2 Rëyes 12:1-21
12 Jehü+ qanchis watapa gobernëkaptinmi, Jehoasqa+ gobernar qallëkurqan. Jerusalen markachö cuarenta watapa gobernarqan. Mamäninqa Beer-Sëba+ markapita Zibïah jutiyoq warmim karqan.
2 Sacerdöti Jehoiadä yanapaptinmi, Jehoasqa Jehovä Diosta cäsukur llapantapis allita rurarqan.
3 Peru manam santukunata adorayänan sagrädu altu sitiukunataqa+ ushakätsiyarqantsu, y nunakunaqa tsë sagrädu altu sitiukunachömi santukunapaq qarëkunata rupatsir qoyätsiyaq o qoshnïtsiyaq.
4 Gobernanti Jehoasmi sacerdötikunata kënö nirqan: “Jehovä Diospaq apayämunqan qellëtam chaskiyänëki:+ apayämunqan impuestuta, pagakuyänampaq cada nuna änikunqan impuestuta+ y voluntäninkunapita Jehovä Diospaq apayämunqan qellëta.+
5 Kikikikunam tsë apayämunqan qellëta chaskiyänëki y tsëwanmi Teyta Diospa templunta altsatsiyänëki”.+
6 Jehoas veintitres watapana gobernëkaptimpis, sacerdötikunaqa manam Teyta Diospa templunta altsatsishqaraqtsu kayarqan.+
7 Tsëmi gobernanti Jehoasqa sacerdöti Jehoiadäta+ y wakin sacerdötikunata qayëkatsir kënö nirqan: “¿Imanirtan Teyta Diospa templunta altsatsiyankitsu? Mana altsatsiyänëki kaptinqa, apayämunqan qellëta ama chaskiyënatsu”.+
8 Tsëmi sacerdötikunaqa qellëta chaskiyarqannatsu y templutapis gobernanti altsatsinampaqnam dejariyarqan.
9 Tsënam sacerdöti Jehoiadäqa qellëta winayänampaq Jehoväpa templumpa derëcha lädunman juk cäjata churarqan.+ Y Teyta Jehoväpa templumpa punkunchö trabajaq sacerdötikunam chaskiyanqan qellëtaqa tsë cäjaman llapanta winayaq.+
10 Y cäjaman qellë juntaqnöna kaptinqa, gobernantipa secretariunwan mandakoq sacerdötim Jehoväpa templumpita qellëta yuparir apayaq.+
11 Tsë qellëtanam Teyta Jehoväpa templunta altsatseq nunakunata entregayaq. Pëkunanam pagayaq Jehoväpa templunta altsar trabajaqkunata,+ carpintërukunata,
12 albañilkunata y rumi llaqllaqkunata. Tsë qellëwanmi Teyta Jehoväpa templunta altsayänampaq qerukunata y llaqllashqa rumikunata rantiyaq. Y tsë qellëllam wakin gastukunapaqpis karqan.
13 Tsënö kaptimpis Jehovä Diospa templunman apayanqan qellëwanqa, manam ruratsiyarqantsu pläta metalpita matikunata, chiwchi upitsinakunata, tazonkunata, trompëtakunata+ ni Jehovä Diospa templunchö kanampaq örupita ni pläta metalpita cösaskunatapis.+
14 Jehovä Diospa templunta altsatseqkunatam tsë qellëtaqa entregayaq, tsëwanmi templuta altsatsiyaq.
15 Trabajaqkunata pagaq nunakunataqa, confiakuypaq kayaptinmi+ katsiyanqan qellëpita cuentata mañayaqtsu.
16 Peru culpayoq kayanqëkipita y jutsata* rurayanqampita+ Jehoväpa templunman apayanqan qellëtaqa, manam templuta altsatseqkunata entregayaqtsu, tsë qellëtaqa sacerdötikunatam entregayaq.+
17 Siria nacionpa gobernantin Hazaelmi+ guërrachö Gat+ nunakunata vencirqan. Tsëpitanam Jerusalen markata atacanampaqpis ëwarqan.+
18 Tsënam Judäpa gobernantin Jehoasqa, Judäpa unë gobernantinkuna Jehosafat, Jehoram y Ocozïas churayanqan y kikin churanqan qarëkunata juntarqan. Tsënöllam Teyta Jehoväpa templunchö y palaciuchö churaraq öruta juntarqan. Tsëtam Siria nacionpa gobernantin+ Hazaelpaq apatsirqan. Tsëmi Hazaelqa Jerusalen markapita kutikurqan.
19 Gobernanti Jehoas ruranqankunapitaqa Judächö gobernaqkunapaq willakoq librum masllata willakun.
20 Jehoastaqa soldädunkunallam contran churakar+ Bet-Milöchö*+ wanutsiyarqan. Tsëqa karqan Siläman ëwaq nänichömi.
21 Simeatpa tsurin Jozacar y Somerpa tsurin Jehozabadmi atacar wanutsiyarqan.+ Unë kastankuna pamparanqan David Markamanmi pampayarqan. Tsëpitanam Amasïas jutiyoq tsurinna gobernar qallëkurqan.+
Nötakuna
^ Kënöpis niyanmi: pecäduta.
^ O “Montïculuchö”. Rikäri “Bibliachö palabrakunata entiendinapaq” neqta.
