2 Rëyes 10:1-36
10 Samaria markachömi Acabpa+ setenta tsurinkuna kayarqan. Tsëmi Jehüqa dirigentikunaman, autoridäkunaman+ y Acabpa tsurinkunata cuidaqkunaman cartata apatsirqan. Kënömi nirqan:
2 “Qamkunawanmi Acabpa tsurinkuna këkäyan y podernikikunachömi këkätsiyanki guërrapaq carrëtakunata, cawallukunata, imëka armakunata y alli murallashqa markatapis. Kë cartata chaskiyanqëki höra,
3 Acabpa tsurinkunapita mas valienti kaqta gobernantikikuna kanampaq churayë. Y Acabpa familianta defendiyänëkipaq alistakuyë”.
4 Pëkunanam mantsakarnin kënö ninakuyarqan: “Ishkaq gobernantita vencikarqa,+ masraqchi noqantsiktanäqa vencimäshun”.
5 Tsëmi palaciu wayita rikaq nuna, gobernadorkuna, dirigentikuna y Acabpa tsurinkunata cuidaqkuna Jehüman kënö nir cartakuyarqan: “Manam pitapis gobernantïkuna churayäshaqtsu. Qamtam sirwiyashqëki. Qam munanqëkinö imapis rurakätsun”.
6 Tsënö niyaptinmi, Jehüqa kënö nir cartata apatsirqan: “Rasumpa mandädüchö këta munarqa, warë kë höranö Acabpa tsurinkunapa peqankunata o umankunata Jezreel markaman apayämuy”.
Acabpa setenta tsurinkunaqa cuidaqnin nunakunawanmi këkäyarqan.
7 Cartata chaskirirnam Acabpa setenta tsurinkunata wanutsiyarqan.+ Y peqankunatam o umankunatam canastakunaman winarkur Jehüpaq apatsiyarqan Jezreel markaman.
8 Y willakoqnam Jehüta nirqan: “Acabpa tsurinkunapa peqankunatam o umankunatam apayämushqa”. Tsënam pëqa, “marka yëkunanman ishkë montonta montonëkur warëyaq dejariyätsun” nirqan.
9 Waräninnam llapan nunakunata kënö nirqan: “Qamkunaqa manam culpayoqtsu kayanki, noqam gobernantitaqa wanutsirqö.+ Peru ¿pitan kë nunakunataqa wanutsishqa?
10 Rikäyanqëkinöpis Jehovä Dios ninqanqa llapanmi cumplikanqa. Teyta Jehovämi nirqan Acabpa familianta+ ima pasanampaq kaqta. Jehovä tsënö ninqantaqa willakoqnin Elïasmi musyatsikurqan”.+
11 Tsëpitanam Jehüqa, Jezreel markachö këkaq Acabpa llapan familiankunata, reqinakushqankunata, yanapaqnin nunakunata y sacerdötinkunata+ wanutsirqan. Y manam jukllëllatapis kawëkaqta dejarqantsu.+
12 Tsëpitanam Jehüqa Samaria markata ëwarqan. Y nänichömi tinkuyarqan üshakunata rutoqkunawampis.*
13 Y Jehüqa tsëchömi Ocozïaspa+ wawqinkunawan tinkurqan. Pëkunatam, “pikunatan kayanki” nir tapurqan. Tsënam pëkunaqa niyarqan: “Ocozïaspa wawqinkunam kayä. Gobernantipa tsurinkunata y mamänimpa* wamrankunata watukaqmi ëwëkäyä”.
14 Tsënam Jehüqa, “jinan höra prësuyë” nirqan. Tsëpitanam üshakunata rutuyänan wayi lädun pözuchö llapanta wanutsiyarqan. Llapanqa cuarenta y dos ollqukunam kayarqan y manam jukllëllapis kawëkarqa quedarqantsu.+
15 Tsëpitanam Jehüqa Recabpa+ tsurin Jehonadabwan+ tinkurqan. Pëqa taripaqmi shamuykänaq. Y saludariptinmi Jehonadabta kënö tapurqan: “¿Qamta llapanchö yanapanqaqnötsuraq, qampis llapanchö yanapamanki?”.*
Tsënam Jehonadabqa, “awmi teytë” nirqan.
Tsënö niptinmi Jehüqa, “makikita makyamë” nir,carrëtanman sutarkurqan.
16 Tsëpitanam nirqan: “Aku ëwashun, kananmi rikanki Jehovä Diosta kuyanqäta”.*+ Tsënö nirmi Jehonadabta guërrapaq carrëtanchö apakurqan.
17 Y Samaria markaman Jehü chärirmi Acabpa llapan familiankunata ushakätsirqan.+ Tsënömi Jehovä Dios ninqanta Elïas willakunqan cumplikarqan.+
18 Tsëpitanam Jehüqa llapan nunakunata qayëkatsir kënö nirqan: “Acabqa janan shonqullam Baalta adorashqa.+ Peru noqaqa pëpitapis mas allim adorashaq.
