2 Rëyes 15:1-38
15 Jeroboan* veintisiëti watapa Israelchö gobernëkaptinmi, Amasïaspa+ tsurin Azarïas*+ Judächö gobernar qallëkurqan.+
2 Dieciseis watayoq këkarmi gobernar qallarqan. Y Jerusalen markachömi cincuenta y dos watapa gobernarqan. Mamäninqa Jerusalenpita Jecolïas jutiyoq warmim karqan.
3 Azarïasqa papänin Amasïas+ ruranqannömi, Jehovä Diosta cäsukur allikunata rurarqan.
4 Peru manam sagrädu altu sitiukunataqa+ ushakätsiyarqantsu y nunakunaqa tsë sagrädu altu sitiukunachömi santukunapaq qarëkunata rupatsir qoyätsiyaq o qoshnïtsiyaq.+
5 Azarïastaqa Jehovä Diosmi lepra qeshyawan+ castigarqan, y tsë qeshyawanmi wanukunqanyaq qeshyarqan. Tsëmi juk wayichö täkurqan,*+ y tsurin Jotanmi+ palaciu wayita rikaq y nunakunapa problëmantapis arreglaq.+
6 Gobernanti Azarïas+ ruranqankunapitaqa, Judächö gobernaqkunapaq willakoq librum masllata willakun.
7 Azarïas wanuriptinnam, unë kastankuna pamparäyanqan David Markaman pampayarqan.+ Tsëpitanam Jotan jutiyoq tsurin gobernar qallëkurqan.
8 Azarïas+ treinta y öchu watapa Judächö gobernëkaptinmi, Jeroboanpa tsurin Zacarïas+ Israelchö gobernar qallëkurqan. Samaria markachömi joqta killapa gobernarqan.
9 Pëqa unë kastankunanömi Jehovä Diosta mana cäsukur mana allikunata rurarqan. Israelïtakunata jutsata* ruratseq Nebatpa tsurin Jeroboan ruranqan jutsatam rurarqan.+
10 Tsëpitanam Jabespa tsurin Salumqa contran churakarnin, Ibleam markachö+ wanutsirqan.+ Y wanuskatsirmi gobernar qallëkurqan.
11 Gobernanti Zacarïas ruranqankunapitaqa, Israelchö gobernaqkunapaq willakoq librum masllata willakun.
12 Tsënömi cumplikarqan Jehüta Teyta Jehovä kënö ninqan: “Tsuriki, tsurikipa tsurin, tsurikipa willkan y willkampa tsurimpis+ Israelchömi gobernayanqa”.+
13 Uzïas+ Judächö treinta y nuëvi watapa gobernëkaptinmi, Jabespa tsurin Salumqa gobernar qallëkurqan. Samaria markachömi juk killapa gobernarqan.
14 Tsëpitanam Gadïpa tsurin Menahem, Tirzä markapita+ Samariaman ëwëkur Jabespa tsurin Salumta+ wanuratsirqan. Y wanuskatsirmi gobernar qallëkurqan.
15 Gobernanti Salum ruranqankunapita y gobernantita wanutsinqampitaqa, Israelchö gobernaqkunapaq willakoq librum masllata willakun.
16 Tsënam Menahemqa Tirzä markapita ëwëkur Tifsä sitiuchö markata atacarqan. Peru punkuta mana kichapuyaptinmi punkuta ushakäratsir yëkurqan y llapan qeshyaq warmikunapa pachankunatam pishtar usharqan.
17 Azarïas treinta y nuëvi watapa Judächö gobernëkaptinmi, Gadïpa tsurin Menahem Israelchö gobernar qallëkurqan. Samaria markachömi chunka watapa gobernarqan.
18 Jehovä Diosta mana cäsukurmi, israelïtakunata jutsata* ruratseq Nebatpa tsurin Jeroboannö imëka mana allikunata wanunqan junaqyaq rurarqan.+
19 Asiria nacionpa Pul+ jutiyoq gobernantinmi Israel nacionman atacaq ëwarqan. Peru Menahemqa, gobernanti kanqanta dejëta mana munarmi treinta y cuatru mil doscientus* pläta qellëta pagarqan.+
20 Gobernanti Pulta paganampaqqa, Menahemqa Israelchö llapan rïcu nunakunatam qellëta mañarqan.+ Tsëmi cada ollqupita mediu kïlu* masta pläta qellëta Asiriapa gobernantinta entregarqan.
21 Gobernanti Menahem+ ruranqankunapitaqa Israelchö gobernaqkunapaq willakoq librum masllata willakun.
22 Menahem wanuriptinnam, Pecahïas jutiyoq tsurin gobernar qallëkurqan.
23 Azarïas cincuenta watapa Judächö gobernëkaptinmi, Menahempa tsurin Pecahïas Israelchö gobernar qallëkurqan. Samaria markapitam ishkë watapa gobernarqan.
