1 Timoteu 1:1-20
1 Salvamaqnintsik Teyta Dios y shuyarar këkänapaq yanapakoq Cristu Jesus munayaptin,+ Cristu Jesuspa apostolnin noqa Pablupita,
2 tsurï cuenta+ creikoq mayï Timoteupaq:*+
Dios Teyta y Señornintsik Cristu Jesus qamwan alläpa alli këkuyätsun, llakipëkuyäshuy* y yamë kanëkipaq yanapëkuyäshuy.
3 Macedoniata ëwakunäpaqna këkarmi Ëfesuchö quedakunëkipaq nirqaq, tsënöllam kanampis qamta mandaq, llutankunata yachatsikoqkunata tsëta manana rurayänampaq ninëkipaq,
4 y uli o llulla cuentukunata+ y unë kastakunapa jutinkunapaq qellqayanqanta mana cäsuyänampaq. Tsëkunaqa tiempullatam perditsikun,+ y mas markäkunapaq o yärakunapaq Teyta Diospita imallatapis yachatsimänapa rantinmi, mana rikätsikuyta puëdiyanqanta nunakunata parlatsin.
5 Rasumpa kaqchöqa, tsë mandakuyqa* limpiu shonquwan kuyakoq kanapaq,+ alli concienciayoq kanapaq y rasumpa markäkunapaqmi o yärakunapaqmi+ yanapamäshun.
6 Tsëkunata mana kaqpaq churarmi, wakinkunaqa mana cäbeqkunapaq discutir këkäyan.+
7 Pëkunaqa leypita yachatsikuytam munayan,+ peru manam parlayanqanta ni imëkanöpa defendiyanqanta entiendiyantsu.
8 Noqantsikqa musyantsikmi Leyta alli cumplishqaqa, Leyqa alläpa alli kanqanta.
9 Manam tsëllatsu, leyqa manam allita ruraqkunapaqtsu, sinöqa leyta mana cäsukoqkunapaq+ y munayanqanta ruraqkunapaq, Teyta Diosta mana respetaqkunapaq, jutsata* ruraqkunapaq, jukkunata dejaqkunapaq* y sagrädu kaqta mana respetaqkunapaq, papäninta y mamäninta wanutseqkunapaq o wañutseqkunapaq, asesïnukunapaq,
10 oqllanakur melanëpaqkunata ruraqkunapaq,* ollqu mayinwan oqllanakoqkunapaq,* nuna mayinkunata suwar apakoqkunapaq, ulikoqkunapaq o llullakoqkunapaq, änikuyanqanta mana cumpleqkunapaq* y alli* yachatsikuykunapa contran imatapis ruraqkunapaq.+
11 Tsëkunaqa cargüchö këkaq kushishqa Teyta Diospita shamoq alläpa alli noticiakuna ninqannömi këkan.+
12 Señornintsik Cristu Jesuspita poderta chaskishqa karmi alläpa agradecikü. Pëqa confiakamarmi sagrädu trabäjuta ruranäpaq cargüman churamarqan,+
13 puntata Teyta Diosta ofendishqa këkaptï, imëkata rurar sirweqninkunata sufritsishqa këkaptï y mana respetakoq këkaptïpis.+ Tsënö kaptimpis, mana musyar y mana markäkoq o yärakoq kar, tsëkunata rurashqa kaptïmi llakipämarqan.*
14 Peru Señornintsikqa noqawanmi alläpa alli kashqa, y Cristu Jesuspa qateqnin karmi markäkoq o yärakoq y kuyakoq kä.
15 Kë ninqäqa confiakuypaq y creipaqmi: Cristu Jesusqa jutsa* ruraqkunata salvaqmi kë munduman shamurqan,+ pëkunapitaqa noqam mas jutsa ruraq kä.+
16 Tsënö kaptimpis, noqataqa llakipämarqan, noqa wakimpita mas jutsa* ruraq kaqwan, Cristu Jesus alläpa pacienciayoq kanqanta rikätsikunampaqmi, tsënöpa imëyaqpis kawëta tariyänampaq pëman markäkoqkunapaq o yärakoqkunapaq ejemplu kanäpaq.+
17 Kananqa imëpis Gobernëkaq,+ mana ismur ushakaq+ y mana rikakoq+ japallan Teyta Dios,+ imëyaqpis respetashqa katsun y chipapëkar këkätsun. Tsënö kallätsun.*
18 Kuyë tsurillä Timoteu, Diospa willakoqninkuna qampaq puntallapitana willakunqannömi tsëta ruranëkipaq mandaq, tsënöpa tsëkunarëkur alli soldädunö pelyar këkänëkipaq,+
19 alli markäkur o yärakur y alli concienciayoq kar.+ Tsëtam wakinkunaqa mana kaqpaq churayashqa, y tsërëkurmi lamarchö hundikaq barcunö, markäkoq o yärakoq kayanqan ushakashqa.
20 Pëkunachömi Himeneuwan+ Alejandrupis këkäyan, pëkunataqa corregishqa kar Teyta Diosta mana ofendita yachakuyänampaqmi Satanasta entregarqö.+
Nötakuna
^ Tsëqa “Diosta väleqpaq churaq” ninanmi.
^ Kënöpis niyanmi: ankupëkuyäshuy; kuyapëkuyäshuy.
^ O “tsë mandakunqäqa; tsë ninqäqa”.
^ Kënöpis niyanmi: pecäduta.
^ O “mana rasumpa kuyakoqkunapaq”. Tsënö nirqa, Teyta Dios o pëta adorëta dejëpaqpis parlëkanmanmi.
^ O “sänu; yanapakoq”.
^ O “ardëlla juraqkunapaq”.
^ Rikäri “Bibliachö palabrakunata entiendinapaq” neqta.
^ Griëgu idiömachöqa “ollquwan oqllanakoq ollqukunapaq” ninmi.
^ Kënöpis niyanmi: ankupämarqan; kuyapämarqan.
^ Kënöpis niyanmi: pecädu.
^ Kënöpis niyanmi: pecädu.
^ O “Amen”.
