2 Crönicas 7:1-22
7 Salomon mañakur ushariptinnam,+ ciëlupita nina shamur+ altarman churayanqan qarëkunata y mëtsika ëtsata llapanta ushaskirqan. Y Teyta Jehoväpa poderninmi templuman juntarirqan.+
2 Tsëmi Jehovä Diospa podernin Jehoväpa templunman juntashqa kaptin, sacerdötikunaqa Jehoväpa templunman yëkuyta puëdiyarqantsu.+
3 Llapankunam rikäyarqan nina urämoqta y Jehovä Diospa podernin templuman juntareqta. Tsëmi nunakunaqa patsaman lätakëkur, “pëqa allim, pëqa imëpis alläpa kuyakoqllam këkan” nir Jehovä Diosta alabayarqan.
4 Tsëpitanam gobernanti Salomonwan llapan nunakuna, mëtsika animalkunata pishtëkur Jehovä Diospaq rupatsiyarqan.+
5 Salomonqa Teyta Diospaqmi veintidos mil törukunata y cientu veinti mil üshakunata pishtëkur rupatsirqan. Tsënömi Salomonwan llapan israelïtakunaqa Teyta Diospa templunta usharatsir fiestata rurayarqan.+
6 Levïtakunanömi sacerdötikunapis Jehovä Diosta alabar cantar y instrumentukunata tocar shëkäyarqan.*+ Gobernanti Davidmi ruratsishqa karqan instrumentukunata Jehovä Diosta agradecikurnin y alabarnin pëkunawan* tocayänampaq y cantayänampaq. “Pëqa imëpis alläpa kuyakoqllam këkan” nirmi cantayarqan. Sacerdötikunaqa levïtakunapa puntanchömi trompëtakunata fuertipa tocayarqan,+ y llapan israelïtakunam shëkäyarqan.
7 Tsënam Salomonqa, Jehovä Diospa templun puntanchö këkaq cobripita altar+ mana tinkuptin ichik patiuta utilizäyänampaq* nirqan. Tsëchömi pishtashqa animalkunata,+ gränupita rurashqa qarëkunata+ y pishtayanqan animalkunapa wirankunata* rupatsiyarqan.+
8 Tsë kutim Salomonqa llapan israelïtakunawan, Teyta Diospaq qanchis junaq fiestata rurarqan.+ Tsë fiestamanqa mëtsë markapitam ëwayarqan, Lebö-Hamatpita* qallëkur hasta Egiptu pampa kuchunchö täkoqkunapis.*+
9 Tsë fiestaqa qanchis junaqmi karqan, y tsë fiesta ushariptimpis qanchis junaq masran karqan. Fiesta usharinqampita waräninnam, puwaq kaq junaqchö, llapankuna juntakäyarqan.+
10 Tsënam Salomonqa qanchis killapa veintitres junaqninchö, wayinkunata kutikuyänampaq nirqan. Tsëmi nunakunaqa Davidta, Salomonta y llapan israelïtakunata+ Jehovä Dios bendicishqa kanqanta rikar wayinkunata kushishqa kutikuyarqan.+
11 Tsënömi Salomonqa, Jehovä Diospa templunta y palaciu wayitapis+ ruratsir ushatsirqan. Yarpanqannöllam, Jehovä Diospa templunta y palaciu wayitapis llapanta ruratsir ushatsirqan.+
12 Tsënam Jehovä Diosqa, Salomonta paqaspa yuripur+ kënö nirqan: “Mañakamunqëkitaqa wiyarqömi. Tsëmi ruratsinqëki wayitaqa akrarqö animalkunata pishtëkur imëpis tsëchö noqapaq rupatsiyämunampaq.+
13 Y mana tamyatsimuptï, mikuykunata ushanampaq chukllushkunata* mandamuptï y raslla o saslla wanutsikoq qeshyata mandamuptï,
14 jutïpa reqishqa sirwimaqnïkuna+ perdonta mañakayämaptin+ y jutsa* rurëta dejariyaptinqa,+ mañakayämunqantam ciëlupita wiyamushaq y jutsankunapita* perdonarmi murukuyanqankunata bendicishaq.+
15 Kananqa, kë templupita mañakayämuptin rikëkämushaqmi y wiyëkämushaqmi.+
16 Kë wayitam akrarqö jutïpa imëpis reqishqa kanampaq.+ Y kë wayimanqa imëpis rikarëkämushaqmi y yarparëkäshaqmi.+
17 Qampis papäniki Davidnö llapan shonquykiwan cäsumar llapan leynïkunata, mandamientükunata y ninqäkunata cumpliptikiqa,+
18 Israelchö imëyaqpis kastëkikuna gobernayänampaqmi yanapashqëki.+ Papäniki Davidtam+ kënö nirqä: ‘Qampa kastëkipitam Israelchö imëpis gobernanti kayanqa’.+ Tsënö ninqätam cumplishaq.
19 Peru mandakunqäta y ninqäkunata mana cäsukur santukunata adorayaptikiqa,+
20 kë rikätsinqaq markakunapita qarqurninmi+ llapëkita* ushakätsiyashqëki, y jutïpa reqishqa kanampaq ruratsimunqëki wayitapis dejarishaqmi. Tsëmi mëtsë nacionpita nunakunaqa despreciayäshurniki asipäyäshunki.+
21 Kë wayita pasëpa* juchushqata* rikarninmi, tsëpa llapan pasaqkunaqa alläpa mantsakarnin+ kënö tapunakuyanqa: ‘¿Imanirtan Jehoväqa kë nacionta y kë wayita ushakätsishqa?’.+
22 Tsënam niyanqa: ‘Egiptupita unë kastankunata pushamoq+ Jehovä Diosninkunata qonqëkurmi+ santukunata adorayarqan,+ tsëmi kënö castigarqan’”.+
Nötakuna
^ Kënöpis niyanmi: ichirëkäyarqan.
^ Capaz levïtakunawan karqan.
^ Hebreu idiömachöqa “santificäyänampaq” ninmi.
^ Tsë wiraqa, Dioswan amïgu kayanqanta rikätsikurnin rupatsiyänampaq pishtayanqan animalpa wiranmi karqan.
^ O “Hamatman yëkunapita”.
^ Kënöpis niyanmi: täraqkunapis; päraqkunapis.
^ Kënöpis niyanmi: churqapikunata.
^ Kënöpis niyanmi: pecädu.
^ Kënöpis niyanmi: pecäduta rurayanqampita.
^ O “llapëki israelïtakunata”.
^ Kënöpis niyanmi: jankat.
^ Kënöpis niyanmi: laqmashqata.
