2 Crönicas 25:1-28
25 Amasïasqa veinticincu watayoq këkarmi gobernar qallarqan y Jerusalen markachömi veintinuëvi watapa mandakurqan. Mamäninqa Jerusalen markapita Jehoadan jutiyoq warmim karqan.+
2 Amasïasqa Jehovä Diosta cäsukur allikunata rurarpis, manam llapan shonqunwantsu cäsukurqan.
3 Poderninchö llapankuna tikrariptinnam, Amasïasqa sirweqninkunata wanutsirqan papäninta wanutsiyanqampita.+
4 Tsënö kaptimpis, tsë wanutseqkunapa tsurinkunataqa manam wanutsirqantsu. Moises qellqanqan Jehovä Diospa Leyninchömi kënö mandakoq: “Manam papäkunaqa wamrankuna jutsata* rurayanqampita wanuyänantsu o wañuyänantsu, ni wamrankunapis papäninkuna jutsata rurayanqampita wanuyänantsu. Jutsata ruraqqa kikinmi wanunan”. Tsënö niptinmi wanutsirqantsu.+
5 Tsëpitanam Amasïasqa Judächö llapan ollqukunata qayatsirqan. Pëkunaqa chëkurmi cada familiapa mandaqninkunawan churakäyarqan. Mandaqninkunaqa mil soldädukunapa y cien soldädukunapa mandaqninkunam kayarqan. Tsënömi rurarqan Judäpa y Benjaminpa+ llapan kastankunawan. Tsëpitanam veinti watayoqpita+ witsëpa yupatsirqan, y llapanqa alli pelyëta yachaq y lanzatapis y jatun escüdutapis alli utilicëta yachaq trescientus mil soldädukunam kayarqan.
6 Tsëpitanam tres mil cuatrocientus veinti kïlus* pläta qellëta pagakuykur Israelpita cien mil soldädukunata contratarqan.
7 Tsënam Teyta Diospa willakoqnin chëkur nirqan: “Teytë, Israel soldädukunataqa manam Jehovä Dios yanapantsu,+ ama pëkunataqa pushëtsu. Efraimpa kastankunataqa manam Diosnintsik yanapantsu.
8 Mana cäsukur tsë soldädukunata pushaptikiqa, chikeqnikikunatam Teyta Dios yanapanqa venciyäshunëkipaq. Pëqa poderyoqmi pitapis munanqanta yanapanampaq o ushakätsinampaq.+ Tsëmi mas alliqa kanqa japallëki ëwanqëki, y valientim kanëki”.
9 Tsënö niptinnam Amasïas nirqan: “¿Tsëqa imanöraq arreglashaq tres mil cuatrocientus veinti kïlus* paganqä qellëta kutitsiyämänampaq?”. Tsënam Diospa willakoqninqa nirqan: “Jehovä Diosqa tsëpitapis masta tarinëkipaqmi yanapashuynikita puëdin”.+
10 Tsëmi Amasïasqa Efrainpita ëwaq soldädukunata nirqan wayinkunata kutikuyänampaq. Tsëmi pëkunaqa Judä nunakunapa contran alläpa cölerayarqan, y tsënö cölerashqam wayinkunata kutikuyarqan.
11 Tsëpitanam Amasïasqa soldädunkunawan mana mantsashpa Kachi pampata+ ëwëkur, Seirpita+ diez mil soldädukunata wanutsiyarqan.
12 Tsënöllam diez mil soldädukunata kawëkaqta prësurir feyu jirkaman apëkur, llapankunata ushakaqpaq jitamurqan.
13 Amasïas guërrachö kanqanyaqmi, kutikoq soldädukunaqa+ Samariapita+ qallëkur Bet-Horonyaq+ Judä markakunata atacarnin tres mil nunakunata wanutsiyarqan y imëkankunata apakuyarqan.
14 Edomïta soldädukunata ushakätsinqampita kutimurnam, Amasïasqa Seirchö täkoq* nunakunapa santunkunata apamurqan.+ Y tsë santukunatam adorar qallëkurqan, y qarëkunatam rupatsir qoyätsirqan o qoshnïtsirqan.
