1 Samuel 9:1-27
-
Saulta Samuel reqin (1-27)
9 Benjaminpa+ kastampitam, kapoqyoq nuna karqan y jutinqa Quismi karqan.+ Pëqa Abielpa tsurin y Zerorpa willkanmi karqan. Zerorqa Becoratpa tsurinmi karqan y Becoratnam Afïaspa tsurin karqan.
2 Quispaqa, Saul+ jutiyoq jövin tsurinmi kapurqan. Manam ni mëqan israelïtapis pënö shumaqqa karqantsu. Jatun kaptinmi wakin israelïtakunaqa hombrunllaman chäyaq.
3 Juk kutim Quis nunaqa ashnunkunata oqrëkurqan. Tsëmi tsurin Saulta nirqan: “Juk sirwimaqnintsikta pusharkur ashnuntsikkunata ashiramuy”.
4 Tsëmi Saulwan sirweqninqa, ashnukunata asheq ëwakuyarqan Efrainpa jirkankunapa y Salisä sitiukunapa, y manam tariyarqantsu. Tsëpitanam Saalim sitiupa asheq ëwayarqan, tsëchöpis manam tariyarqantsu. Benjaminpa kastankunapa entëru markankunapam ashiyarqan y manam rastrunllatapis tariyarqantsu.
5 Zuf sitiuman chärirnam Saulqa sirweqninta nirqan: “Aku kutikushun, papänïqa ashnukunapaq yarpachakunqampitapis noqantsikpaqmi masqa yarpachakunqa”.+
6 Tsënam sirweqninqa nirqan: “Taqë markachöqa Teyta Diospa juk sirweqninmi täkun,* y pïmëmi respetan. Llapan parlanqanmi cumplikan.+ Aku chärishun, capaz mëpa asheq ëwanapaqpis nimäshun”.
7 Saulnam sirweqninta nirqan: “Ëwarqa, ¿imataraq qarashun? Tantantsikpis ushakashqanam. Manam imantsikpis kannatsu, ¿imataraq qarashun Teyta Diospa sirweqninta?”.
8 Sirweqninnam nirqan: “Noqapam kapaman takshalla pläta qellënï,* tsëtam Teyta Diospa sirweqninta qarashun. Tsënam nimäshun mëpa ëwanapaqpis”.
9 (Unë tiempuqa Dios ima ninqanta musyëta munarqa, “Teyta Dios munanqanta entiendeq nunaman ëwashun”+ niyaqmi. Tsënömi Diospa willakoqninkunata reqiyaq).
10 Saulqa sirweqnintam nirqan: “Allim kanqa, tsëqa aku ëwarishun”. Tsëmi Teyta Diospa sirweqnin këkanqan markaman ëwayarqan.
11 Tsë markaman witsëkarnam, yakuman ëwëkaq shipashkunata tapuyarqan: “¿Tsëchöku këkan Teyta Dios munanqanta entiendeq nuna?”.+
12 Shipashkunanam niyarqan: “Awmi, tsëchönam këkan, empëñulla ëwayë. Kë markamanqa shamushqa, Teyta Diosta adorayänan altu sitiuchö*+ pishtashqa animalta+ israelïtakuna rupatsiyaptinmi.
13 Markaman yëkurirllam tariyanki. Empëñulla ëwayë, Diosta adorayänan altu sitiuman manaraq mikoq witsaptin. Chärir Teyta Diosman pë mana mañakuptinqa, manam mikur qallayanqatsu. Empëñulla ëwarqa taripäyankim”.
14 Tsënam pëkunaqa tsë markaman witsäyarqan. Markaman yëkurirnam Samuelta rikäriyarqan yarqëkämoqta. Pëkunawan tinkunampaq y Teyta Diosta adorayänan altu sitiuman pëkunawan witsänampaqmi yarqëkämunaq.
15 Saul chänampaq juk junaq pishikaptinmi, Jehovä Diosqa Samuelta nirqan:
16 “Rikarqömi y wiyarqömi+ sirwimaqnïkuna imanö sufrikäyanqanta. Tsëmi warë kë höranö Benjaminpa+ kastankunapita juk nunata qamman mandamushaq. Pëtam churanëki Israelpa gobernaqnin kanampaq.+ Pëmi filisteu nunakunapita sirwimaqnïkunata salvanqa”.
17 Saulta Samuel rikäriptinnam Jehovä Diosqa nirqan: “Kë nunapaqmi kënö nir parlaparqoq: ‘Këmi sirwimaqnïkunata gobernanqa’. Y këchönam këkan”.+
18 Tsënam markapa jatun punkunman chärir, Saulqa Samuelwan tinkuskir kënö tapurqan: “Teytallë, ¿mëchötan Teyta Dios munanqanta entiendeq nunapa wayin?”.
19 Samuelnam Saulta nirqan: “Noqam kä Teyta Dios munanqanta entiendeq nuna. Aku witsäshun Teyta Diosta adorayänan altu sitiuman. Kanan junaqqa noqawanmi mikuyanki+ y warënam tempränulla kutikuyanki. Llapan musyëta munanqëkitam* willashqëki.
20 Kima junaqna+ oqrakashqa ashnukunataqa tariyashqanam, ama yarpachakuynatsu. Y, ¿pipatan kë Israelchö väleq cösaskunaqa? ¿Manaku qampa y papänikipa familiampa kayan?”.+
21 Tsënö niptinnam Saulqa nirqan: “¿Imanirtan tsënö nimanki? Noqalläqa Israelchö kastakunapita mas wallkalla Benjaminpa kastankunapitam kallä.+ Y Benjaminpa kastankunachöqa, familiätapis manam reqiyanllatsu”.
22 Tsëpitanam Samuelqa Saultawan sirweqninta pusharqan mikuyänan sitiuman, y mas respetashqa sitiumanmi jamatsirqan. Tsëchöqa treintanömi ollqukuna këkäyarqan.
23 Tsënam Samuelqa cocinëruta nirqan: “Churanëkipaq ninqaq ëtsata apamuy”.
24 Tsënam cocinëruqa juk entëru chankanta aparamur Saulta sirwirqan. Y Samuelnam Saulta nirqan: “Këmi qampaq. ‘Visïtayoqmi kashaq’ niptïmi, kë ëtsata mikunëkipaq churayarqan”. Tsëmi Saulqa tsë junaq Samuelwan mikurqan.
25 Tsëpitanam Teyta Diosta adorayänan altu sitiupita+ markaman urarnin, Samuelqa wayimpa altunchö Saulwan maslla parlakuyarqan.
26 Waräninnam patsa waräriptin shärikuriyarqan. Y wayipa altunchö Saul këkaptinmi, “alistakuyna kutikunëkipaq” nir Samuel qayarqan. Tsënam Saulqa alistakurqan. Ëwakuptinnam Samuelpis pëwan ëwarqan.
27 Markapita yarqurëkarnam Samuelqa Saulta nirqan: “Sirweqnikita nï+ puntata ëwanampaq”. Tsëmi sirweqninta puntäratsiptin, Samuelqa Saulta nirqan: “Juk rätu shuyäri, Teyta Dios ima ninqanta willanaqpaq”.
Nötakuna
^ Kënöpis niyanmi: täran; päran.
^ Hebreu idiömachöqa “un cuartu de siclu” ninmi. 1 sicluqa 11,4 grämusmi lasaq. Rikäri “Masllata musyanapaq” neqchö B14 kaqta.
^ Hebreu idiömachöqa “shonquykichö llapan këkanqantam” ninmi.
