2 Crönicas 19:1-11
19 Tsëpitanam Judäpa gobernantin Jehosafatqa, Jerusalenchö palaciunman guërrapita sänu y yamë kutirqan.+
2 Tsënam Dios rikätsinqankunata willakoq Jehüpa+ tsurin Hananï+ taripëkur Jehosafat-ta nirqan: “¿Imanirtaq mana alli nunakunata yanapanki+ y Jehovä Diosta chikeqkunata kuyanki?+ Tsëta ruranqëkipitam Jehoväqa qamwan cölerashqa këkan.
3 Tsënö kaptimpis, Teyta Diosqa alli nuna kanqëkitam rikëkan.+ Qamqa Aserä santupa postintam* ushakätsirqunki y llapan shonquykiwanmi Teyta Diosta sirwita munanki”.+
4 Jerusalen markachömi Jehosafatqa täkurqan.* Y yapëmi Beer-Sëbapita qallëkur Efrainpa jirkankunayaq+ ëwar, unë kastankunapa Jehovä Diosninkunata adorayänampaq nunakunata yachatsirqan.+
5 Entëru Judächö këkaq alli murallashqa markakunamanmi juezkunata churarqan.+
6 Tsë juezkunatam nirqan: “Imatapis alli pensëkur rurayanki. Qamkunaqa Jehovä Diospa jutinchömi juzgayänëki, y manam nunakunapa jutinchötsu. Juzgayanqëki höraqa Teyta Diosmi qamkunawan këkanqa.+
7 Imatapis allita rurayanki, Jehovä Diosnintsiktaqa manam gustantsu pitapis mana allipa juzgayanqëki+ ni wakinkunallapa biennin+ kayanqëki. Ama ima pägutapis chaskipakuyankitsu+ y Jehovä Diosnintsikta respetayanki”.*+
8 Tsënöllam Jehosafatqa Jerusalen markaman levïtakunata, sacerdötikunata y familiankunachö dirigeqkunata juez kayänampaq churarqan. Pëkunam nunakunapa problëmankunata arreglarqa Jehoväpa leyninta cumpliyänan karqan.+
9 Tsë juezkunatam kënö mandarqan: “Qamkunaqa llapan shonquykikunawan Jehovä Diosta respetarninmi* rasun kaqllata rurayänëki.
10 Më markapitapis juk nuna, nuna mayinta wanutsiyanqampita demandakoq shayämuptin+ o Diosnintsikpa leyninta, mandakunqankunata y ninqankunata mana cäsukuyanqampita demandakoq shayämuptinqa, alli parlapäyanki cäsukuyänampaq y Jehovä Diosta mana cöleratsiyänampaq. Tsëta mana rurayaptikiqa Diosnintsikmi qamkunawan y wakinkunawampis cöleranqa. Qamkunapis culpayoqmi kayanki.
11 Jehovä Diosnintsikta sirwinqantsik asuntuchö arreglëta yanapayäshunëkipaqmi, mandakoq sacerdöti Amarïas këkan.+ Y gobernantipa leynin asuntuchö arreglëta yanapayäshunëkipaqnam Ismaelpa tsurin Zebadïas këkan. Levïtakunanam cortichö yanapayäshunki. Valienti kayë y jinan höra trabajar qallayë. Alli kaqta ruraqkunataqa Jehovä Diosnintsikmi yanapëkuyäshunki”.+
Nötakuna
^ Rikäri “Bibliachö palabrakunata entiendinapaq” neqchö “sagrädu posti” neqta.
^ Kënöpis niyanmi: tärarqan; pärarqan.
^ Hebreu idiömachöqa “mantsayanki” ninmi. Rikäri “Bibliachö palabrakunata entiendinapaq” neqta.
^ Hebreu idiömachöqa “mantsarninmi” ninmi. Rikäri “Bibliachö palabrakunata entiendinapaq” neqta.