2 Rëyes 14:1-29
14 Ishkë watapa Jehoacazpa tsurin Jehoas+ Israelchö gobernëkaptinmi, Jehoaspa tsurin Amasïas Judächö gobernar qallëkurqan.
2 Veinticincu watayoq këkarmi gobernar qallarqan y Jerusalen markachömi veintinuëvi watapa mandakurqan. Mamäninqa Jerusalen markapita Jehoadin jutiyoq warmim karqan.+
3 Unë kastan Davidnö mana rurarpis,+ Amasïasqa Jehovä Diosta cäsukurmi allikunata rurarqan. Papänin Jehoas ruranqannöllam rurarqan.+
4 Peru sagrädu altu sitiukunataqa+ manam ushakätsirqantsu. Tsë sagrädu altu sitiukunachömi nunakunaqa animalkunata pishtëkur y qarëkunatapis rupatsir santunkunapaq qoyätsiyaq o qoshnïtsiyaq.+
5 Poderninchö llapankuna tikrariptinnam, Amasïasqa papäninta wanutseq sirweqninkunata wanutsirqan.+
6 Tsënö kaptimpis tsë wanutseqkunapa tsurinkunataqa manam wanutsirqantsu. Moises qellqanqan Jehovä Diospa Leyninchömi kënö mandakoq: “Manam papäkunataqa wamrankuna jutsata* rurayanqampita wanutsiyänantsu, ni wamrakunatapis papäninkuna jutsata rurayanqampita wanutsiyänantsu. Jutsata ruraqqa kikinmi wanunan”.+ Tsënö niptinmi wanutsirqantsu.
7 Amasïasqa Kachi pampa+ niyanqanchömi diez mil edomïta+ soldädukunata wanutsirqan.+ Y Sëla markata duëñutukurmi, Jocteel nirnin jutin churarqan, y tsënömi kananyaqpis reqiyan.
8 Tsëpitanam Amasïasqa Jehoacazpa tsurin y Jehüpa willkan Jehoasman kënö niyänampaq willakoqkunata mandarqan: “Rasumpa puëdirqa soldäduykikunata pusharkurshi Amasïaswan pelyayänëkipaq ëwanki”.+
9 Tsënam Israelpa gobernantin Jehoasqa, Judäpa gobernantin Amasïasta kënö niyänampaq mandakurqan: “Amasïasta kënö niyë: ‘Lïbanuchö cedru qerum kashata nirqan: “Tsurïwan warmi tsurikita casatsishun”. Tsënö nikaptinmi kashataqa, juk chukaru animal ëwarnin jarur ushakäratsirqan’.
10 ¿Edomïta soldädukunata vencishqa karku+ alläpa alabakunki? Tsënö alabakurpis palaciu wayikillachö quedakuy, ama pelyaq shamuytsu. Pelyaq shamuptikiqa qamta y Judä nunakunatapis ushakätsiyashqëkim”.
11 Tsënö nikaptimpis, Amasïasqa manam cäsurqantsu.+
Tsëmi Israelpa gobernantin Jehoasqa pelyayänampaq soldädunkunawan ëwarqan. Y Judächö+ këkaq Bet-Sëmes+ markachömi gobernanti Amasïaswan y soldädunkunawan pelyayarqan.
12 Peru Judä soldädukunatam israelïta soldädukuna venciyarqan, tsëmi mantsakar wayinkunata kutikuyarqan.
13 Tsënam Israelpa gobernantin Jehoasqa, Judäpa gobernantin Amasïasta Bet-Sëmes markachö prësurqan. Amasïaspa papäninqa Jehoasmi karqan y Jehoaspa papäninnam Ocozïas karqan. Prësuskirnam Amasïastaqa Jerusalen markaman aparqan: Tsëchömi Efrain Punkupita+ qallëkur Esquïna Punkuyaq+ markapa murällanta juchuratsirqan.* Juchutsiyanqan perqapa largunqa cientu ochenta metrusnömi* karqan.
14 Jehoväpa templunchö y palaciu wayichö churaraq llapan öruta, pläta metalta y llapan cösaskunatam apakurqan. Tsënöllam nunakunatapis prësuskir aparqan. Tsë llapanta aparkurmi Samaria markata kutikurqan.
