2 Pëdru 2:1-22
2 Tsënö kaptimpis, Israel nunakunachö Diospa willakoqnin tukoqkuna kayanqannömi, qamkunachöpis mana rasumpa kaqta yachatsikoqkuna kayanqa.+ Pëkunaqa markäkuyanqëkita o yärakuyanqëkita ushakätseq sectakunatam pakëllapa yuritsiyämunqa, y pëkunata ranteq duëñutam negayanqa.+ Tsënömi pëkunaman ushakë juklla chänampaq, kikinkuna culpayoq kayanqa.
2 Manam tsëllatsu, mëtsikaqmi mana penqakur mana allikunata rurayanqanta* qatiyanqa,+ y pëkunarëkurmi rasumpa kaq yachatsikuykunapita mana allita parlayanqa.+
3 Shumaqllapa engañayäshurnikim, imëkapaq ërayar qamkunapita provechakuyanqa. Peru unëpitana pëkunapaq patsätsishqa castïguqa manam demoramunqatsu,+ y ushakäyänan junaqqa segürum chämunqa.+
4 Jutsata* ruraq angelkunataqa manam Teyta Dios castïgunnaqta dejarqantsu,+ sinöqa juiciu tiempu chämunqanyaq tsëchö katsinampaqmi, Tartaruman*+ jitarkur pasëpa* ampeqman o tsakëman* cadenarkurqan.*+
5 Unë witsan mana cäsukoq nunakunatapis, manam castïgunnaqtatsu dejarqan.+ Peru Diosta mana respetaq nunakunata ushakätsinampaq alläpa tamyatsirpis,+ allita rurayänampaq willakoq Noëta+ y qanchis nunakunataqa següru sitiuchömi katsirqan.+
6 Sodöma y Gomörra markakunatapis ninawanmi pasëpa* ushakätsirqan.+ Tsënömi Teyta Diosta mana respetaq nunakunata shamoq tiempuchö ima pasanampaq kaqta rikätsikurqan.+
7 Tsënöllam allita ruraq Lot+ nunatapis salvarqan. Pëqa mana allita ruraq* nunakuna mana penqakur rurayanqanta* rikarmi alläpa llakikoq.
8 Pëkunachö kawanqan witsan, mana allikunata rurayanqanta rikar y wiyarmi, tsë allita ruraq nunaqa* waran waran alläpa llakikoq.
9 Awmi, Teyta Jehoväqa* yachanmi llapan shonqunwan sirweq nunakunata pruëbakunapita salvëta.+ Peru mana allita ruraq nunakunataqa, juiciu junaqchö ushakätsinampaqmi këkätsin.+
10 Masqa Teyta Diospa rikëninchö mana limpiu kayänanta munar jukkunawan oqllanakuyta gustaqkunata+ y autoridäyoq* kaqkunata despreciaqkunata.+
Mana mantsakoq y chukru shonqu karmi, pëkunaqa Teyta Dios väleqpaq churanqan kaqkunapaq mana alli parlëta mantsayantsu.
11 Peru angelkunaqa mas kallpayoq y mas poderyoq këkarpis, Teyta Jehoväta* respetarmi pëkunapaq mana allita parlayantsu.+
12 Peru tsë nunakunaqa, peqanman o umanman chanqanta ruraq, y ushakätsiyänampaq yureq animalkunanömi, mana musyayanqan asuntukunapaq mana allita parlayan.+ Pëkunaqa mana allikunata rurayanqanrëkurmi ushakäyanqa,
13 y mana allikunata rurar kawayanqanrëkurmi castigashqa kayanqa.
Pëkunaqa junaqpapis, imëka jananchö kawakuytam alläpa kushikuypaqtanö rikäyan.+ Pëkunaqa röpachö taqranö y cärachö siranömi kayan. Qamkunawan juntu mikupakuykarmi, engañakur yachatsikuyanqanta kushishqa* yachatsikuyan.+
14 Pëkunaqa jukwan* oqllanakuytam alläpa munayan,*+ y manam jutsa* rurëta dejëta puëdiyantsu, y manaraq alli patsakashqa këkaqkunatam tentar ushayan. Shonqunkunaqa imatapis ërayëpam munan.* Pëkunaqa maldicishqam kayan.
15 Alli kaq nänita dejarmi oqrakätsishqa kayashqa, y päguta alläpa munar mana allita ruraq Beorpa tsurin Balaam+ ruranqantam qatiyashqa,+
16 peru leyta mana cäsukunqampitam corregishqa karqan.+ Parlëta mana yachaq cargata apaq animalmi nunanö parlar, Diospa willakoqnin Balaam upa rurëta rurananta dejarqantsu.+
17 Pëkunaqa yakunnaq pukyunö y fuerti vientu apanqan pukutënömi kayan, y mas yana ampeqmi o tsakëmi* pëkunata shuyarëkan.+
18 Allish tukurmi imachöpis mana yanapakoqta parlayan. Jutsa* ruraq cuerpunkuna munanqanta munapätsir+ y mana penqakur mana allikunata rurarmi,* mana allita rurar kawakoqkunanö këta tsëraq dejashqakunata tentar ushayan.+
19 Wakinkunata libri kayänampaq änirpis, kikinkunaqa mana alli rurëkunapa esclävunmi kayan.+ Pï nunapis vencishqa karqa,* venceqnimpa esclävunmi tikran.+
20 Awmi, Señor y Salvakoq Jesucristuta alli reqir kë munduchö nunakuna rurayanqanta dejashqa këkar,+ yapë rurar tsëkuna dominananta dejarqa, puntata imanö kayanqampitapis mas mana allichömi ushayanqa.+
21 Alli kaqta rurar alli kawakuyta mana reqiyanqanmi, pëkunapaqqa mas alli kanman karqan, tsëkunata reqishqana këkar, chaskiyanqan sagrädu mandamientukunapita rakikäkuriyanqampitaqa.+
22 Rasunllata kënö niyanqanmi pëkunachö cumplikan: “Allquqa shonqun jitanqanta mikoqmi kutishqa, y armatsishqa kuchim leqitachö armakoq kutishqa”.+
Nötakuna
^ Këchö griëgu idiömachö “aselguëia” nirqa atskapaqmi parlëkan. Rikäri “Bibliachö palabrakunata entiendinapaq” neqta.
^ O capazchi, “pasëpa ampiraq uchkukunaman churarkurqan”.
^ Kënöpis niyanmi: tutapëman.
^ Kënöpis niyanmi: jankat.
^ Rikäri “Bibliachö palabrakunata entiendinapaq” neqta.
^ Kënöpis niyanmi: Pecäduta.
^ Kënöpis niyanmi: jankat.
^ O “leyta mana cäsukoq”.
^ Griëgu idiömachö: aselguëia. Rikäri “Bibliachö palabrakunata entiendinapaq” neqta.
^ Griëgu idiömachöqa “almaqa” ninmi. Rikäri “Bibliachö palabrakunata entiendinapaq” neqta.
^ O “mandakoq”.
^ O “ërayëpa kushishqa”.
^ O “mana majankunawan”.
^ O “Nawinkunaqa jukwan oqllanakuyta munëwanmi junta këkan”.
^ Kënöpis niyanmi: pecädu.
^ O “Shonqunkunatam imatapis ërayëpa munanampaq yachatsiyashqa”.
^ Kënöpis niyanmi: tutapëmi.
^ Kënöpis niyanmi: Pecädu.
^ Këchö griëgu idiömachö “aselguëia” nirqa atskapaqmi parlëkan. Rikäri “Bibliachö palabrakunata entiendinapaq” neqta.
^ O “Juk nunata imapis venciptinqa”.
