2 Crönicas 32:1-33
32 Teyta Diosta cäsukur Ezequïas imëkata rurëkaptinmi,+ Asiria nacionpa gobernantin Senaqueribqa Judäta ëwarnin markakunata atacarqan. Alli murallashqa markakunapa entëru lädunman soldädunkunawan churanakuskirmi atacarnin yëkuyarqan.+
2 Jerusalen markatapis atacanampaq Senaquerib ëwashqa kanqanta musyarirmi, Ezequïasqa
3 dirigentikunawan y soldädunkunawan parlayarqan markapa amänunchö këkaq pukyukunata tsaparkuyänampaq.+
4 Tsëmi mëtsikaq nunakunata qayëkatsir llapan pukyukunata y ëwëkaq yakukunata tsapayarqan. Kënömi niyarqan: “Asiria nacionpa gobernantinkuna shamurqa ama ni ima yakutapis tariyätsuntsu”.
5 Markapa ishkishqa murällankunatam altsatsirqan y rikachakuyänampaqmi törrikunata ruratsirqan. Murälla waqtampanam juk murälla masta ruratsirqan. Tsënöllam David Markachö këkaq Milö* perqatapis altsatsirqan+ y mëtsika armakunata y escüdukunatam ruratsirqan.
6 Tsëpitanam nunakunapa mandaqninkuna kanampaq soldädukunata churarqan, y llapan nunakunatam marka yëkuna pläzaman qayëkatsir mana mantsapakuyänampaq kënö nirqan:
7 “Ama mantsakäyëtsu, valienti kayë. Ama Asiria nacionpa gobernantinta+ y mëtsikaq soldädunkunata rikarnin mantsakäyëtsu. Pëkunawanqa ichikllam këkäyan, peru noqantsikwanqa mëtsikam këkäyan.+
8 Senaqueribtaqa nunakunallam* yanapëkäyan, peru noqantsiktaqa Jehovä Diosnintsikmi yanapëkämantsik. Pëmi yanapamäshun y guërrachöpis pelyamunqam”.+ Judächö gobernaq Ezequïas tsënö niptinmi llapan nunakuna valienti tikrayarqan.+
9 Senaqueribqa llapan soldädunkunawanmi Lakis+ markachö këkarqan. Tsë markapitam Judächö gobernaq Ezequïasta y Jerusalenchö+ llapan nunakunata kënö niyänampaq soldädunkunata mandarqan:
10 “Asiriachö gobernaq Senaqueribmi kënö niyäshunki: ‘¿Piman confiakurtaq entërupa atacanäpaqna kanqanta rikëkarpis Jerusalenpita yarquyankitsu?+
11 ¿Manaku cuentata qokuyanki, “Asiriapa gobernantimpitaqa Jehovä Diosnintsikmi salvamäshun” nir Ezequïas engañayäshunqëkita? Pëqa tsënö niyäshunki, mallaqëpita y yakunëpita wanutsiyäshunëkipaqmi o wañutsiyäshunëkipaqmi.+
12 ¿Manaku pëqa adorayanqëki Diospa altarninta+ y sagrädu altu sitiukunatapis juchutsir* ushashqa?+ Tsënö ushakäratsirpis, ¿manaku Judächö y Jerusalenchö nunakunataqa niyäshurqunki juk altarllachöna qarëkunata qoyätsir o qoshnitsir Diosta adorayänëkipaq?+
13 ¿Manaku musyayanki unë kastäkunapis y noqapis mëtsika markakunata ushakätsiyanqäta?+ Manam tsë markakunapa diosninkunaqa makïpita salvëta puëdirqantsu.+
14 Mä niyämë, ¿mëqan markakunapa diosninkunataq unë kastäkunapa y noqapa makïpita salvëta puëdishqa? Tsënö këkaptintsuraq qamkunapa Diosnikikunaraq makïpita salvëta puëdiyäshunki.+
15 Manam, unë kastäkuna ushakätsinqan ni noqa ushakätsinqä markakunapa ni nacionkunapa diosninkuna salvëta puëdirqantsu.+ ¿Tsënö këkaptintsuraq qamkunapa Diosnikikunaraq makïpita salvëta puëdiyäshunki?’”.+
16 Tsë soldädukunaqa Jehovä Diospaq y Ezequïaspaqpis masran mana allikunata parlayarqan.
17 Y Senaqueribpis Israelpa Diosnin Jehoväta ofendirninmi+ imëka mana allikunata qellqëkur cartata apatsirqan.+ Tsë cartachömi kënö qellqarqan: “Imanömi juk nacionkunapa diosninkunapis sirweqninkunata salvashqatsu,+ tsënöllam Ezequïas adoranqan Diospis sirweqninkunata makïpita salvanqatsu”.
