1 Samuel 30:1-31
30 Davidwan soldädunkunaqa kima junaqta Ziclag+ markaman chëkurmi musyariyarqan, Nëguebman* y Ziclag markaman amalequïta+ nunakuna yëkushqa kayanqanta. Ziclag markamanqa ninatam prendïkushqa kayänaq.
2 Manam pitapis wanutsiyänaqtsu, y llapan warmikunata,+ wamrakunata y mayorkunatam apakushqa kayänaq. Tsë markachö llapan tariyanqantam apakushqa kayänaq.
3 Davidwan soldädunkuna Ziclag markaman chëkurqa, nina ushashqatam tariyarqan. Y warminkunatawan ollqu y warmi wamrankunataqa sirweqninkunapaqmi apakushqa kayänaq.
4 Tsëmi Davidwan soldädunkunaqa mana puëdiyanqanyaq waqayarqan.
5 Davidpa warminkuna Jezreel markapita Ahinoamta y Carmëlu markapita Nabalpa viudan Abigailtapis apakushqam kayänaq.+
6 Davidpa soldädunkunaqa, ollqu y warmi wamrankunata apakushqa kayaptinmi alläpa cölerar Davidta rumiwan wanutsita munayarqan. Tsëmi Davidqa alläpa yarpachakurqan, peru Teyta Jehovämanmi confiakurqan, y pëqa yanaparqanmi.+
7 Davidqa Ahimëlecpa tsurin sacerdöti Abiatartam+ nirqan: “Sagrädu mandilta*+ aparamuy”. Tsënam Abiatarqa apapurqan.
8 Y Davidqa Jehovä Diostam kënö tapurqan:+ “¿Tsë suwakoqkunata qatipämanku o manaku? Y qatiparqa, ¿taripäshaqtsuraq?”. Pënam, “awmi, qatipëlla, taripankim y llapan apakuyanqantam kutitsimunki” nirqan.+
9 Tsënam Davidwan seiscientus soldädunkunaqa+ jinan höra qatipar ëwayarqan, y Besor mayumanmi* chäyarqan. Tsëchömi wakin soldädunkuna quedakuyarqan.
10 Alläpa pishipashqa* karmi Besor+ mayuta* tsimpëta puëdiyarqantsu, tsëmi doscientus soldädukunaqa tsëchö quedakuyarqan. Y Davidqa cuatrocientus soldädunkunallawanmi pasarqan.
11 Ëwarëkarmi Davidpa soldädunkunaqa juk egipciu nunata tariyarqan. Y David kaqman pusharmi yakutawan mikuyta qarayarqan.
12 Y päsaspita ishkë tortillata y tsakishqa hïguspita juk pedäzu tortillatam qarayarqan. Tsë egipciuqa kima junaqpam imatapis mikushqatsu nï yakutapis upushqatsu kanaq, tsëmi mikuriptin kallpan yurirqan.
13 Tsënam Davidqa, “¿mëpitatan kanki y pitan patronniki?” nir tapurqan. Pënam nirqan: “Egiptu nacionpitam kallä, peru amalequïta nunapa sirweqninmi kä. Kima junaqpam qeshyarqö, tsëmi patronnïqa dejaramar ëwakushqa.
14 Noqakunam atacayarqä keretïta+ nunakuna kawayanqan* lädun markakunata, Judä markakunata y Caleb+ chaskinqan* lädun markakunata. Y Ziclag markamanqa ninatam prendïkuyarqä”.
15 Tsënö niptinnam Davidqa, “tsë suwakoqkunaman pushëkamë” nirqan. Tsënam pëqa nirqan: “Diospa jutinchö nimë mana wanutsimänëkipaq y patronnïman mana entregamänëkipaq kaqta, tsëqa pushashqëkim suwakoqkuna këkäyanqanman”.
16 Tsëmi ëwarnin suwakoqkunataqa tariyarqan lluta churapakushqa entëru pampachö mikur y upur këkäyaqta. Filisteu nunakunapa markankunapita y Judä markakunapita imëkakunata apashqa karmi kushishqa këkäyarqan.