15 Tsëmi Jehovä Diosqa Amasïaswan alläpa cölerakurqan y willakoqnintam kënö ninampaq mandarqan: “¿Imanirtaq tsë nunakunapa santunkunata adoranki? Tsë santukunaqa manam atacar ushakëkätsiptikipis tsë markachö nunakunata salvarqantsu”.+
16 Tsënö parlapëkaptinmi gobernantiqa nirqan: “¡Upälla kë!+ Qamtaqa manam consejamaqnï kanëkipaqtsu churarqoq.+ O, ¿wanutsiyäshunëkitaku munanki?”. Tsënam Diospa willakoqninqa nirqan: “Parlapanqaqta mana cäsukur tsëta ruranqëkipitam Teyta Diosqa ushakätsishunki”. Tsënö nirirmi upälla quedakurqan.+
17 Tsëpitanam Judächö gobernaq Amasïasqa, consejaqninkunata alli tapurir Israelchö gobernaq Jehoasman willakoqkunata mandarqan. Jehoasqa karqan Jehoacazpa tsurin y Jehüpa willkanmi. Pëtam niyarqan: “Rasumpa puëdirqa soldäduykikunata pusharkurshi Amasïaswan pelyayänëkipaq ëwanki”.+
18 Tsënam Israelpa gobernantin Jehoasqa, Judäpa gobernantin Amasïasta kënö niyänampaq mandakurqan: “Amasïasta kënö niyë: ‘Lïbanuchö cedru qerum, kashata nirqan: “Tsurïwan warmi tsurikita casatsishun”. Tsënö nikaptinmi kashataqa, juk chukaru animal ëwarnin jarur ushakäratsirqan’.
19 Qamqa, ‘edomïta+ soldädukunatam ushakätsirqö’ nirmi alabakur këkanki, y masraq alabayäshunëkitam munëkanki. Tsënö alabakurpis palaciu wayikillachö quedakuy, ama pelyaq shamuytsu. Pelyaq shamuptikiqa qamta y Judä nunakunatapis ushakätsiyashqëkim”.
20 Tsënö nikaptimpis, Amasïasqa manam cäsurqantsu.+ Tsënöqa cäsukurqantsu, Edom nunakunapa santunkunata adoranqampita+ chikeqninkuna wanutsiyänanta o wañutsiyänanta Teyta Dios munaptinmi.+
21 Tsëmi Israelpa gobernantin Jehoasqa pelyayänampaq soldädunkunawan ëwarqan. Y Judächö këkaq Bet-Sëmes+ markachömi gobernanti Amasïaswan y soldädunkunawan pelyayarqan.
22 Peru Judä soldädukunatam israelïta soldädukuna venciyarqan, tsëmi mantsakar wayinkunata kutikuyarqan.
23 Tsënam Israelpa gobernantin Jehoasqa, Judäpa gobernantin Amasïasta Bet-Sëmes markachö prësurqan. Amasïaspa papäninqa Jehoasmi karqan y Jehoaspa papäninnam Jehoacaz* karqan. Prësurirnam Amasïastaqa Jerusalen markaman aparqan. Tsëchömi Efrain Punkupita+ qallëkur Esquïna Punkuyaq+ markapa murällanta juchuratsirqan.* Juchutsinqan perqapa largunqa cientu setenta y öchu metrusnömi* karqan.
24 Palaciu wayichö churaraq y Obed-Edom cuentanchö katsinqan Teyta Diospa templunchö llapan öruta, pläta metalta y llapan cösaskunatam apakurqan.+ Tsënöllam wakin nunakunatapis prësuskir aparqan. Tsë llapanta aparkurmi Samaria markata kutikurqan.
25 Israelpa gobernantin+ Jehoacazpa tsurin Jehoas wanukunqampitaqa, quinci wata masraqmi Judäpa gobernantin Jehoaspa+ tsurin Amasïasqa+ kawarqan.
26 Gobernanti Amasïas ruranqankunapitaqa, Judächö y Israelchö Gobernaqkunapaq Willakoq Librum masllata willakun.
27 Teyta Jehoväta mana cäsukur mana allikunata Amasïas rurar qallëkuptinllanam, nunakunaqa Jerusalenchö contran churakäyarqan.+ Tsëmi Lakis markata qeshpir ëwakurqan, peru chikeqninkunaqa Lakis markaman ëwëkur wanutsiyänampaqmi nunakunata mandayarqan.
28 Wanuratsirnam o wañuskatsirnam cawalluman cargarkur Judäman apayarqan y unë kastankuna pamparäyanqanmanmi pampayarqan.
Nötakuna
^ Kënöpis niyanmi: pecäduta.
^ Hebreu idiömachöqa “100 talentus” ninmi. 1 talentuqa 34,2 kïlusmi karqan. Rikäri “Masllata musyanapaq” neqchö B14 kaqta.
^ Hebreu idiömachöqa “100 talentus” ninmi. 1 talentuqa 34,2 kïlusmi karqan. Rikäri “Masllata musyanapaq” neqchö B14 kaqta.
^ Kënöpis niyanmi: täraq; päraq.
^ Hebreu idiömachöqa “400 cödusmi” ninmi. 1 cöduqa 44.5 centïmetrusmi mideq. Rikäri “Masllata musyanapaq” neqchö B14 kaqta.
^ Kënöpis niyanmi: laqmaratsirqan.
^ Pëtaqa Ocozïas nirpis reqiyaqmi.
