2 Crönicas 14:1-15
14 Tsëpitanam Abïasqa wanukurqan y David Markamanmi pampayarqan.+ Tsënam Asä jutiyoq tsurin gobernar qallëkurqan. Pë gobernanqan witsanqa chunka watapam alli kawakuyarqan.
2 Asäqa Jehovä Diosta cäsukurmi allikunata rurarqan.
3 Juk nacion nunakuna adorayanqan santukunapa altarninkunata,+ sagrädu altu sitiunkunata, sagrädu columnankunata+ y Aserä santupa postinkunatam* ushakätsirqan.+
4 Y Judä nunakunatam nirqan unë kastankunapa Diosninkuna Jehoväta sirwiyänampaq y Leyninta y mandakunqankunata cäsukuyänampaq.
5 Tsënöllam Judächö+ sagrädu altu sitiukunata y inciensuta rupatsiyänan altarkunatapis ushakätsirqan. Asä gobernanqan witsankunaqa llapankunam kushishqa kawakuyarqan.
6 Tsënö alli tiempu kaptinmi, Asäqa Judächö alli murallashqa markakunata ruratsirqan.+ Jehovä Dios yanapaptinmi tsë witsanqa guërra karqantsu.+
7 Asämi Judäta kënö nirqan: “Cäsukunqantsikpitam Jehovä Diosnintsik yanapamarquntsik, tsëmi mëtsëchöpis alli kawakuykantsik. Judä nacionqa podernintsikchömi këkan. Alli kawakunqantsikyaq markakunata rurashun y alli següru kanampaq murällakunata y törrikunata rurashun,+ y punkunkunatapis alli següruta rurashun”. Ruratsinqan markakunaqa alli segürum karqan.+
8 Gobernanti Asäpaqa, Judächömi trescientus mil soldädunkuna karqan, llapan soldädukunapam jatusaq escüdunkuna y lanzankuna karqan. Benjaminchönam doscientus ochenta mil valienti soldädunkuna karqan, y llapan soldädukunapam taksha escüdunkuna y flëchana arcunkuna karqan.+
9 Tsëpitanam Etiopïapita Zërah jutiyoq nuna atacanampaq ëwarqan juk millon soldädunkunawan y trescientus carrëtankunawan.+ Maresä markaman chäriyaptinmi,+
10 Asäpis soldädunkunawan ëwarqan pëkunawan pelyanampaq. Maresä amänunman chärirnam Zefäta pampaman churanakuyarqan.
11 Tsëchö këkarmi Asäqa Jehovä Diosman+ kënö nir mañakurqan: “Teyta Jehovä, qamqa chikimaqnïkuna mëtsika kayaptin y noqakuna wallkaqlla kayaptïpis+ venciyänäpaq yanapayämëta puëdinkim. Tsëmi rogakallämü yanapëkayämänëkipaq. Teyta Jehovä qamman confiakurmi,+ kë mëtsikaq soldädukunawan pelyayänäpaq jutikichö shayämurqö.+ Teyta Jehovä, qammi Diosnïkuna kanki. Ama permitïkullëtsu kë nunakuna venciyäshunëkita”.+
12 Tsënö mañakuptinmi Jehovä Diosqa Asätawan Judä soldädukunata yanaparqan, tsëmi etïopi soldädukunaqa qeshpir ëwakuyarqan.+
13 Y Asäwan soldädunkunaqa wanutsir wanutsir Guerar sitiuyaq qatipayarqan.+ Jehovä Diosmi soldädunkunawan ushakätsirqan. Y Judä soldädukunaqa imëkankunatam apakuyarqan.
14 Tsëpitanam Judä soldädukunaqa Guerarpa amänun markakunachö nunakunata atacarnin imëkankunata apakuyarqan, tsë nunakunaqa Jehovä Diostam mantsayarqan.
15 Tsënöllam carpakunachö* täkoqkunatapis* atacayarqan, y üshankunata y camëllunkunatam mëtsikata apakuyarqan. Tsëpitanam Jerusalen markata kutikuyarqan.
Nötakuna
^ Rikäri “Bibliachö palabrakunata entiendinapaq” neqchö “sagrädu posti” neqta.
^ Kënöpis niyanmi: toldukunachö.
^ Kënöpis niyanmi: täraqkunatapis; päraqkunatapis.