17 Tsënam Davidqa jinan höra wanutsir qallëkurqan y madrugädapitam tardiyanqanyaq pelyayarqan, y manam ni pï qeshpir ëwakurqantsu.+ Cuatrocientus soldädukunallam camëllunkunata montarkur qeshpir ëwakuyarqan.
18 Davidqa amalequïta nunakuna llapan apayanqanta+ y ishkan warminkunatam kutitsimurqan.
19 Kutitsiyämunqanchöqa manam imapis pishirqantsu. Ichiktapis jatuntapis llapantam kutitsiyämurqan. Ollqu y warmi wamrankunata y llapan apayanqan cösasninkunatam+ Davidqa kutitsimurqan.
20 Üshakuna y wäkakunaqa Davidpaqmi karqan. Tsë animalkunatam soldädunkunaqa, “këqa Davidpanam kanqa” nirnin, kikinkunapa animalninkunapa puntanta qatiyarqan.
21 Besor+ mayuchö* quedakushqa doscientus soldädunkunamanmi Davidqa charqan. Y pëkunanam yarqayämurqan Davidta y soldädu mayinkunata taripaq, tsënam Davidqa imanö këkäyanqanta tapurqan.
22 Peru Davidwan ëwaq wakin soldädukunaqa imatapis kikinkunallapaq munaqmi kayarqan, tsëmi niyarqan: “Noqantsikwan mana ëwashqakunataqa ama imatapis rakipushuntsu, warminkunata y wamrankunallata aparkur ëwakuyätsun”.
23 Tsënam Davidqa kënö nirqan: “Ama tsëtaqa rurayëtsu wawqilläkuna, Jehovä Diosmi cuidamarquntsik y yanapamarquntsik. Tsëmi suwakoqkunata vencirir llapan apakuyanqanta kutitsimurquntsik.+
24 Tsënö rurëta munayanqëkitaqa manam pillapis allim ninqatsu. Pelyaq ëwashqa kaqkuna y cösaskunata cuidakur quedashqa kaqkunapis, igualmi chaskiyänëki.+ Llapankunatam igualpa rakipänantsik”.+
25 Tsë junaqpitam Davidqa mandakurqan imëpis tsënölla rurayänampaq. Y tsë mandakuytam Israelchöqa imëpis cäsukuyänan karqan, y tsënöllam kananyaqpis rurëkäyan.
26 Ziclag markaman David kutirqa, Judächö dirigentikunapaqmi kutitsimunqan cösaskunata apatsirqan, pëkunaqa amïgunkunam kayarqan. Y kënömi nirqan: “Kë cösaskunaqa* Jehovä Diospa chikeqninkuna apayanqanta kutitsimunqämi, y qamkunapaqmi wakinta apëkätsimü”.
27 Pëqa wakin markakunachö dirigentikunamampis apatsirqanmi: Betelchö+ këkaqkunaman, Nëguebchö këkaq Ramot markachö këkaqkunaman, Jatirchö+ këkaqkunaman,
28 Aroerchö këkaqkunaman, Sifmotchö këkaqkunaman, Estemöachö+ këkaqkunaman,
29 Racalchö këkaqkunaman, jerahmeelïta+ nunakuna kawakuyanqan markäkunaman, quenïta+ nunakuna täkuyanqan* markäkunaman,
30 Hormächö+ këkaqkunaman, Borasanchö këkaqkunaman, Atacchö këkaqkunaman,
31 Hebronchö+ këkaqkunaman y Davidwan soldädunkuna pärayanqan entëru markakunaman.
Nötakuna
^ O “Judäpa sur kaq lädunman”.
^ Hebreu idiömachöqa “efodta” ninmi. Rikäri “Bibliachö palabrakunata entiendinapaq” neqta.
^ Kënöpis niyanmi: riumanmi.
^ Kënöpis niyanmi: utishqa; shaykushqa.
^ Kënöpis niyanmi: riuta.
^ O “sur o Nëgueb”.
^ O “sur o Nëgueb”.
^ Kënöpis niyanmi: riuchö.
^ Hebreu idiömachöqa “bendicionqa” ninmi.
^ Kënöpis niyanmi: täräyanqan; pärayanqan.