2 Crönicas 4:1-22
4 Tsëpitanam cobripita altarta ruratsirqan,+ tsë altarpaqa largumpis y anchumpis isqun mëtrum* karqan y altunnam chusku metru pullan* karqan.
2 Tsënöllam yakuta winayänampaq cobrita tsulluykatsir jatun redondu lavatoriuta+ rurarqan. Tsë lavatoriutam Mar nir jutin churayarqan. Tsë lavatoriupa anchunqa cäsi chusku metru pullanmi* karqan, altunnam ishkë metru mas* karqan y tumatsipa mediyaptinnam trëci metrus mas* karqan.+
3 Tsë lavatoriupa pullan pachampam calabäzu niraq adornukuna+ ishkë fïla karqan. Cada cuarenta y cincu centïmetruschömi* chunka calabäzukuna karqan. Tsëtaqa jatun lavatoriuwan juntullatanam ruratsirqan.
4 Tsë jatun lavatoriutaqa,* cobripita rurashqa döci törukunapa waqtanmanmi churayarqan.+ Törukunaqa waqtapuram kayarqan, kimam rikaraq norti läduman, kimam rikaraq inti o rupay jeqanan läduman, kimam rikaraq sur läduman y kimanam inti o rupay yarqamunan läduman.
5 Tsë lavatoriupa raktanqa qanchis centïmetru masmi* karqan. Y shiminqa cöpapa shiminnömi o liriu wëtanömi karqan. Tsë lavatoriumanqa sesenta y seis mil* litrusmi yaku yëkoq.
6 Tsëpitanam jatusaq chunka tïnakunata ruratsirqan. Y templupa derëcha lädunmanmi pitsqata churatsirqan y izquierda lädunmannam pitsqata churatsirqan.+ Tsë tïnakunachö winaraq yakuwanmi, animalkunata rupatsir+ utilizäyanqan cösaskunata awiyaq.* Peru Mar niyanqan jatun lavatoriuchö yakutaqa sacerdötikunam utilizäyaq chakinkunata y makinkunata awikuyänampaq.*+
7 Tsëpitanam imanö rurayänampaq+ dibujarëkanqantanölla chunka candelabrukunata örupita+ ruratsir templuman churatsirqan, derëcha lädumanmi pitsqata y izquierda lädumanmi pitsqata churatsirqan.+
8 Tsënöllam chunka mësakunata ruraratsir, templuman churatsirqan pitsqata derëcha läduman y pitsqata izquierda läduman.+ Y tazonkunatapis örupitam cienta ruratsirqan.
9 Tsëpitanam sacerdötikuna+ trabajayanqan patiuta,+ jatun patiuta+ y jatun patiupa punkunkunata ruratsirqan. Y cada punkutam cobriwan laqatsirqan.
10 Y Mar niyanqan jatun lavatoriutanam templupa yëkuna frentinman churatsirqan.+
11 Tsënöllam Hiramqa baldikunata, pälakunata y tazonkunata+ rurarqan.
Tsënömi Hiramqa, Salomon contratanqannölla Teyta Diospa templumpaq llapanta rurar usharqan.+
12 Tsë ruranqankunaqa karqan: ishkë jatusaq columnakuna,+ columnakunapa puntanchö ishkë jatusaq adornukuna, tsë jatusaq adornukunachö ëwaq cadënakunapita rurashqa mällakuna,+
13 tsë mällakuna jananchö ishkë fïlapa ëwaq granäda früta niraq cuatrocientus adornukuna+ y jatusaq adornukunata tazonnö tsaparaqkunam. Tsë jatusaq adornukunaqa columna+ puntanchömi karqan.
14 Tsënöllam karqan chunka carrëtakuna,*+ carrëtakunapa jananchö ëwaq chunka tïnakuna,
15 Mar niyanqan jatun lavatoriu y tsëta tsaränampaq*+ döci törukuna.
16 Tsënöllam rurarqan baldikunata, pälakunata, trinchikunata+ y mas cösaskunata. Tsë llapantam Hiram-Abivqa+ Jehovä Diospa templumpaq Salomon contratanqannölla cobripita chipapäkoqta rurarqan.
17 Gobernanti Salomonqa mandakurqan, mitupita moldita rurëkur cobrita tsulluykatsir winayänampaqmi. Tsëtaqa rurayarqan Jordan mayupa* kuchun pampachömi, Sucot+ sitiuwan Zeredä sitiu tinkoqchö.
18 Salomonqa mëtsika cösaskunatam ruratsirqan. Tsëmi ëka cobrita utilizanqantapis pesatsirqantsu.+
19 Tsënöllam Salomonqa Teyta Diospa templunchö kanampaq cösaskunata+ ruratsirqan: örupita altarta,+ Teyta Diospaq tantata+ churayänan mësakunata,+
20 alli kaq örupita+ candelabrukunata y chiwchikunata. Tsë chiwchikunam, Teyta Dios mandakunqannö Alläpa Sagrädu Cuartu punkuchö atsikyänan karqan.
21 Tsënöllam mas alli kaq örupita ruratsirqan wëtakunata, chiwchikunata, mëchata upitsina* pinzakunata,
22 chiwchi upitsinakunata,* tazonkunata, cöpakunata y carbonta puritsiyänankunata. Y Alläpa Sagrädu Cuartupa+ punkunkunata y templupa punkunkunatapis örupitam ruratsirqan.+
Nötakuna
^ Hebreu idiömachöqa “10 cödus” ninmi. 1 cöduqa 44.5 centïmetrum mideq. Rikäri “Masllata musyanapaq” neqchö B14 kaqta.
^ Hebreu idiömachöqa “20 cödus” ninmi. 1 cöduqa 44.5 centïmetrusmi mideq. Rikäri “Masllata musyanapaq” neqchö B14 kaqta.
^ Hebreu idiömachöqa “10 cödusmi” ninmi. 1 cöduqa 44.5 centïmetrusmi mideq. Rikäri “Masllata musyanapaq” neqchö B14 kaqta.
^ Hebreu idiömachöqa “5 cödus” ninmi. 1 cöduqa 44.5 centïmetrusmi mideq. Rikäri “Masllata musyanapaq” neqchö B14 kaqta.
^ Hebreu idiömachöqa “30 cödus” ninmi. 1 cöduqa 44.5 centïmetrusmi mideq. Rikäri “Masllata musyanapaq” neqchö B14 kaqta.
^ Hebreu idiömachöqa “1 cödu” ninmi. 1 cöduqa 44.5 centïmetrusmi mideq. Rikäri “Masllata musyanapaq” neqchö B14 kaqta.
^ Tsë lavatoriutaqa, “Mar” nirmi reqiyaq.
^ Hebreu idiömachöqa “3.000 batus” ninmi. 1 batuqa 22 litrusmi karqan. Rikäri “Masllata musyanapaq” neqchö B14 kaqta.
^ Hebreu idiömachöqa “1 palmu menor” ninmi. Rikäri “Masllata musyanapaq” neqchö B14 kaqta.
^ Kënöpis niyanmi: paqayaq; mayllayaq.
^ Kënöpis niyanmi: paqakuyänampaq; mayllakuyänampaq.
^ O “yakuta puritsina carrëtakuna”.
^ Kënöpis niyanmi: achkuränampaq.
^ Kënöpis niyanmi: riupa.
^ Kënöpis niyanmi: wañutsina.
^ Kënöpis niyanmi: wañutsinakunata.
