1 Samuel 4:1-22
4 Samuel willakunqantaqa entëru Israel nacionchömi musyayaq.
Tsë witsankunam israelïtakunaqa filisteu soldädukunawan pelyayänampaq ëwayarqan. Ebenëzer sitiupa lädunchömi campamentunkuna rurayarqan y filisteukunanam Afec markachö.
2 Tsëpitanam filisteu soldädukunaqa israelïtakunawan pelyayänampaq churanakuyarqan. Y israelïtakunatam filisteukuna venciyarqan, cuatru miltanömi pelyayanqan sitiuchö wanutsiyarqan o wañutsiyarqan.
3 Campamentunkunaman soldädukuna kutiriyaptinmi, israelïtakunata dirigeqkuna kënö niyarqan: “¿Imanirtan Teyta Jehoväqa permitishqa filisteu soldädukuna vencimänantsikta?+ Silö markachö këkaq Teyta Jehoväpa Sagrädu Cäjanta apamushun+ chikimaqnintsikkunapita salvamänapaq”.
4 Tsënö nirmi Silö markaman nunakunata mandayarqan, tsë nunakunam querubinkuna+ jananchö* këkaq angelkunata mandaq Jehovä Dios jamarëkanqan Sagrädu Cäjata apayarqan. Y Elïpa tsurinkuna Hofnïwan Finehaspis+ tsë Cäjata apayaptinmi ëwayarqan.
5 Teyta Jehoväpa Sagrädu Cäjanta campamentuman chäratsiyaptinmi, llapan israelïtakuna fuertipa büllar qallëkuyarqan, tsëmi patsapis kuyurqan.
6 Tsënö büllaqta wiyarmi filisteu soldädukunaqa niyarqan: “¿Imanirtaq hebreu nunakunaqa campamentunkunachö büllëkäyan?”. Tsëpitanam musyariyarqan Jehoväpa Sagrädu Cäjan israelïtakunapa campamentunchö këkanqanta.
7 Tsëmi filisteu soldädukunaqa alläpa mantsakarnin niyarqan: “¡Campamentumanmi Diosninkuna chärishqa!”.+ Y niyarqanmi: “¡Kananqa wanushunchi o wañushunchi! ¡Kënöqa manam imëpis pasakushqatsu!
8 ¡Kananqa wanushunchi! ¿Piraq salvëkamäshun alläpa puëdeq Diosninkunapita? Pëmi egipciu nunakunatapis tsunyaq sitiuchö tukuynöpa ushakätsirqan.+
9 Tsënö kaptimpis filisteu nunakuna, valienti kashun y mana mantsëpa israelïtakunawan pelyashun. Sinöqa, pëkuna* sirwimanqantsiknömi noqantsikpis pëkunata sirwishun.+ ¡Mana mantsëpa ollqunö pelyashun!”.
10 Tsënam filisteu soldädukunaqa israelïtakunata venciyarqan+ y mëtsikaqtam wanutsiyarqan. Tsëmi israelïtakunaqa cada ünu wayinkunata qeshpir ëwakuyarqan. Treinta mil Israel soldädukunam wanuyarqan o wañuyarqan.
11 Teyta Diospa Sagrädu Cäjantapis filisteu soldädukunaqa apakuyarqanmi. Y Elïpa tsurinkuna Hofnïwan Finehaspis wanuyarqanmi.+
12 Pelyayanqan sitiupitam, Benjaminpa kastampita juk nuna cörripa ëwar Silö markaman tsë junaqlla charqan, röpampis rachishqa y allpallana peqanwanmi o umanwanmi charqan.+
13 Tsë nuna Silö markaman chänampaqqa, Elïqa näni kuchunchömi tëkarqan. Teyta Diospa Sagrädu Cäjampaq+ alläpa yarpachakurmi alkäbulla këkarqan. Y tsë nuna chëkurnin pasanqanta willakuptinmi, llapankuna mantsakar büllayarqan.
14 Tsëta wiyarmi Elïqa “¿imanirtan alläpa büllayan?” nir tapukurqan. Tsënam tsë nunaqa cörripa ëwarqan Elïta willanampaq.
15 (Elïqa noventa y öchu watayoqnam karqan, y mananam rikaqnatsu).+
16 Tsënam tsë nunaqa Elïta kënö nirqan: “¡Noqam pelyayanqan sitiupita chäramurqö! Kanan junaqmi tsëpita qeshpir ëwakamurqö”. Elïnam, “hïju, ¿imatan pasakushqa?” nir tapurqan.
17 Tsënam tsë nunaqa kënö willarqan: “Filisteu soldädukunam israelïtakunata venciyashqa y mëtsikaqta wanutsiyashqa,+ tsëmi israelïtakuna qeshpir ëwakuyashqa. Tsurikikuna Hofnïtawan Finehastapis+ wanutsiyashqam, y Teyta Diospa Sagrädu Cäjantapis apakuyashqam”.+
18 Tsë nuna Teyta Diospa Sagrädu Cäjampaq willëkuptinmi, Elïqa punku lädunchö tëkanqampita qepapa ishkirirqan. Awkinnam karqan y lasarqanmi, tsëmi ishkiriptin kunkan pakirirqan y wanurirqan o wañurirqan. Pëqa cuarenta watapam Israelchö juez kashqa karqan.
19 Lumtsuynin, Finehaspa warminqa qeshyaq karmi höranchöna këkarqan. Y Teyta Diospa Sagrädu Cäjanta filisteu soldädukuna apakushqa kayanqanta y suegrunwan qowampis o runampis* wanukushqa kayanqanta musyariptinmi, pacha nanë tsaririrqan, y tsëllanam wamran yuriskirqan.
20 Warmi wanunampaqna këkaptinmi, lädunchö këkaq warmikunaqa niyarqan: “Ama yarpachakuytsu, juk ollqu wamrëkim yurishqa”. Peru warmiqa manam imapis nirqantsu.
21 Y wamrampa jutinqa Icabod*+ nirmi churarqan, tsënöqa churarqan, “respetashqa këqa Israelpitam prësu ëwakushqa”+ nirmi. Tsënöqa nirqan Teyta Diospa Sagrädu Cäjanta apakushqa kayaptin y suegrunwan qowan o runan* wanukushqa kayaptinmi.+
22 Kënömi nirqan: “Respetashqa këqa Israelpitam prësu ëwakushqa, y Teyta Diospa Sagrädu Cäjantam apakuyashqa”.+
Nötakuna
^ O capazchi “chowpinchö o pullanchö”.
^ O “hebreukuna”.
^ Kënöpis niyanmi: ollqumpis.
^ Tsë jutiqa, “¿Diosku Israelta dejashqa?” ninanmi.
^ Kënöpis niyanmi: ollqun.
