1 Samuel 29:1-11
-
Filisteukuna Davidman confiakuyantsu (1-11)
29 Filisteukunaqa,+ Afec markamanmi llapan soldädunkunata qayatsiyarqan. Peru israelïtakunaqa Jezreel+ markapa pukyun lädunchömi campamentunkuna rurashqa kayarqan.
2 Filisteukunapa gobernaqninkunaqa, soldädunkunata cienpa y milpa rakïkurmi grüpu grüpu ëwayarqan. Y Davidwan soldädunkunanam, Akispa+ qepanta ëwayarqan.
3 Filisteukunapa dirigeqninkunaqa Akistam, “kë hebreu nunakunaqa, ¿imatataq këchö rurayan?” nir tapuyarqan. Tsënam Akisqa kënö nirqan: “Pëqa Israelchö gobernaq Saulpa sirweqnin Davidmi. Juk watapitapis masnam noqawan këkan.+ Israelpa gobernaqninta dejarir noqaman ëwakamunqampitaqa, manam ima mana allitapis rurashqatsu”.
4 Tsënam filisteukunapa dirigeqninkunaqa alläpa cölerar Akista niyarqan: “Taqë nunata nï,+ rikätsinqëki sitiunman kutikunampaq. Ama shamutsuntsu, capaz pelya höraqa noqantsikpa contrantsik churakanqa.+ Y capaz Saulwan alli quedëta munar soldäduntsikkunata wanuskatsir peqankunata o umankunata apëkunman.
5 ¿Manaku kë Davidpaq tushurëkar cantayaq,‘Saulqa miltam wanutsishqa o wañutsishqa,y Davidnam diez milta wanutsishqa’ nirnin?”.+
6 Tsënam Akisqa,+ Davidta qayëkur kënö nirqan: “Imëyaqpis kawaq Jehovä Diospa jutinchömi neq, qamqa allikunatam ruranki y noqaman ëwakamunqëkipitaqa manam ima mana allitapis rurarqunkitsu.+ Tsëmi alläpa kushikü soldädükunawan shamunqëkita.+ Peru filisteukunapa wakin gobernaqninkunaqa manam qamman confiakuyantsu.+
7 Tranquïlulla kutikuy, y ama imatapis rurëtsu, sinöqa filisteukunapa gobernaqninkunam cölerakuyanqa”.
8 Tsënam Davidqa Akista nirqan: “¿Imatataq rurarqö? Qamman ëwakamunqäpitaqa, ¿ima mana allitapis rurarqöku? Teytallë, ¿imanirtan chikishoqnikikunawan pelyaq ëwämantsu?”.
9 Akisnam Davidta nirqan: “Noqapaqqa Diospa angelninnömi alli ruraq kanki.+ Peru filisteukunapa dirigeqninkunaqa, ‘ama pelyaq shamutsuntsu’ niyashqam.
10 Tsëmi warëqa, tempränulla llapan soldäduykikunawan kutikuyänëki”.
11 Tsëmi Davidwan soldädunkunaqa filisteukunapa markankunaman tempränulla kutikuyarqan. Y filisteukunanam Jezreel+ markata ëwayarqan.
