2 Rëyes 1:1-18
-
Ocozïas wanunampaq kaqta Elïas willakun (1-18)
1 Gobernanti Acab wanuriptinnam, moabïta+ nunakuna israelïtakunapa contran tikrayarqan.
2 Tsë witsankunam gobernanti Ocozïasqa, altuchö këkaq cuartumpa lädunchö rëja kaqpa jeqarpamurqan, tsëqa pasakurqan Samaria markachömi. Y mana alliyaqnö karmi yanapaqnin nunakunata kënö nirqan: “Ëwarnin Ecron+ markachö Baal-Zebub diosta tapurayämuy mä alliyäshaqkush o manakush”.+
3 Tsënam Teyta Jehoväpa angelninqa tisbïta Elïasta*+ kënö nirqan: “Ocozïaspa sirweqninkunawan nänichö tarinakuyänëkipaq jinan höra ëwë, y kënö nï: ‘¿Imanirtaq Israelchö Dios mana kaptinnöpis Ecron nunakunapa Baal-Zebub santunman tapukoq ëwëkäyanki?+
4 Jehovä Diosmi Ocozïaspaq nishqa, alliyänampa rantin wanunampaq kaqta’”. Tsënö niptinmi Elïasqa tsë nunakunawan tinkoq ëwarqan.
5 Sirweqninkuna kutiriyaptinnam Ocozïasqa, “¿imanirtan kutirayämurqunki?” nir tapurqan.
6 Pëkunanam kënö niyarqan: “Juk nunawanmi tinkuyarqö y qamta willayänaqpaqmi niyämashqa: ‘¿Imanirtaqshi Israelchö Dios mana kaptinnöpis Ecron nunakunapa Baal-Zebub santunman tapukoq mandayämarqunki? Alliyänëkipa rantinshi kananqa wanunki’.+ Tsënö kanampaqshi Jehovä Dios nishqa”.
7 Tsënö willayaptinnam Ocozïasqa nirqan: “Tsënö niyäshoqniki nunaqa, ¿imanötan karqan?”.
8 Pëkunanam niyarqan: “Röpanqa animalpa aqtsampita+ rurashqam karqan y wachukumpis qarapitam karqan”.+ Tsënö willariyaptinnam, “¡pëqa tisbïta Elïasmi kanqa!” nirqan.
9 Tsëpitanam Ocozïasqa, cincuenta soldädukunata y mandaqninkunata mandarqan Elïasta prësuyämunampaq. Tsënam jirkachö jamëkaqta Elïasta tarirnin soldädukunapa mandaqnin kënö nirqan: “Diospa willakoqnin,+ pushayänaqpaqmi gobernanti Ocozïas mandayämashqa”.
10 Tsënö niptinmi Elïasqa cincuenta soldädukunapa mandaqninta kënö nirqan: “Diospa willakoqnin kaptïqa, mä ciëlupita nina shamur+ qamta y cincuenta soldäduykikunata rupariyäshuy”. Tsënam ciëlupita nina shamur llapankunata rupaskirqan.
11 Gobernantiqa yapëmi cincuenta soldädukunata y mandaqninkunata mandarqan Elïasta prësuyänampaq. Tsënam soldädukunapa mandaqninqa Elïasta kënö nirqan: “Diospa willakoqnin, jinan höra pushayänaqpaqmi gobernanti Ocozïas mandayämashqa”.
12 Tsënö niptinmi Elïasqa cincuenta soldädukunapa mandaqninta kënö nirqan: “Diospa willakoqnin kaptïqa, mä ciëlupita nina shamur qamta y cincuenta soldäduykikunata rupariyäshuy”. Tsënam ciëlupita nina shamur llapankunata rupaskirqan.
13 Gobernantiqa yapëmi cincuenta soldädukunata y mandaqninkunata mandarqan Elïasta prësuyänampaq. Chëkurnam soldädukunapa mandaqninqa Elïaspa puntaman qonqurikurir kënö rogakurqan: “Teytallë, Diospa willakoqnin. Ama noqallätapis ni kë cincuenta soldädukunatapis wanuykatsiyämëtsu.
14 Ciëlupita nina shamurmi cien soldädukunata y ishkë mandaqninkunatapis rupashqa. Peru noqallätaqa ama wanuykatsimëtsu”.
15 Tsënö rogakuptinmi Teyta Jehoväpa angelninqa Elïasta nirqan: “Ama mantsëtsu, pëkunawan ëwë”. Tsënam Elïasqa gobernanti kaqta soldädukunawan ëwarqan.
16 Chëkurnam Elïasqa gobernantita kënö nirqan: “Jehovä Diosmi nin: ‘¿Imanirtaq Israelchö Dios mana kaptinnöpis+ Ecron+ nunakunapa Baal-Zebub santunman sirwishoqnikikunata tapukoq mandarqunki? ¿Imanirtaq noqata tapumarqunkitsu? Kananqa, alliyänëkipa rantinmi wanunki’”.
17 Tsënömi Jehovä Dios ninqanta Elïas willakunqannö Ocozïas wanurqan. Y pëpa rantin gobernanampaq Ocozïaspa tsurin mana kaptinmi, Jehoram*+ gobernar qallarqan. Jehoramqa+ Israelchö gobernar qallarqan, Jehosafatpa tsurin Jehoram ishkë watapa Judächö gobernëkaptinmi.
18 Gobernanti Ocozïas+ llapan ruranqankunapitaqa, Israelchö gobernaqkunapaq willakoq librum masllata willakun.
