2 Crönicas 33:1-25
33 Manasesqa+ döci watayoq këkarmi gobernar qallarqan. Jerusalen+ markachömi cincuenta y cincu watapa gobernarqan.
2 Manasesqa Jehovä Diosta mana cäsukurmi, Jehovä Dios qarqunqan unë nunakunanö imëka jutsata* rurarqan.+
3 Papänin Ezequïas ushakätsinqan sagrädu altu sitiukunatam altsarqan.+ Y Baal santukunapaqmi altarkunata ruratsirqan y Aserä santupa postinkunatapis* ruratsirqanmi. Y ciëluchö llapan këkaqtam adorarqan.+
4 Jehovä Diosmi nishqa karqan: “Jerusalen markam jutïpa imëpis reqishqa kanqa”.+ Teyta Jehovä tsënö nikaptinmi, Manasesqa Teyta Diospa templunchö santukunapaq altarkunata rurarqan.+
5 Jehoväpa templumpa ishkan patiunkunachömi, ciëluchö llapan këkaqpaq altarkunata ruratsirqan.+
6 Y santukunata adorarmi Hinon* pampachö+ këkaq altarchö wamrankunata ninawan rupatsirqan.+ Tsënöllam suerti qateq+ y brüju+ karqan. Y nunakunatam churarqan suertita qatitsiyänampaq y wanushqakunata o wañushqakunata tapuyänampaq. Manasesqa Jehovä Diosta cöleratsirmi imëka mana allikunata rurarqan.
7 Ruratsinqan santutam Teyta Diospa+ templunman churarqan. Tsë templupaqmi Davidtawan tsurin Salomonta Teyta Dios kënö nishqa karqan: “Israelchö këkaq llapan markakunapitam, kë templuta y Jerusalen markata akrarqö jutïpa imëyaqpis reqishqa kanampaq.+
8 Y sirwimaqnï Moisestawan qellqatsinqä Leyta, mandakunqäta y ninqäkunata cumpliyaptinqa, manam israelïtakunata qarqushaqtsu unë kastankunata entreganqä nacionpita”.
9 Tsënö nikaptimpis Manasesqa manam cäsukurqantsu. Y Jehovä Dios ushakätsinqan unë nacion nunakuna rurayanqampitapis mas mana allikunatam Judächö y Jerusalenchö nunakunata ruratsirqan.+
10 Manam Manases ni llapan nunakunapis Jehovä Dios parlapaptin cäsuyarqantsu.+
11 Tsëmi Jehovä Diosqa, Asiria soldädukunapa mandaqninkunata mandarqan Judächö nunakunaman ëwayänampaq. Pëkunam ëwarnin Manasesta prësuyarqan, tsëpitanam ganchukunawan y cobripita rurashqa cadënawan watarkur Babiloniaman apayarqan.
12 Tsënam alläpa sufrirnin, unë kastankunapa Diosnin Jehoväman perdonta mañakur rogakurqan.
13 Alläpa rogakuptinmi Teyta Diosqa llakiparnin* rogakunqanta wiyarqan, tsëmi Jerusalenman kutitsirqan yapë gobernanampaq.+ Tsëran Manasesqa entiendirqan Jehovä rasumpa Dios kanqanta.+
14 Tsëpitanam Manasesqa David Markapa+ murällan waqtampa juk murälla masta alli altuta sharkatsirqan. Tsë murällataqa perqatsirqan Guihonpa+ amänun pampapita* qallëkur hasta Pescädu Punkuyaqmi,+ y Ofel+ niyanqampam tumamoq. Y Judächö alli següru markakunamanmi soldädukunapa mandaqninkunatapis churarqan.
15 Tsëpitanam mandakurqan Teyta Jehoväpa templunman+ churatsinqan santukunata+ y Jehoväpa wayin këkanqan jirkachö y Jerusalenchö ruratsinqan altarkunata karuman apëkur jitayänampaq.
16 Tsëpitanam Jehoväpa altarninta+ alistaratsir Teyta Dioswan amïgu kayanqanta rikätsikoq qarëkunata+ y agradecikur apanqan qarëkunata+ rupatsirqan. Y Judächö llapan nunakunatam nirqan Israelpa Diosnin Jehoväta sirwiyänampaq.
17 Tsënö nikaptimpis nunakunaqa sagrädu altu sitiukunachömi Jehovä Diospaq qarëkunata rupatsiyaq.
18 Manases ruranqampita, Teyta Diosman mañakunqampita y Dios rikätsinqankunata willakoqkuna parlapäyanqampitaqa, Israelchö gobernaqkunapaq willakoq librum masllata willakun. Dios rikätsinqankunata willakoqkunaqa parlapäyarqan Israelpa Diosnin Jehoväpa jutinchömi.
19 Tsënöllam Dios rikätsinqankunata willakoq nunakuna qellqayarqan Teyta Diosman Manases rogakunqanta,+ rogakunqanta Teyta Dios wiyanqanta, manaraq arrepentikur imëka jutsata* ruranqanta,+ sagrädu altu sitiukunata ruratsinqanta,+ Aserä santupa postinkunata* ruratsinqanta y mana väleq santukunata ruratsinqanta.
20 Manases wanuriptinnam wayin lädunman pampayarqan. Tsëpitanam Amon jutiyoq tsurin gobernar qallëkurqan.+
21 Amonqa+ veintidos watayoq këkarmi gobernar qallarqan. Jerusalen+ markachömi ishkë watapa gobernarqan.
22 Amonqa papänin Manasesnöllam+ Jehovä Diosta mana cäsukur mana allikunata rurarqan. Y papänin Manases ruratsinqan santukunata adorarmi imëka qarëkunata rupatsirqan.+
23 Amonqa manam papäninnötsu Teyta Jehoväpa rikëninchö arrepentikurqan,+ tsëpa rantinqa imëkä mana allita rurarmi mas jutsayoq* tikrarqan.
24 Tsënam kikimpa sirweqninkunalla contran churakar+ wayinchö wanuratsiyarqan o wañuratsiyarqan.
25 Peru tsë markapita nunakunaqa Amonta+ wanutseqkunata wanuskatsirmi, tsurin Josïasta+ gobernanti churayarqan.
Nötakuna
^ Kënöpis niyanmi: pecäduta.
^ Rikäri “Bibliachö palabrakunata entiendinapaq” neqchö “sagrädu posti” neqta.
^ Kënöpis niyanmi: ankuparnin; kuyaparnin.
^ Tsëqa këkarqan, inti o rupay jeqanan läduchömi.
^ Rikäri “Bibliachö palabrakunata entiendinapaq” neqchö “sagrädu posti” neqta.
^ Kënöpis niyanmi: pecäduta.
^ Kënöpis niyanmi: pecäduyoq.
