakin cösaskunataqa llapantam ushakätsiyarqö”.
16 Samuelnam Saulta nirqan: “¡Upällana kë! Kanan paqas Jehovä Dios nimanqantam willashqëki”.+ Y Saulnam “willamë ari” nirqan.
17 Tsënam Samuelqa kënö nirqan: “Yarpankiku israelïtakunapa gobernaqnin+ kanëkipaq Jehovä Dios churashuptiki, ¿alli shonquykiwan chaskikunqëkita?+
18 Teyta Jehoväqa mandashurqëki kënö nirmi: ‘Tsë jutsasapa* amalequïta+ nunakunataqa llapanta ushakätsi’.+
19 Tsënö nikäshuptikiqa, ¿imanirtaq Jehovä Dios nishunqëkita cäsukurqëkitsu? ¿Imanirtaq munënikita rurarnin amalequïta nunakunapa cösasninkunata apamurqunki?+ ¡Tsëta ruranqëkiqa manam Jehovä Diospaq allitsu kashqa!”.
20 Tsënam Saulqa Samuelta kënö nirqan: “¡Jehovä Dios nimanqantam rurarqö! Jehovä mandamanqanta cäsukurmi, llapan amalequïta+ nunakunata ushakäratsir gobernaqnin Agagtapis këman apamurqö.
21 Y allin kaq üshakunata y wäkakunataqa ushakätsiyänampa rantinmi soldädukuna apayämushqa. Tsëkunatam Guilgal+ markachö Jehovä Diospaq rupatsiyänan karqan”.
22 Tsënam Samuelqa nirqan: “¿Ima ruranqantsiktaq Jehovä Diospaqqa mas alli? ¿Animalkunata pishtëkur rupatsinqantsikku+ o Teyta Jehovä ninqanta cäsukunqantsikku? Clärum këkan, animalkunata pishtëkur rupatsinqantsikpitaqa wiyakoq kanqantsikmi mas alliqa,+ y üshakunapa wirankunata+ rupatsinqantsikpitaqa cäsukoq kanqantsikmi mas alliqa.
23 Teyta Diosta mana cäsukuyqa,+ suertita qatitsikuyanqan+ jutsa* cuentam. Y munënintsikta rurëqa, brüjukuna rurayanqanta rurënö y santukunata* adorënömi. Tsëmi Jehovä Dios ninqanta mana cäsukushqa kaptiki,+ pëpis munannatsu israelïtakunapa gobernaqnin kanëkita”.+
24 Tsënam Saulqa Samuelta nirqan: “Jutsallakurqömi,* nunakunata mantsarmi niyämanqanta rurarqö, y manam Jehovä Dios ninqanta ni qam nimanqëkita cäsukurqötsu.
25 Kananqa jutsäpita* perdonëkallämë y kutikushun Teyta Jehoväta adoranapaq”.+
26 Tsënam Samuelqa Saulta nirqan: “Manam qamwanqa kutishaqtsu, qamqa manam Jehovä Dios ninqanta cäsukurqunkitsu. Tsëmi Jehoväqa Israel nacionpa gobernaqnin kanëkita munannatsu”.+
27 Tsënö nir ëwakunampaq Samuel tumariptinmi, Saulqa röpampa* ura kuchumpita achkurkurqan, y röpampa kuchunmi rachiskirqan.
28 Tsënam Samuelqa nirqan: “Imanöllam kë röpa rachirishqa, tsënömi qamtapis Jehovä Dios Israelta gobernanqëkipita qarqushunki. Y qampita juk mas alli gobernaqtam churanqa.+
29 Israelïtakunapa Puëdeq Diosninqa+ llapan ninqankunatam cumplimunqa,+ pëqa manam nunatsu parlanqanta mana cumplinampaq”.+
30 Tsënam Saulqa nirqan: “Awmi, jutsallakurqömi.* Peru dirigentikunapa puntanchö y llapan israelïtakunapa puntanchöqa ama penqakatsimëtsu. Ishkantsik kutishun Jehovä Diosta adoranäpaq”.+
31 Tsënam Samuelqa Saulpa qepanta kutirqan, tsëpitanam Saulqa Jehovä Diosta adorarqan.
32 Samuelnam nirqan: “Amalequïtakunapa gobernaqnin Agagta apayämuy”. Tsënam Agagqa mana munëkar ëwarqan, y kënömi pensëkarqan: “Manam imanayämanqanatsu* ni wanutsiyämanqanatsu”.
33 Tsënam Samuelqa kënö nirqan: “Imanömi mamankuna waqayarqan wamrankunata espadëkiwan wanutsiptiki, tsënöllam mamëkipis kanan waqanqa qam wanuptiki”. Tsënö nirmi Samuelqa, Guilgal+ markachö Jehovä Diospa rikëninchö Agagta pedäzu pedäzu roqukacharkurqan.
34 Tsëpitanam Samuelqa Ramä markanta kutikurqan, y Saulnam Guibeächö wayinman kutikurqan.
35 Tsë junaqpitam Samuelqa Saulwan rikänakuyarqannatsu. Y mana cäsukoq kanqampitam Saulpaq alläpa llakikurqan.+ Teyta Jehoväpis alläpam llakikurqan Saulta Israelpa gobernaqnin churanqampita.+
Nötakuna
^ Kënöpis niyanmi: ankuparmi; kuyaparmi.
^ Kënöpis niyanmi: wera.
^ O “monumentuta”.
^ Kënöpis niyanmi: ichïtsishqa.
^ Kënöpis niyanmi: pecädu ruraq.
^ Kënöpis niyanmi: pecädu.
^ Hebreu idiömachöqa “terafimkunata” ninmi.
^ Kënöpis niyanmi: Pecädutam rurarqö.
^ Kënöpis niyanmi: pecädüpita.
^ O “mangannaq röpampa”.
^ Kënöpis niyanmi: pecädutam rurarqö.
^ Hebreu idiömachöqa “qayapäyämanqanatsu” ninmi.