18 Jerusalenman fäcil-lla yëkuyta munarmi, perqa jananchö këkaq soldädukunatapis mantsakätsir judïu idiömachö imëkata niyarqan.+
19 Juk marka nunakuna adorayanqan santukunapaq parlayanqannöllam, Jerusalenchö adorayanqan Teyta Diospaqpis mana allita parlayarqan.
20 Tsënö niyaptinmi gobernanti Ezequïaswan Diospa willakoqnin Isaïasqa,+ Teyta Dios yanapëkunampaq rogakuyarqan. Isaïasqa Amozpa tsurinmi karqan.+
21 Tsënö rogakuyaptinmi Jehovä Diosqa juk angelninta mandamurqan. Tsë angelmi Asiriachö gobernantipa puëdeq soldädunkunata+ y mandaqninkunata campamentunchö llapanta ushakätsirqan. Tsëmi Asiriachö gobernantiqa markanman penqakushqa kutikurqan. Tsëchö këkarnam santumpa templunman yëkurqan, y tsëchömi wakin tsurinkuna espädawan wanutsiyarqan.+
22 Tsënömi Teyta Jehoväqa, gobernanti Ezequïasta y Jerusalenchö nunakunata Senaqueribpita y wakin chikeqninkunapita salvarqan. Y alli kawakuyänampaqmi yanaparqan.
23 Tsëmi Judächö gobernaq Ezequïastaqa+ mëtsë nacionchö täkoqkunapis* respetayarqan. Y alli qarëkunatam Ezequïaspaq apayaq y Jehovä Diospaqpis mëtsika qarëkunatam Jerusalenman apayaq.
24 Tsë witsankunam Ezequïasqa alläpa qeshyar wanunampaqna këkarqan. Tsëmi Jehovä Diosman mañakurqan.+ Y Teyta Diosqa mañakunqanta wiyarmi juk señalta rikätsirqan.+
25 Tsënö yanapëkaptimpis Ezequïasqa agradecikunampa rantinmi orgullösu tikrakurirqan. Tsëmi Teyta Diosqa Ezequïaswan, Judächö y Jerusalenchö nunakunawan cölerakurqan.
26 Peru Ezequïasqa cuentata qokurirmi, orgullösu tikrakurinqampita perdonta mañakurqan.+ Tsënöllam Jerusalenchö nunakunapis rurayarqan. Tsëmi Ezequïas kawanqan tiempuqa, Jehovä Dios pëkunawan cölerashqanatsu karqan.+
27 Ezequïasqa rïcu nunam tikrarqan y pïmëmi reqiyaq y respetayaq.+ Y pläta qellëta, öruta, shumaq rumikunata, balsamu aceitita, escüdukunata y imëka väleq cösaskunata churatsinampaqmi wayikunata ruratsirqan.+
28 Tsënöllam tsaki mikuykunata, vïnuta y aceitita churatsinampaqpis wayikunata ruratsirqan. Y üshankunapaq, cabrankunapaq y wakin animalninkunapaqpis corralkunatam ruratsirqan.
29 Imëkayoq kanampaq Teyta Dios bendiciptinmi markakunatapis ruratsirqan, y mëtsika wäkayoq, üshayoq y cabrayoqmi karqan.
30 Guihon+ niyanqan pashtaq yakutapis, Ezequïasmi jana kaq lädupa ëwaq kaqta tsaparkur+ inti o rupay jeqanan lädupa David Markaman+ chätsirqan. Ezequïas ruranqanqa llapampis allim yarqurqan.
31 Peru Ezequïaspa nacionninchö+ milagru pasanqanta musyëkurmi Babiloniachö dirigentikunaqa maslla musyëta munar nunakunata mandayarqan.+ Tsë nunakuna chäriyaptinmi, Ezequïastaqa Teyta Dios dejarirqan llapan shonqunwan cäsunqanta o mana cäsunqantapis musyëta munar.+
32 Ezequïas ruranqankunapita y Teyta Diosta cäsukunqampitaqa,*+ Amozpa tsurin Isaïas rikanqankunata qellqayanqanchömi willakun. Isaïasqa+ Diospa willakoqninmi karqan. Tsëkunaqa qellqarëkan Judächö y Israelchö Gobernaqkunapaq Willakoq Libruchömi.+
33 Ezequïas wanuriptinnam Davidpa tsurinkuna pamparäyanqanman+ witsaq näniman pampayarqan y Judächö y Jerusalenchö llapan nunakunam respëtuwan imëkata rurar pampayarqan. Tsëpitanam tsurin Manases gobernar qallëkurqan.
Nötakuna
^ Hebreu idiömachöqa “allpa qoturëkaq” ninmi.
^ Hebreu idiömachöqa “ëtsapita rikrallam” ninmi.
^ Kënöpis niyanmi: laqmatsir.
^ Kënöpis niyanmi: täraqkunapis; päraqkunapis.
^ Hebreu idiömachöqa “alläpa kuyakoq” ninmi.