24 Pëqa, Jehovä Diosta mana cäsukurmi, israelïtakunata jutsata* ruratseq Nebatpa tsurin Jeroboannö imëka mana allikunata rurarqan.+
25 Tsënam soldädunkunapa mandaqnin Remalïaspa tsurin Pëcah+ contran churakarnin Pecahïasta wanutsirqan. Y tsëchömi Argobwan Ariëtapis këkäyarqan.* Tsëtaqa rurarqan Samaria markachö palaciupa törrinchömi. Pëcahtaqa Galaadpita cincuenta nunakunam yanapayarqan. Pecahïasta wanuskatsirmi kikin gobernar qallëkurqan.
26 Gobernanti Pecahïas ruranqankunapitaqa Israelchö gobernaqkunapaq willakoq librum masllata willakun.
27 Azarïas cincuenta y dos watapa Judächö gobernëkaptinmi, Pëcahpa+ tsurin Remalïas Israelchö gobernar qallëkurqan. Samaria markapitam veinti watapa gobernarqan.
28 Pëqa, Jehovä Diosta mana cäsukurmi, israelïtakunata jutsata* ruratseq Nebatpa tsurin Jeroboannö imëka mana allikunata rurarqan.+
29 Israelchö Pëcah gobernanqan witsanmi Asiria nacionpa gobernantin Tiglat-Pilëser,+ Neftalïpa+ kastankunapa markankunata atacarqan: Ijon, Abel-Bet-Maacä,+ Janoah, Quedes,+ Hazor, Galaad+ y Galilëa markakunatam atacarqan. Y tsëchö täkoq* nunakunatam Asiria nacionman prësu aparqan.+
30 Tsëpitanam Eläpa tsurin Hosëa,+ Remalïaspa tsurin Pëcahpa contran churakar wanuratsirqan y kikinmi gobernar qallëkurqan. Tsëqa karqan Uzïaspa tsurin Jotan+ gobernaq yëkunqampita veinti watanö pasarinqanchömi.
31 Gobernanti Pëcah ruranqankunapitaqa Israelchö gobernaqkunapaq willakoq librum masllata willakun.
32 Remalïaspa tsurin Pëcah ishkë watapa Israelchö gobernëkaptinmi, Uzïaspa+ tsurin Jotan+ Judächö gobernar qallëkurqan.
33 Veinticincu watayoq këkarmi gobernar qallarqan. Jerusalen markachömi dieciseis watapa gobernarqan. Mamäninqa Sadocpa+ tsurin Jerusä jutiyoq warmim karqan.
34 Jotanqa papänin Uzïas+ ruranqannömi, Jehovä Diosta cäsukur allikunata rurarqan.
35 Peru manam sagrädu altu sitiukunataqa ushakätsiyarqantsu y nunakunaqa tsë sagrädu altu sitiukunachömi santukunapaq qarëkunata rupatsir qoyätsiyaq o qoshnïtsiyaq.+ Jotanmi, Jehoväpa templunchö Altu kaq Punkuta ruratsirqan.+
36 Gobernanti Jotan ruranqankunapitaqa Judächö gobernaqkunapaq willakoq librum masllata willakun.
37 Jotan gobernanqan witsanmi, Jehovä Dios permitirqan Siria nacionpa gobernantin Rezin y Israelpa gobernantin Remalïaspa tsurin Pëcah,+ Judächö+ täkoqkunata atacayänanta.
38 Jotan wanuriptinnam, unë kastankuna pamparäyanqan David Markaman pampayarqan. Tsëpitanam Acaz jutiyoq tsurin gobernar qallëkurqan.
Nötakuna
^ Pëqa segundu kaq Jeroboanmi.
^ Tsë jutiqa, “Jehovämi yanapashqa” ninanmi. 2Rë 15:13; 2Cr 26:1-23; Is 6:1, y Zac 14:5 textukunachöqa Uzïas ninmi.
^ Kënöpis niyanmi: tärarqan; pärarqan.
^ Kënöpis niyanmi: pecäduta.
^ Kënöpis niyanmi: pecäduta.
^ Hebreu idiömachöqa “1.000 talentus” ninmi. 1 talentuqa 34, 2 kïlusmi karqan. Rikäri “Masllata musyanapaq” neqchö B14 kaqta.
^ Hebreu idiömachöqa “50 sïclusta” ninmi. 1 sïcluqa 11,4 grämusmi. Rikäri “Masllata musyanapaq” neqchö B14 kaqta.
^ Kënöpis niyanmi: pecäduta.
^ Capazchi, Remalïaspa tsurin Pëcahtaqa tsë ishkan nunakuna yanapayarqan.
^ Kënöpis niyanmi: pecäduta.
^ Kënöpis niyanmi: täraq; päraq.
