1 Samuel 3:1-21
-
Samuelta Dios akran willakoqnin kanampaq (1-21)
3 Samuel wamraqa Elïpa mandädunchömi Teyta Jehoväta sirwirqan.+ Tsë witsankunaqa manam seguïdunatsu Teyta Jehoväqa willakoqninkunata imatapis musyatseq.+
2 Elïqa awkinna karmi alliqa rikarqannatsu. Juk paqasmi cämanchö punuykarqan.+
3 Teyta Diospa wayinchö chiwchiqa+ manaran upishqaraqtsu* karqan, y Samuelqa Teyta Jehoväpa Sagrädu Cäjan këkanqan templuchömi*+ punuykarqan.
4 Tsënam Jehovä Diosqa Samuelta qayarqan, y Samuelqa, “imallataraq teytallë” nirmi
5 Elï kaqman cörripa ëwarqan y kënömi nirqan: “Teytallë, ¿qayamarqunkiku?”. Elïnam, “manam qayarqoqtsu, punukoq kutikuy” nirqan. Tsënam Samuelqa punoq kutikurqan.
6 Jehovä Diosqa yapëmi, “¡Samuel!” nir qayarqan. Tsënam Samuelqa sharkurnin Elï kaqta ëwarir, “Teytallë, ¿qayamarqunkiku?” nirqan. Elïnam nirqan: “Hïju, manam qayarqoqtsu, punukoq kutikuy”.
7 (Samuelqa manam Jehovä Diosta alliqa reqirqanraqtsu y Jehoväpitaqa manam ima willakuytapis chaskishqaraqtsu karqan).+
8 Jehovä Diosqa yapëmi, “¡Samuel!” nir qayarqan. Tsënam Samuelqa, sharkur Elï kaqta ëwar nirqan: “Qayamarqunkim, tsëmi këchö këkä”.
Tsënam Elïqa cuentata qokurqan, wamrataqa Jehovä qayëkanqanta.
9 Tsëmi Elïqa Samuelta nirqan: “Punoq kutikuy y yapë qayashuptikiqa kënö ninki: ‘Wiyëkaqmi Teyta Jehovä, ¿imallapaqtan qayëkämanki?’”. Tsënam Samuelqa yapë punoq kutikurqan.
10 Jehovä Diosqa puntata qayanqannölla yapë qayarqan, “¡Samuel, Samuel!” nirnin. Y Samuelnam, “wiyëkaqmi Teyta Dios, ¿imallapaqtan qayëkämanki?” nirqan.
11 Jehovä Diosnam Samuelta kënö nirqan: “Israelchömi mantsakëpaqta rurashaq y llapan wiyaq kaqkunam alläpa mantsakäyanqa.+
12 Tsë junaqmi Elïpa y familiampa contran llapan parlanqäta cumplishaq.+
13 Elïtam willanëki familianta castiganäpaq kaqta,+ pëqa tsurinkuna mana respetayämanqanta+ musyëkarpis manam corregishqatsu.+
14 Tsëmi ni pishtashqa animalkunata qarayämaptin ni mas qarëkunata qarayämaptimpis, Elïpa familiantaqa jutsata* rurayanqampita ni imëpis perdonashaqtsu”.+
15 Samuelqa patsa waranqanyaqmi punukurqan. Tsëpitanam Jehovä Diosta adorayänan wayipa punkunkunata kicharqan. Pëqa mantsarqanmi Teyta Dios ninqanta Elïta willëta.
16 Tsënam Elïqa Samuelta qayarqan: “¡Samuel, hïju!”. Y pëqa, “teytallë, ¿qayamarqunkiku?” nirqanmi.
17 Tsëmi Elïqa kënö tapurqan: “¿Imatan nishurqunki? Llapan nishunqëkita willëkallämë. Llapan nishunqëkita mana willamaptikiqa Teyta Diosmi castigashunki”.
18 Tsëmi Samuelqa llapanta willarqan. Elïnam nirqan: “Jehovä Diospa voluntänin kaptinqa, ninqannö këkullätsun”.
19 Samuelqa masnam jatunyarqan y Teyta Jehoväqa bendicirqanmi,+ y llapan parlanqan cumplikänampaqmi yanaparqan.
20 Llapan israelïtakunam Dan markapita Beer-Sëbayaq musyariyarqan, Jehovä Diosqa willakoqnin kanampaq Samuelta akrashqa kanqanta.
21 Jehovä Diosqa Silö markachömi llapan munanqanta maslla musyatsikurqan, y tsëchömi Samuelqa Teyta Jehoväta reqirqan. Tsënöqa reqirqan Jehovä parlapaptinmi.+
Nötakuna
^ Kënöpis niyanmi: wañushqaraqtsu.
^ O “Diosta adorana carpa wayichömi”. Rikäri “Bibliachö palabrakunata entiendinapaq” neqta.
^ Kënöpis niyanmi: pecäduta.