1 Samuel 5:1-12
5 Teyta Diospa Sagrädu Cäjantaqa,+ filisteu soldädukuna apakuyarqan Ebenëzer sitiupita Asdod markayaqmi.
2 Tsëpitanam filisteu soldädukunaqa Teyta Diospa Sagrädu Cäjanta, Dagonpa* templunman* apayarqan, y Dagon+ santupa lädunmanmi churayarqan.
3 Waräninnam Asdod markachö täkoqkunaqa* patsa waräriptinlla ëwayarqan, y Dagontam urë senqapa jitarëkaqta tariyarqan. Jehovä Diospa Sagrädu Cäjampa puntanmanmi ishkishqa kanaq.+ Tsëmi pallarkur sitiunman kutitsiyarqan.+
4 Waränimpis patsa waräriptinllam yapë kutiyarqan, y Teyta Jehovä Sagrädu Cäjampa puntanchö urë senqapa jitarëkaqtam santunkuna Dagonta tariyarqan. Dagonpa peqan o uman y ishkan makinkunam templupa punku yëkunanchö roqushqa jitarëkarqan. Pescädu* niraq cuerpunllam sänuqa këkarqan.
5 Tsëmi Dagonpa sacerdötinkuna ni wakin nunakunapis, Asdod markachö Dagonpa templumpa punku yëkunanman kananyaqpis jaruyannatsu.
6 Jehovä Diosqa, Asdod markachö y amänun markachö täkoqkunatam* sikinkunachö tumorta*+ yuritsir castigarqan.
7 Tsëmi Asdod markachö täkoqkunaqa* pasakunqanta rikärir kënö niyarqan: “Israelpa Diosninmi feyupa noqantsikta y diosnintsik Dagonta castiguëkämantsik, tsëmi Sagrädu Cäjataqa katsinantsiknatsu”.
8 Tsënam filisteu soldädukunaqa llapan gobernaqkunata qayëkatsir kënö tapuyarqan: “¿Imataraq rurashun Israelpa Diosnimpa Sagrädu Cäjanwan?”. Pëkunanam, “Gat markaman apëkushun”+ niyarqan. Y tsëmanmi apayarqan.
9 Sagrädu Cäjata tsëman apëkuyaptinnam, Jehovä Diosqa tsë markachö nunakunata mantsakätsir castigarqan. Ichiktapis jatuntapis llapantam sikinkunachö tumorta*+ yuritsirnin castigarqan.
10 Tsënam Teyta Diospa Sagrädu Cäjantaqa Ecron+ markaman apëkuyarqan. Y chäratsiyaptinnam tsëchö täkoqkunaqa* fuertipa kënö niyarqan: “¡Israelpa Diosnimpa Sagrädu Cäjantaqa apayämurqunki, noqakunata y llapan marka mayïkunata wanutsiyämëta munarmi!”.+
11 Tsënam filisteu soldädukunapa llapan gobernaqninkunata qayëkatsir kënö niyarqan: “Noqakuna ni marka mayïkuna mana wanuyänäpaq, Israelpa Diosnimpa Sagrädu Cäjanta këpita apakuyë y sitiunman kutïkatsiyë”. Pëkunataqa, Teyta Diosmi feyupa castigashqa karqan.+ Tsëmi tsë markachö nunakunaqa wanuyta mantsar alläpa mantsakäyarqan.
12 Mana wanoq o wañoq kaqkunataqa sikinkunachö tumorta* yuritsirmi Teyta Dios castigarqan. Tsëmi tsë markachö täkoqkunaqa* ciëluman rikëkurnin auxiliuta mañakur fuertipa qayakuyarqan.
Nötakuna
^ Rikäri “Bibliachö palabrakunata entiendinapaq” neqta.
^ Hebreu idiömachöqa “wayinman” ninmi.
^ Kënöpis niyanmi: täraqkunaqa; päraqkunaqa.
^ Hebreu idiömachöqa “Dagonpa cuerpunllam” ninmi.
^ O “hemorroidista”.
^ Kënöpis niyanmi: täraqkunatam; päraqkunatam.
^ Kënöpis niyanmi: täraqkunaqa; päraqkunaqa.
^ O “hemorroidista”.
^ Kënöpis niyanmi: täraqkunaqa; päraqkunaqa.
^ O “hemorroidista”.
^ Kënöpis niyanmi: täraqkunaqa; päraqkunaqa.
