1 Tesalonicensis 3:1-13
3 Tsëmi manana aguantëta puëdir Atënaschö japalläkuna quedakuyänä mas alli kanqanta pensayarqä,+
2 y Cristupita alli noticiakunata willakoq Diospa sirweqnin* wawqintsik Timoteutam mandayämurqä.+ Pëtaqa mandayämurqä, markäkuyanqëkichö o yärakuyanqëkichö mas alli kayänëkipaq yanapayäshurniki, alli aguantaqta* tikratsiyäshunëkipaq y shoqayäshunëkipaqmi,
3 tsënöpa sufrimientukunapa pasayaptiki markäkuyanqëki o yärakuyanqëki mana ushakänampaq.* Awmi, qamkunaqa musyayankim sufrimientukunapita mana libri kanqantsikta.*+
4 Qamkunawan këkarqa, imëka sufrimientukunapa pasanantsikpaq kaqtam niyarqaq, y musyayanqëkinöpis tsënömi pasashqa.+
5 Tsëmi manana aguantëta puëdir, Diablu* imanöllapapis tentayäshunqëkita mantsar+ y llapan rurayanqäkuna mana kaqllapaq mana kanampaq, Teyta Diosman imanö markäkuykäyanqëkita o yärakuykäyanqëkita musyanäpaq Timoteuta mandamurqä.+
6 Tsënö kaptimpis, Timoteuqa tsëllaran qamkunapita kutimushqa,+ y Teyta Diosman markäkuyanqëkichö o yärakuyanqëkichö alli këkäyanqëkita y kuyakoq kayanqëkitam willayämashqa. Tsënöllam willayämashqa, kuyayämarnï yarpäyämanqëkita y noqakunanölla qamkunapis rikäyämëta munayanqëkita.
7 Tsëmi wawqikuna y panikuna, imëkata sufrirpis* y imëkata pasarpis, qamkunarëkur y Teyta Diosman alli markäkuyanqëkirëkur o yärakuyanqëkirëkur shoqashqa kayarqö.+
8 Qamkuna Señorpa kaqchö firmi këkäyaptikiqa, noqakunaqa kallpayoqmi tikrayä.
9 ¿Y imanöraq qamkunapita y rikëninchö alläpa kushikuyanqäpita, Teyta Diosta agradecikuyäman?
10 Paqasta junaqtam llapan kallpäkunawan Teyta Diosta rogakuyä qamkunaman shayämunäpaq, tsënöpa markäkuyanqëkichö o yärakuyanqëkichö mas alli kayänëkipaq yanapayänaqpaq.+
11 Diosnintsik y Teytantsik, y Señornintsik Jesus permitïkuyätsun qamkunaman shayämunäpaq.
12 Y Señor yanapëkuyäshuy, noqakuna alläpa kuyayanqaqnölla, qamkunapis jukniki juknikikuna y wakinkunata mas kuyayänëkipaq.+
13 Tsënöpa Señornintsik Jesus+ limpiu sirweqninkunawan këkämunqan tiempuchö, Diosnintsikpa y Teytantsikpa rikëninchö, shonquykikunata alli tsarakoqta, culpannaqta y limpiuta tikratsinampaq.+
Nötakuna
^ O capazchi “yanapaqnin”.
^ O “kallpayoqta”.
^ O “sufrimientukunapa pasar mana kuyutsishqa kayänëkipaq”.
^ O “tsëkunapa pasanapaq carguta chaskinqantsikta”.
^ Griëgu idiömachöqa “Tentakoq” ninmi.
^ Griëgu idiömachöqa “wanarpis” ninmi.