19 Baalpaqmi mëtsika animalkunata pishtëkur rupatsishaq. Tsëmi Baalta llapan adoraqkunata+ willayänëki kë markaman shayämunampaq. Tsënölla willayë Baalpa sacerdötinkunata+ y willakoqninkunatapis. Mana shamoq kaqtaqa wanutsishaqmi”. Jehüqa tsënö nirllam wanutsinampaq llapankunata qayëkätsirqan.
20 Jehüqa kënömi mandakurqan: “Baalpaq jatun fiestata ruranantsikpaq kaqta willakuyë”. Tsëmi llapankunata willayarqan.
21 Tsëpitanam Jehüqa entëru Israelpa willakuyänampaq mandakurqan. Y musyarirmi Baal santuta llapan adoraqkuna ëwayarqan. Baal santupa templunchöqa+ juntam këkäyarqan.
22 Tsënam Jehüqa templuchö röpakunata katseq nunata nirqan: “Baalta adoraqkuna vistikuyänampaq röpankuna entreguë”. Tsëmi llapankunata entregarqan.
23 Tsëpitanam Jehüwan Recabpa tsurin Jehonadabqa,+ Baalpa templunman yëkuyarqan. Y Baalta adoraqkunatam Jehü nirqan: “Këchöqa Baalta adoraqkunallam kayänan. Jehoväta adoraqkunaqa manam jukllëllapis kanantsu, shamushqa kaqtaqa qarquyë”.
24 Tsëpitanam yëkuyarqan pishtashqa animalkunata y qarëkunata rupatsiyänampaq. Jehüqa ochenta soldädukunatam waqta punkuchö kayänampaq mandarqan y kënömi nishqa karqan: “Llapantam wanutsiyänëki. Jukllëllapis qeshpir ëwakuptinqa qamkunatam wanutsiyashqëki”.
25 Qarëkunata rupatsir usharirllam Jehüqa soldädukunata y mandaqninkunata nirqan: “¡Yëkamur llapankunata wanutsiyë, ama jukllëllapis qeshpir ëwatsuntsu!”.+ Tsënö niptinmi soldädukunawan mandaqninkunaqa wanutsir wanutsir ayakunata waqtaman jitayämurqan y tsënömi Baal santupa altarninyaq* chäyarqan.
26 Y Baal santupa templunchö sagrädu columnata+ jorqarirmi o jipiskirmi rupatsir ushayarqan.+
27 Tsënömi Baal santupa columnanta ushakätsiyarqan.+ Y templuntapis+ ushakäratsirmi bäñukunata rurayarqan. Tsë bäñukunaqa kananyaqmi këkan.
28 Tsënömi Jehüqa Baal santuta Israelchö ushakätsirqan.
29 Peru Jehüqa israelïtakunata jutsata* ruratseq Nebatpa tsurin Jeroboannöllam mana allikunata rurarqan. Tsëmi Betel markachö y Dan markachö+ këkaq örupita becërrukunata ushakätsirqantsu.
30 Jehovä Diosmi Jehüta kënö nirqan: “Qamqa allitam rurarqunki y pensanqänömi Acabpa llapan familianta+ wanutsirqunki. Tsëta ruranqëkipitam tsuriki, tsurikipa tsurin, tsurikipa willkan y willkampa tsurimpis Israelchö gobernayanqa”.+
31 Peru Jehüqa manam Israelpa Diosnin Jehovä mandakunqan Leyta cäsukurqantsu.+ Israel nunakunata Jeroboan jutsata* ruratsinqannöllam Jehüpis jutsata rurarqan.+
32 Tsë witsanmi Jehovä Diosqa israelïtakunata dejarqan chikeqninkuna ichikllapa ichikllapa ushakätsiyänanta. Siria nacionpa gobernantin Hazaelqa, Israelchö llapan markakunatam atacarqan.+
33 Jordan mayupa* wak tsimpachö llapan markakunatam atacarqan, Arnon pampa lädunchö këkaq Aroerpita qallëkur, Galaadchö y Basanchö markakunayaq.+ Tsëchöqa kawakuyaq gadïta, manasïta y rubenïta nunakunam.+
34 Gobernanti Jehü llapan ruranqankunapitaqa y puëdeq kanqampitaqa, Israelchö gobernaqkunapaq willakoq librum masllata willakun.
35 Jehü wanuriptinnam, Samaria markachö pampayarqan. Tsëpitanam Jehoacaz+ jutiyoq tsurinna gobernar qallëkurqan.
36 Jehüqa veintiöchu watapam Samaria markapita Israelta gobernarqan.
Nötakuna
^ Tsënö nirqa, “mitsikoqkuna millwata rutur üshankunata pankayänan wayipaqmi parlëkan”.
^ Pëqa karqan Jehorampa mamänin Jezabelmi.
^ O “¿Qamta mana dejanqaqnötsuraq, noqatapis dejamankitsu?”.
^ O “contran churakäyänanta mana munanqäta”.
^ Hebreu idiömachöqa “marka” ninmi. Capazchi juk murällanö karqan.
^ Kënöpis niyanmi: pecäduta.
^ Kënöpis niyanmi: pecäduta.
^ Kënöpis niyanmi: riupa.