1 Samuel 20:1-42
-
Davidta Jonatan dejantsu (1-42)
20 Tsëpitanam Davidqa Ramä markachö këkaq Nayot sitiupita qeshpir ëwakurqan. Y Jonatan kaqman chëkurnam kënö tapurqan: “¿Papänikitaqa imanarqötan wanutsimëta munanampaq?+ ¿Ima jutsatataq* rurëkurqö?”.
2 Jonatannam nirqan: “¡Manam wanutsishunkitsu! ¡Ama yarpachakuytsu!+ Papänïqa manam imatapis rurantsu noqata mana willamarqa, y kë asuntutapis willamanqam”.
3 Y Davidnam nirqan: “Papänikiqa musyanmi amïgu kanqantsikta.+ Tsëta musyëkarqa, ‘kë asuntutaqa ama Jonatanta musyatsishaqtsu mana llakikunampaq’ nirmi willashunkitsu. ¡Imë höra karpis wanutsiyämanqam! Y tsëtaqa rasumpam nikaq. Jehovä Diospis y qampis musyayankim papäniki wanutsimänampaqna këkanqanta”.+
4 Tsënam Jonatanqa, “llapan nimanqëkitam ruramushaq” nirqan Davidta.
5 Y Davidnam Jonatanta kënö nirqan: “Warëqa llullu killam kanqa,+ y Israelpa gobernaqninqa shuyarämanqa juntu mikuyänäpaqmi. Tsënö kaptimpis, noqaqa washa chakratam ëwashaq y tsëchömi mana rikäyämänampaq warätin* tardiyaq kashaq.
6 Papäniki noqapaq tapukuptinqa kënö ninki: ‘Llapan familianshi cada wata rurayanqannö Belen+ markachö pishtashqa animalkunata Diosnintsikpaq rupatsiyanqa, tsëmi urgenti kaptin rogamashqa ëwanampaq’.+
7 Papäniki, ‘allim’ niptinqa manam imapis pasamanqatsu, peru cölerakuptinqa clärum musyanki wanutsimëta munanqanta.
8 Alläpa kuyakoq kar llakipëkamë.*+ Jehovä Dios wiyëkaptinmi acuerduta rurarqantsik,+ tsëtaqa imëpis cumplinëkim.* Ima jutsatapis*+ rurashqa kaptïqa qam wanuykatsimë, peru papänikimanqa ama apëkamëtsu”.
9 Tsënam Jonatanqa nirqan: “¡Ama tsënöqa nimëtsu! Papänï wanutsishuynikita munaptinqa, noqaqa rasumpam willashqëki”.+
10 Davidnam, “¿piraq willamanqa papäniki cölerakuptinqa?” nirqan Jonatanta.
11 Jonatanqa, “aku ëwashun washa chakrapa” nirmi Davidta pusharqan.
12 Tsënam Jonatanqa Davidta kënö nirqan: “Kë hörakunanömi warë o warätin kar papänï ima pensanqanta musyamushaq. Y qampaq allita pensaptinqa pita karpis willashunëkipaqmi mandamushaq. Kë ninqätaqa Israelpa Diosnin Jehoväqa wiyëkanmi.
13 Papänï wanutsishunëkipaq kaqta musyëkarnin, qeshpir ëwakunëkipaq mana willapteqqa Teyta Jehovä castiguëkamätsun. Papänïta+ unë yanapanqannölla, qamtapis Jehovä yanapëkushuy.+
14 ¿Qampis manatsuraq kanan kawëkaptï o wanukuptïpis Jehovä Dios alläpa kuyakoq kanqannö kuyamanki?+
15 Llapan chikiyäshoqnikita Jehovä Dios ushakätsiptimpis, noqata kuyamanqëkinölla* familiätapis+ kuyëkunki”.
16 Yapëmi Jonatanqa nirqan: “Davidpa llapan chikeqninkunatam Jehovä Dios ushakätsinqa”. Jonatanwan David tsënö parlayanqanqa, Davidpa shamoq kastankunapaqwanmi karqan.
17 Jonatanqa Davidta alläpa kuyarmi parlayanqanta cumplinampaq yapë rogarqan. Tsëmi Davidqa cumplinampaq änirqan.+
18 Tsënam Jonatanqa kënö nirqan: “Warëqa llullu killam kanqa+ y jamakunëkichö mana këkanqëkitam rikäyanqa.
19 Y warätinnäqa imanir mana ëwanqëkitam tapukuyanqa. Tsëmi kanampis pasaqchönölla këman shamur, mana rikäyäshunëkipaq kë rumi lädunllachö kanëki.
20 Noqanam alli apuntëkur kë rumi lädunmampa kima kuti flëchamushaq.
21 Y sirwimaqnïtam flëchakunata kutitsimunampaq mandashaq. Pëta, ‘flëchakunaqa mas kë lädupam këkäyan’ niptïqa, kutikamuyta puëdinkim. Jehovä Diospa jutinchömi nikaq imapis mana pasashunëkipaq kaqta.
22 Peru sirwimaqnïta, ‘flëchakunaqa mas washa lädupam këkäyan’ niptïqa, qeshpirmi ëwakunëki, tsëtam Teyta Jehoväqa munan.
