1 Samuel 19:1-24
19 Tsëpitanam Saulqa tsurin Jonatanta y sirweqninkunata willarqan Davidta wanutsita munanqanta.+
2 Peru Jonatanqa Davidta kuyarqanmi,+ tsëmi kënö willarqan: “Papänï Saulqa wanutsishunëkipaqmi ashikäshunki, cuidakuy. Warëqa mana tarishunëkipaq patsa warariptin mëllamampis ratakunki o tsinkakunki* y tsëchö quedakunki.
3 Noqaqa këkanqëki lädupam papänïwan parlakoq shayämushaq. Y pëpaq allikunata ruranqëkitam parlapäshaq, y ima nimanqantapis willashqëkim”.+
4 Tsëmi Jonatanqa, papäninta Davidpaq kënö nir parlaparqan:+ “¿Imanirtan sirwishoqniki Davidta wanutsita munanki? Pëqa manam imanashurqunkitsu. Imëkachöpis yanapashurqunkim.
5 Yarpë, Goliat* wanuratsinanta musyëkarpis,+ Davidqa mana mantsëpam wanuratsirqan. Tsënöpam israelïtakunata Jehovä Dios yanaparqan filisteu soldädukunata venciyänampaq. Tsëta rikëkurqa alläpam kushikurqëki. Tsënö këkaptinqa, ¿imanirtan culpannaq nunata wanutsita munanki? Davidqa manam imatapis mana allitaqa rurashqatsu, pëta wanutsirqa jutsatam* ruranki”.+
6 Tsënam Saulqa tsurin Jonatan ninqanta cäsurnin kënö nir änikurqan: “Manam Davidta wanutsishaqtsu, ninqätaqa Jehovä Diospis wiyëkanmi”.
7 Tsëpitanam Jonatanqa Davidta qayëkur, papäninwan llapan parlayanqanta willarqan. Y Saulmanmi pusharqan, tsëchömi Davidqa puntatanö sirwirqan.+
8 Tiempuwannam israelïtakunaqa filisteu soldädukunawan yapë pelyayarqan. Davidqa mëtsikaqtam wanutsirqan, tsëmi filisteukunaqa qeshpir ëwakuyarqan.
9 Juk kutinam Saulqa, Jehovä Dios manana yanapaptin mana allikunata pensar qallëkurqan.+ Saulqa lanzan aptashqam wayinchö këkarqan y Davidnam arpata toquëkarqan.+
10 Tsënam Saulqa Davidta lanzawan wanutsita munarqan, peru David witiskiptinmi lanzaqa perqaman clavakärirqan. Davidqa tsë paqasmi qeshpir ëwakurqan.
11 Tsëpitanam Saulqa, David qeshpir mana ëwakunampaq sirweqninkunata mandarqan wayinta cuidayänampaq, tsënöpa waränin tempränulla wanutsiyänampaq.+ Peru warmin Micalmi Davidta nirqan: “Kanan paqas mana ëwakuptikiqa, warëqa wanuratsiyäshunkim”.
12 Tsë höram Micalqa Davidta yanaparqan ventänallapa yarquskir qeshpir ëwakunampaq.
13 Tsëpitanam Micalqa Davidpa cämanman santuta* churarkurqan, y cabrapa aqtsanta shumaq jawnarkatsirmi juk mantawan qatarkurqan.
14 Saul mandanqan sirweqninkuna Davidta prësoq chäriyaptinnam Micalqa, “qeshyëkanmi” nirqan.
15 Tsëta willayaptinnam Saulqa, “cämantawan apayämuy wanuratsinäpaq” nir sirweqninkunata yapë mandarqan.+
16 Y Davidpa wayinman sirweqninkuna kutirnam, rikäriyarqan cabrapa aqtsanta jawnapäkushqa cämanchö santu* piturëkaqta.
17 Tsënam Saulqa Micalta tapurqan: “¿Imanirtaq rasumpa kaqta nimarqunkitsu? ¿Imanirtaq ëwakunanta dejarqunki?”.+ Micalnam nirqan: “‘Ëwakunäta mana dejamaptikiqa wanutsishqëkim’ nimarqanmi”.
18 Davidqa qeshpir ëwakurmi Ramä+ markachö Samuel kaqman charqan, y wanutsita munar Saul imëkata ruranqantam willarqan. Tsëpitanam Nayot sitiuta ishkan ëwakuyarqan.+
19 Tiempu pasariptinnam, Saulta willayarqan Ramä markapa Nayot sitiunchö David këkanqanta.
20 Tsë höram Saulqa sirweqninkunata mandarqan Davidta prësuyänampaq. Y chärirmi rikäyarqan Diospa mas awkinna willakoqninkuna Teyta Diospita parlëkäyanqanta y Samuel dirigikanqanta. Tsë höram pëkunatapis Teyta Dios poderninwan yanaparqan, tsëmi Diospa willakoqninkunanö parlar qallëkuyarqan.
21 Tsëta musyëkurmi Saulqa yapë mas sirweqninkunata mandarqan, y pëkunapis Diospa willakoqninkunanömi parlar qallëkuyarqan. Saulqa yapëmi mas sirweqninkunata mandarqan, y pëkunapis Diospa willakoqninkunanömi parlar qallëkuyarqan.
22 Tsëpitanam Ramä markaman kikin Saul ëwarqan. Y Secü sitiuchö jatun pözuman chëkurmi, “¿mëchötan Samuelwan David këkäyan?” nir tapukurqan. Tsënam, “Ramächö këkaq Nayot+ sitiuchömi këkäyan” nir willayarqan.
23 Nayot sitiuman ëwëkaptinmi pëtapis Teyta Dios poderninwan yanaparqan, tsëmi Nayot sitiuman chanqanyaq Diospa willakoqninkunanö parlarëkar ëwarqan.
24 Y Saulpis wakinkunanömi röpanta jipikurqan, y Samuelpa puntanchömi Diospa willakoqninnö parlarqan. Tsë junaq y tsë paqasqa röpannaqmi* patsachö jitaräkurqan. Tsë pasanqanta rikarmi, “¿Saulpis Diospa willakoqninnaku tikrashqa?” nir parlayaq.+
Nötakuna
^ Kënöpis niyanmi: illaririnki; pakakunki.
^ Hebreu idiömachöqa “filisteu” ninmi.
^ Kënöpis niyanmi: pecädutam.
^ Hebreu idiömachöqa “terafimta” ninmi.
^ Hebreu idiömachöqa “terafim” ninmi.
^ O “rurinkaq taksha röpanllawanmi”.
