2 Crönicas 31:1-21
31 Fiesta ushariptinnam, tsëchö juntarëkaq israelïtakunaqa Judächö markakunapa ëwarnin sagrädu columnakunata,+ Aserä santupa postinkunata,*+ sagrädu altu sitiukunata+ y altarkunata+ ushakätsiyarqan. Tsënöllam ushakätsiyarqan Benjaminpa, Efrainpa y Manasespa+ kastankuna kawayanqan markakunachöpis. Tsëpitanam israelïtakunaqa markankunata kutikuyarqan.
2 Ezequïasqa templuchö trabajayänampaqmi sacerdötikunata+ y levïtakunata grüpu grüpu churarqan.+ Cada sacerdötita y cada levïtatam churarqan qarëkunata rupatsiyänampaq,+ Teyta Dioswan amïgu kayanqanta rikätsikoq qarëkunata rupatsiyänampaq, imachöpis yanapakuyänampaq, agradecikur alabayänampaq y Jehoväpa templumpa patiun punkunkunachö cantayänampaq.+
3 Gobernanti Ezequïaspis, kikimpatam aparqan rupatsiyänampaq qarëkunata,+ tsënöllam aparqan Jehoväpa Leynin mandakunqannö patsa waraptin y tardiyaptin,+ säbadu junaqkuna,+ llullu killa junaqkuna+ y fiesta junaqkuna+ rupatsiyänampaqpis.
4 Tsëpitanam Ezequïasqa, Jerusalenchö nunakunata nirqan sacerdötikunapa y levïtakunapa+ derëchunkunata apayänampaq. Tsënöqa nirqan Jehoväpa leynin ninqannö sacerdötikuna y levïtakuna alli cumpliyänanta munarmi.
5 Apayänampaq mandakuptinmi israelïtakunaqa punta yarqoq tsaki mikuyta, vïnuta, aceitita+ y mielta apayarqan. Chakrachö llapan wayunqampa+ punta cosëchantam mëtsika diezmuta apayarqan.+
6 Tsënöllam Israel markakunachö y Judä markakunachö täkoqkunapis* wäkakunata, üshakunata y Jehovä Diospaq rakiyanqan cösaskunata diezmuta apayarqan.+ Y chäratsirmi monton monton dejayarqan.
7 Tsë watapa kima kaq killanchömi, qarëkunata apar qallayarqan+ y qanchis kaq killachömi apar ushayarqan.+
8 Tsë apayanqanta rikëkurmi Ezequïaswan dirigentikunaqa kushikur Jehovä Diosta alabayarqan, y israelïtakunata bendicïkunampaqmi Teyta Diosman mañakuyarqan.
9 Tsë monton monton apayanqan qarëkunata rikëkurmi Ezequïasqa sacerdötikunatawan levïtakunata tapurqan.
10 Tsënam Sadocpa familianchö mandakoq sacerdöti Azarïas nirqan: “Jehoväpa templunman qarëkunata+ apamur qallayanqampitaqa, llapankunapis pacha juntam mikuykäyan y mëtsikaran sobrampis. Jehovä Diosnintsik llapan sirweqninkunata bendiciptinmi rikëkäyanqëkinöpis qarëkuna mëtsikaraq sobrashqa”.+
11 Tsënö niptinmi, Ezequïasqa tsë qarëkunata churayänampaq Jehoväpa templunchö cuartukunata alistayänampaq mandakurqan.+ Tsëmi pëkunaqa alistayarqan.
12 Israelïtakunaqa seguïdum apayarqan qarëkunata, diezmukunata+ y Diosnintsikpaq rakiyanqan cösaskunata. Y levïta Conanïastam churayarqan tsë llapanta cuentanchö katsinampaq, y yanapanampaqnam churayarqan Simeï jutiyoq wawqinta.
13 Gobernanti Ezequïas mandakuptinmi, Conanïastawan wawqin Simeïtaqa yanapayarqan Jehiel, Azazïas, Nähat, Asahel, Jerimot, Jozabad, Eliel, Ismakïas, Mähat y Benäya. Y Azarïasnam Teyta Diospa templunta cuentanchö katsirqan.
14 Templupa juk kaq* lädun punkuchö täpakoq levïta+ Imnäpa tsurin Corëtanam, churayarqan Jehovä Diospaq apayanqan qarëkunata+ cuentanchö katsinampaq.+ Pëmi tsë qarëkunata y sagrädu qarëkunata+ sacerdötikunata rakipoq.
15 Corëpa mandädunchönam kayarqan Eden, Miniamin, Jesüa, Semäya, Amarïas y Secanïas.+ Pëkunaqa sacerdötikuna kawayanqan markakunachömi kayarqan y confiakuypaq karmi chaskiyanqan qarëkunataqa sacerdöti mayinkunata atskaq o wallkaq kayaptimpis igualpa llapanta rakipuyaq.+
16 Tsënöllam Jehoväpa templunchö trabajayänampaq cada junaq shamoqkunata y grüpunkunachö yanapakoqkunatapis tsë qarëkunata rakipäyaq. Tsë nunakunapa tsurinkunapa jutinkunaqa, kima watayoqpita witsëpam familiankuna apuntaranqan libruchö apuntaraq.
17 Sacerdötikunataqa ima familiapita kayanqanta cuentaman churëkurmi censayaq,+ y levïtakunatapis ima grüpupita kayanqanta cuentaman churëkurmi veinti watayoqpita witsëpa censayaq.+
18 Teyta Diosta sirwiyänanllapaq akrashqa kayaptinmi, ima familiapita kayanqanta cuentaman churëkur warminkunatapis, ollqu y warmi tsurinkunatapis y pishi wamrankunatapis censayarqan. Tsënömi levïtakunataqa llapan familiankunatawan censayarqan.
19 Tsënöllam Aaronpa kastan sacerdötikunatapis markachö o qewayoq markakunachö kawayaptimpis llapankunata censayarqan.+ Cada markachö censashqa sacerdötikunata y levïtakunata mikuynin rakipuyänampaqmi nunakunata jutipa jutipa akrarir churayarqan.
20 Tsënömi Ezequïasqa entëru Judächö rurarqan. Ezequïas ruranqankunaqa Jehovä Dios munanqannömi llapampis karqan.
21 Ezequïasqa llapan shonqunwanmi templuchö rurëkunata ruratsirqan, tsënöllam Teyta Diospa+ Leyninta y mandakunqankunatapis llapan shonqunwan cumplirqan. Tsëmi ima ruranqampis alli karqan.
Nötakuna
^ Rikäri “Bibliachö palabrakunata entiendinapaq” neqchö “sagrädu posti” neqta.
^ Kënöpis niyanmi: täraqkunapis; päraqkunapis.
^ O “inti o rupay yarqamunan”.
