1 Timoteu 3:1-16
3 Kë ninqäqa confiakuypaqmi: pï nunapis anciänu* këta munarqa,+ alläpa alli rurëtam munëkan.
2 Tsëmi anciänuqa* kanan, imapitapis mana parlashqa, juk warmiyoqlla, imëkachöpis controlakuyta yachaq, alli juiciuyoq,+ ordenädu, nunakunata shumaq chaskita gustaq,+ alli yachatsikuyta yachaq.+
3 Manam machakoqtsu,+ lïsutsu* ni pensanqanllächö tsarakoqtsu kanan.+ Manam pleytuta asheqtsu+ ni qellëta kuyaqtsu+ kanan.
4 Familiantam shumaq dirigita yachanan, y wamrankunapis cäsukoq y alli portakoqmi kayänan+
5 (juk nuna familianta shumaq dirigita mana yacharqa, ¿imanöraq Teyta Diospa congregacionninchö kaqkunata cuidanqa?).
6 Manam tsëllaraq creikoq tikrashqatsu kanan,+ tsënöpa mana allish tukunampaq y Diablu chaskinqan condënata mana chaskinampaq.
7 Congregacionchö mana kaqkunapis pëpaqmi allita parlayänan,*+ tsënöpa imapitapis mana parlashqa kanampaq y Diablupa trampanman mana ishkinampaq.
8 Tsënöllam siervu ministerialkunapis* respetëpaq kayänan, manam ishkëtatsu parlayänan,* manam alläpa vïnuta upuyänantsu y manam engañakur imatapis tarita munaqtsu kayänan,+
9 sinöqa limpiu concienciawanmi creikunqantsik pakarëkaq sagrädu noticia ninqannö imëpis kawayänan.+
10 Manam tsëllatsu, puntataqa carguta chaskinampaqnö kayanqantaraq rikäyë,* tsëpitana imapitapis mana acusashqa karqa,+ siervu ministerial* kayätsun.
11 Tsënöllam warmikunapis respetëpaq y mana calumniakoq kayänan.+ Controlakuytam yachayänan y imëkachöpis confiakuypaqmi kayänan.+
12 Siervu ministerialkunaqa* juk warmiyoqlla kayätsun, y wamrankunata y familiankunata shumaq dirigita yachayätsun.
13 Jukkunata shumaq sirweq nunakunaqa, alli rikashqam këkäyan y Cristu Jesusman markäkuyanqampitam o yärakuyanqampitam mana mantsakushpa* parlëta puëdiyan.
14 Ichikllachöna qamman shamuyta munarpis, këkunatam qamman qellqamü,
15 tsënöpa imanöpapis qepämuptïqa Teyta Diospa familian kar imanö portakunëkipaq kaqta musyanëkipaq.+ Tsë familiaqa kawëkaq Diospa congregacionninchö kaqkunam kayan, pëkunaqa rasumpa kaqtam väleqpaq churayan y defendiyan.
16 Awmi, llapan shonquntsikwan Teyta Diosta pï sirwita puëdinqampita pakarëkaq sagrädu noticiaqa alläpa väleqmi: ‘Pëqa nunaman tikrarmi rikakurqan,+ espïritu cuerpuyoq këkarmi+ allita ruraqnö rikashqa karqan, angelkunatam yuripurqan,+ mëtsë nacionchömi pëpaq willakuyarqan,+ kë munduchö nunakunam pëman creiyarqan+ y Teyta Diosmi ciëluchö chaskir puëdeq këman churarqan’.
Nötakuna
^ O “cristiänukunata dirigeq”.
^ O “cristiänukunata dirigeqqa”.
^ O “maqakoqtsu”.
^ O “pëta allim rikäyänan”.
^ O “manam engañakoqtsu kayänan”.
^ O “cristiänukunata yanapaqkunapis”.
^ O “rurëta puëdiyanqanta rikäyë”.
^ O “cristiänukunata yanapaq”.
^ O “Cristiänukunata yanapaqkunaqa”.
^ O “confianza”.
