1 Tesalonicensis 4:1-18
4 Usharinapaq wawqikuna y panikuna, noqakunaqa Teyta Diosta kushitsiyänëkipaq imanö kawayänëkipaq kaqtam yachatsiyarqaq,+ y qamkunaqa tsënömi kawëkäyanki. Peru kananqa Señor Jesuspa jutinchömi qamkunata mañayaq y rogayaq, masraq tsëta rurar sïguiyänëkipaq.
2 Qamkunaqa musyayankim Señor Jesuspa jutinchö niyanqaqta.*
3 Teyta Diosqa këtam munan: limpiu nunakuna* kayänëkita+ y oqllanakur melanëpaqkunata rurëpita* cuidakuyänëkita.+
4 Limpiu nuna+ y Diospa rikëninchö alli kayänëkipaqmi,* cada ünu cuerpuykikunata dominëta yachayänëki,+
5 y ama Teyta Diosta mana reqeq juk nacion nunakunanöqa,+ oqllanakuyta löcuyëpa y ërayëpa munayëtsu.+
6 Manam pï nunapis derëchun kaqpita masta rurar creikoq mayimpita* tsë asuntuchö provechakunantsu. Puntata willayanqaqnö y cläru niyanqaqnöpis, tsëkunata ruraqkunataqa Teyta Jehovämi* castiganqa.
7 Teyta Diosqa manam melanëpaqkunata rurar kawanapaqtsu qayamarquntsik, sinöqa limpiu nunakuna kanapaqmi.+
8 Tsëmi tsëta mana kaqpaq churaqqa, manam nunatatsu mana kaqpaq churëkan, sinöqa qamkunaman santu espïritunta churamoq+ Teyta Diostam.+
9 Tsënö kaptimpis, familianö kuyanakuy asuntupaqqa manam qamkunaman qellqayämünatsu.+ Qamkunataqa kikin Teyta Diosmi jukniki juknikikuna kuyanakuyänëkipaq yachëkätsiyäshunki.+
10 Rasumpa kaqchöqa, Macedoniachö këkaq llapan wawqikunawan panikunawanmi tsëtaqa rikätsikuykäyankina. Tsënö kaptimpis, wawqikuna y panikuna, tsëta masraq rurar sïguiyänëkipaqmi niyaq.*
11 Noqakuna niyanqaqnölla, yamë kawakuyänëkipaq,+ jukpa asuntunman mana mëtikuyänëkipaq+ y trabajayänëkipaq churapakäyë,+
12 tsënöpa nunakuna alli portakuyanqëkita rikäyänampaq+ y imatapis mana munayänëkipaq.
13 Manam tsëllatsu wawqikuna y panikuna, manam munayätsu wanushqakunata* ima pasanampaq kaqta mana musyayänëkita,+ tsënöpa imatapis mana shuyaraqkunanö alläpa mana llakikuyänëkipaq.+
14 Jesus wanunqanman y kawamunqanman creirqa,+ Jesuswan juntu kayänampaq wanushqakunata Jesusrëkur Teyta Dios kawaritsimunampaq kaqtapis creintsikmi.+
15 Teyta Jehoväpa* palabran ninqanman yarpëkurmi këta niyaq: noqantsikpita Señor këkämunqanyaq kawëkaqkunaqa, manam imanöpapis wanushqa kaqkunata puntäshuntsu.
16 Awmi, kikin Señormi mandakur, arcangelnö parlar+ y Diospa trompëtan waqëkaptin ciëlupita urämunqa, y Cristupa wanushqa qateqninkunam puntata kawariyämunqa.+
17 Tsëpitanam, noqantsikpita kawëkaqkunaqa, pëkunawan juntu Señorwan tinkunapaq+ pukutë rurinman apashqa kashun+ y tsënömi imëpis Señorwan këkäshun.+
18 Tsëmi tsë palabrakunawan jukniki juknikikuna shoqanakur këkäyë.
Nötakuna
^ O “mandayanqaqta”.
^ O “Diospaq rakishqa”.
^ Griëgu idiömachö: pornëia. Rikäri “Bibliachö palabrakunata entiendinapaq” neqta.
^ O “respetayäshunëkipaqmi”.
^ Griëgu idiömachöqa “wawqimpita” ninmi.
^ Kënöpis niyanmi: nï.
^ Griëgu idiömachöqa “wanuychö punuykaqkunata” ninmi.
