2 Crönicas 8:1-18
8 Jehovä Diospa templunta y palaciu wayitaqa, veinti watakunaran gobernanti Salomon ruratsir ushatsirqan.+
2 Tsëpitanam Salomonqa, Hiram+ entreganqan markakunata altsaratsir täkuyänampaq* israelïtakunata churarqan.
3 Tsëpitanam Hamat-Zobä markata atacarqan y pelyachö venciskirmi poderninchöna katsirqan.
4 Tsëpitanam tsunyaq sitiuchö këkaq Tadmor markatapis mas següru kanampaq altsatsirqan, y Hamatchö+ këkaq churakuyänan markakunatapis+ altsatsirqanmi.
5 Tsënöllam Bet-Horon Alta+ y Bet-Horon Bäja+ markakunata shäritsirqan y següru kanampaqmi murällan ruraratsir alli següru punkunkuna churatsirqan.
6 Tsënöllam Baalat+ markatapis shäritsirqan. Tsënömi Salomonqa churakuyänan markakunata, carrëtankuna churaränan markakunata,+ cawallunkuna montashqa pureq soldädukunapa cuartelninkunata ruratsirqan. Mëchöpis munanqanchömi Jerusalenchö kar, Lïbanuchö kar y më markakunachö karpis llapan munanqanta ruratsirqan.
7 Tsë witsankunaqa, israelïtakuna mana wanutsiyanqan amorreukunapa, hitïtakunapa, perizïtakunapa, heveukunapa y jebuseukunapa+ kastankunam Israelchö tëkäyarqanraq.+
8 Pëkunatam Salomonqa churarqan, imëkakunata rurarnin trabajayänampaq.+ Tsënöllam kananyaqpis trabajëkäyan. Pëkunapa papäninkunataqa manam israelïtakuna ushakätsita puëdiyarqantsu.+
9 Peru israelïtakunataqa, manam esclävutanötsu Salomon trabajatsirqan.+ Pëkunataqa churarqan soldädunkuna, soldädukunapa mandaqninkuna, carrëta manejaqkunapa mandaqninkuna y cawallunkunawan pureq soldädukunapa mandaqninkuna kayänampaqmi.+
10 Trabajaqkunata rikaq dirigentikunapa mandaqninkunaqa doscientus cincuentam kayarqan.+
11 Tsëpitanam Salomonqa kënö nirqan: “Jehovä Diospa Sagrädu Cäjan churaranqan sitiukunaqa mëchö karpis sagrädum,+ tsëmi warmï karpis israelïtakunapa gobernantin David täkunqan* wayichöqa kanantsu”. Tsënö nirmi Salomonqa faraonpa wamranta+ kikin ruratsinqan wayiman David Markapita aparqan.+
12 Tsëpitanam templupa pasadïzun puntanchö+ Jehovä Diospaq ruratsinqan altarchö,+ Jehovä Diospaq animalkunata pishtëkur rupatsirqan.+
13 Imëpis rurayanqannöllam säbadu junaqchö, llullu killa junaqchö+ y cada wata kiman fiestachö+ rurayarqan, tsëtaqa rurayarqan imanö rurayänampaq Moises mandakunqannöllam.+ Tsë fiestakunaqa karqan Levadürannaq Tantata Mikuna Fiesta,+ Cosëcha Qallanan Fiesta+ y Ramäda Fiestam.*+
14 Tsëpitanam papänin David ninqannölla templuchö trabajayänampaq sacerdötikunata grüpu grüpu churarqan.+ Tsënöllam levïtakunatapis Teyta Diosta alabayänampaq+ y sacerdötikunata turnupa cada junaq yanapayänampaq churarqan. Y punkukunachö turnupa täpakuyänampaqpis,+ Diospa sirweqnin David ninqannöllam, grüpu grüpu churarqan.
15 Sacerdötikunapis, levïtakunapis y churakuyänan cuartukunata cuentankunachö katseqkunapis gobernanti ninqannöllam rurayarqan.
16 Salomonqa Teyta Jehoväpa templumpa cimientunta ruratsir qallanqampita+ ushanqanyaqmi llapantapis shumaq ordenädu rurarqan. Tsënöpam Jehovä Diospa templunta shumaq ruratsir usharqan.+
17 Tsëpitanam gobernanti Salomonqa Ezion-Guëber+ y Elot+ sitiuta ëwarqan. Tsëqa karqan lamar kuchun Edom+ läduchömi.
18 Tsëmanmi Hiramqa+ barcunkunatawan alli manejëta yachaq sirweqninkunata mandarqan. Tsënam Salomonpa sirweqninkunawan Ofir+ sitiuta ëwarnin quinci mil trescientus noventa kïlus* öruta+ Salomonpaq apayämurqan.+
Nötakuna
^ Kënöpis niyanmi: täräyänampaq; pärayänampaq.
^ Kënöpis niyanmi: täranqan; päranqan.
^ Tsënö nirqa, wallka tiempullapa täkuyanqan ramädakunapaqmi parlëkan.
^ Hebreu idiömachöqa “450 talentus” ninmi. 1 talentuqa 34.2 kïlusmi karqan. Rikäri “Masllata musyanapaq” neqchö B14 kaqta.