23 Parlanqantsiktaqa+ Jehovä Diosmi musyëkan y ama imëpis+ qonqëkullätsuntsu”.
24 Tsënam Davidqa mana rikäyänampaq puntata ëwanqan sitiuman kutirqan. Y llullu killa junaqnam gobernanti Saulqa mikunampaq jamakurqan.+
25 Saulqa imëpis jamakunqanchömi jamarëkarqan, frentinchönam Jonatan jamarëkarqan y Saulpa lädunchönam Abner+ jamarëkarqan, y Davidpa täkunanchöqa manam pillapis karqantsu.
26 Y Saulqa, “imapis pasashqa kaptinchi limpiutsu*+ këkan. Mana limpiu karchi shamushqatsu” nirmi pensarqan, tsëmi tsë junaq Davidpaq tapukurqantsu.
27 Waräninnam* Davidta jamakunanchö mana rikarnin Saulqa tsurin Jonatanta, “¿imanirtaq Jesëpa+ tsurinqa qanyampis ni kanampis mikoq shamushqatsu?” nir tapurqan.
28 Jonatannam papäninta nirqan: “Belenta+ ëwanampaqmi Davidqa rogakamarqan.
29 Familianshi Belen markachö pishtashqa animalkunata Teyta Diospaq rupatsinqa, tsëshi wawqin qayatsishqa ëwanampaq. Tsëmi, ‘¿manatsuraq ëwarïman wawqïkunata watukaqnö?’ nimarqan. Tsëmi mikoq shamushqatsu”.
30 Tsënam Saulqa Jonatanta kënö nir qayaparqan: “¡Qamqa munënin rurakoq warmipa wawanmi kanki! ¿Jesëpa tsurimpa favornin këkanqëkita mana musyanqätaku pensanki? ¡Qamqa penqakuypaqmi kanki, y mamëkipaqpis penqakuypaqmi kanki!
31 Jesëpa tsurin kawanqanyaqqa manam Israelchö gobernanti këta puëdinkitsu y gobernarpis manam libritsu kanki.+ Kanan höra Davidta apayämutsun wanutsinäpaq”.+
32 Tsënam Jonatanqa papänin Saulta, “¿imanirtaq wanutsita munanki?+ ¿Ima mana allitataq rurashqa?” nirqan.
33 Tsënö nïkuptinmi Saulqa Jonatanta lanzawan wanuratsita munarqan.+ Tsë höram Jonatanqa cuentata qokurqan Davidta rasumpa wanutsita munanqanta.+
34 Y cölerashqam sharkur ëwakurqan. Tsë junaqqa manam imatapis Jonatan mikurqantsu. Alläpam llakikurqan+ papänin Saul, Davidpaq mana allikunata parlanqampita.
35 Jonatanqa Davidwan parlayanqannömi, sirweqninta pusharkur+ tempränulla chakrata ëwarqan.
36 Y chakrachönam sirweqninta nirqan: “Cörri, flëchanqä flëchakunata apamuy”. Pëqa cörripam ëwarqan, y Jonatanqa juk kaq flëchatam mas karuyaq flëcharqan.
37 Flëchakunata apanampaq sirweqnin chäriptinnam Jonatanqa, “mas washamampam flëchaqa këkan” nir qayarqan.
38 Y yapëmi Jonatanqa kënö nir qayarqan: “¡Imatataq shuyaranki! ¡Apurë! ¡Cörri!”. Tsënam sirweqninqa flëchakunata aparkur Jonatan kaqta kutirqan.
39 Sirweqninqa manam cuentata qokurqantsu Jonatan tsëta imanir rurëkanqanta, tsëtaqa Jonatanwan Davidllam musyayarqan.
40 Tsëpitanam Jonatanqa flëchanta y arcunta sirweqninta aptarkatsir, “këta aparkur, markata kutikuy” nirqan.
41 Jonatampa sirweqnin kutiriptinnam, Davidqa rataranqampita o tsinkaranqampita* yarqaramur Jonatanpa puntanman kima kutipa qonqurikurqan. Tsëpitanam ishkampis waqar despidinakuyarqan,* y Davidmi masqa waqarqan.
42 Jonatanmi Davidta kënö nirqan: “Jehovä Diosqa musyëkanmi parlanqantsikta.+ Kënömi ninakurqantsik: ‘Ishkantsikpaq y familiantsikpaq parlanqantsiktaqa+ Teyta Jehovämi musyëkan y ama imëpis qonqëkutsuntsu’. Kananqa mana yarpachakushllapa ëwakuy”.
Tsëpitanam Davidqa ëwakurqan, y Jonatanpis markatam kutikurqan.
Nötakuna
^ Kënöpis niyanmi: pecädutataq.
^ Kënöpis niyanmi: warantin.
^ Kënöpis niyanmi: pecädutapis.
^ Hebreu idiömachöqa “alläpa kuyakoq kanqëkita rikätsimë” ninmi.
^ Kënöpis niyanmi: ankupëkamë; kuyapëkamë.
^ O “alläpa kuyamanqëkinölla”.
^ Hebreu idiömachöqa “manachi purificäkushqatsu” ninmi.
^ Hebreu idiömachöqa “Llullu killa waräninnam” ninmi.
^ Kënöpis niyanmi: illariranqampita; pakaranqampita.
^ O “cäranchö mutsanakuyarqan”.