15 Gobernanti Jehoas ruranqankunapita, puëdeq kanqampita y Judäpa gobernantin Amasïaswan pelyanqampitaqa Israelchö gobernaqkunapaq willakoq librum masllata willakun.
16 Jehoas wanuriptinnam Israelpa gobernantinkuna pamparäyanqan Samaria markaman pampayarqan.+ Tsëpitanam Jeroboan*+ jutiyoq tsurinna gobernar qallëkurqan.
17 Israelpa gobernantin Jehoacazpa+ tsurin Jehoas+ wanukunqampitaqa, quinci wata masran Judäpa gobernantin Jehoaspa tsurin Amasïasqa+ kawarqan.
18 Gobernanti Amasïas ruranqankunapitaqa, Judächö gobernaqkunapaq willakoq librum masllata willakun.
19 Tiempuwannam Jerusalen markachö nunakuna Amasïaspa contran churakäyarqan,+ tsëmi Lakis markapa qeshpir ëwakurqan. Peru chikeqninkunaqa Lakis markaman ëwëkur wanutsiyänampaqmi nunakunata mandayarqan.
20 Wanuratsirnam o wañuskatsirnam cawalluman cargarkur Jerusalen markaman apayarqan, tsëchömi unë kastankuna pamparäyanqan David Markaman pampayarqan.+
21 Tsënam Judä nunakunaqa, Amasïaspa+ tsurin Azarïasta*+ gobernantinkuna kanampaq churayarqan. Azarïasqa dieciseis watayoqllaran karqan.+
22 Pëmi papänin wanukushqanchöna+ Elat markata+ altsatsirqan, tsënöpam tsë markaqa Judä nunakunapana karqan.
23 Jehoaspa tsurin Jeroboanqa+ Israelchö gobernar qallarqan, Judäpa gobernantin Jehoaspa tsurin Amasïas quinci watapana gobernëkaptinmi. Y Samaria markapitam cuarenta y ünu watapa gobernarqan.
24 Jehoaspa tsurin Jeroboanqa Jehovä Diosta mana cäsukurmi, israelïtakunata jutsata* ruratseq Nebatpa tsurin Jeroboannölla imëka mana allikunata rurarqan.+
25 Jehoaspa tsurin Jeroboanmi, Israelpa Diosnin Jehovä ninqanta Jonas willakunqannö Lebö-Hamat+ markapita qallëkur Arabä qochayaq*+ lindëruta ruratsirqan. Teyta Diospa willakoqnin Jonasqa+ Gat-Hëfer+ markapitam karqan y Amitaipa tsurinmi karqan.
26 Tsëta ruranampaqqa, israelïtakunata sufreqta rikarmi Teyta Jehovä yanaparqan.+ Israelta yanapanampaqqa manam pillapis karqantsu, ni waktsakuna ni mana puëdeqkunallapis.
27 Jehovä Diosqa israelïtakunata mana ushakätsinampaq änikushqa karmi,+ Jehoaspa+ tsurin Jeroboanwan salvarqan.
28 Gobernanti Jeroboan ruranqankunapita, puëdeq kanqampita, pelyanqampita y Damascu markatawan+ Hamat+ markata Judä nunakunata kutitsinqampitaqa, Israelchö gobernaqkunapaq willakoq librum masllata willakun.
29 Jeroboan wanuriptinnam, Israelpa gobernantinkuna pamparäyanqanman pampayarqan. Tsëpitanam tsurin Zacarïasna+ gobernar qallëkurqan.
Nötakuna
^ Kënöpis niyanmi: pecäduta.
^ Kënöpis niyanmi: laqmaratsirqan.
^ Hebreu idiömachöqa “400 cödusmi” ninmi.
^ Pëqa segundu kaq Jeroboanmi.
^ Tsë jutiqa, “Jehovämi yanapashqa” ninanmi. 2Rë 15:13; 2Cr 26:1-23; Is 6:1, y Zac 14:5 textukunachöqa Uzïas ninmi.
^ Kënöpis niyanmi: pecäduta.
^ Tsëqa Kachi qochayaq o Wanushqa qochayaq.
