2 Rëyes 17:1-41
17 Acaz döci watapa Judächö gobernëkaptinmi, Eläpa tsurin Hosëa+ Israelchö gobernar qallëkurqan. Samaria markapitam isqun watapa gobernarqan.
2 Pëqa, Jehovä Diosta mana cäsukurmi mana allikunata rurarqan, tsënö karpis manam Israelchö punta gobernantikunanötsu jutsataqa* alläpa rurarqan.
3 Asiria nacionpa gobernantin Salmanasar soldädunkunawan atacaptinmi,+ Hosëaqa sirweqnin tikrarir impuestuta pagar qallëkurqan.+
4 Tsënö kaptimpis Hosëaqa Egiptuchö+ So jutiyoq gobernantiwan willanakurmi contran churakarqan y impuestutapis manam pagarqannatsu. Tsëta musyëkurmi Asiriapa gobernantinqa Hosëata carcelatsirqan, y tsëchömi alli watarkur dejëkuyarqan.
5 Tsëpitanam Asiriapa gobernantinqa Israelchö llapan markakunata atacarqan, y Samaria markachönam soldädunkuna entëru lädumpa churanakurir kima watapa kayarqan.
6 Hosëa isqun watapa gobernëkaptinmi, Samaria markaman yëkurir+ llapan israelïtakunata prësu apakuyarqan.+ Asiria nacionman chäratsirnam Halä sitiuchö y Habor markachö kawakuyänampaq churayarqan. Tsë sitiuwan markaqa këkarqan medu nunakuna+ kawakuyanqan Gozan mayu* kuchunchömi.+
7 Tsënöqa israelïtakunata pasarqan Jehovä Diosta mana cäsukur jutsata* rurayanqampitam. Pëkunatam Egiptuchö gobernaqpa+ poderninchö këkaqta Teyta Dios libramurqan. Tsënö librëkaptimpis pëkunaqa santukunatam adorayarqan,+
8 y Jehovä Dios qarqunqan cananeu nunakunapa costumbrinkunata y Israelchö punta gobernaqkunapa costumbrinkunatam rurayarqan.
9 Tsënöllam israelïtakunaqa Jehovä Diosta mana cäsukur törriyoq markakunachö, alli murallashqa markakunachö y wakin markakunachöpis adorayänampaq sagrädu altu sitiukunata rurayarqan.+
10 Jirkakunachö y atska rämayoq jatun montikuna o jatun qerukuna+ chakinchömi, Aserä santupa postinkunata*+ y sagrädu columnakunata rurayarqan.
11 Y tsë sagrädu altu sitiukunachömi, Jehovä Dios qarqunqan+ unë nunakunanö santukunapaq qarëkunata rupatsir qoyätsiyaq o qoshnïtsiyaq. Tsëkunata rurarmi Jehovä Diosta cöleratsiyarqan.
12 Santukunata mana adorayänampaq Jehovä Dios mandëkaptinmi,+ pëkunaqa melanëpaq* santukunata adorayarqan.+
13 Jehovä Diosqa israelïtakunata y Judä nunakunatam willakoqninkunawan y suëñuyanqanta musyatsikoq nunakunawan+ kutin kutin kënö nirqan: “¡Jutsa* rurëta dejarir alli kaqtana rurayë!+ Willakoqnïkunawan unë kastëkikunata entreganqä mandakunqäkunata, ninqäkunata y leynïta cäsukuyë”.
14 Tsënö nikaptimpis pëkunaqa, Jehovä Diosman mana markäkoq o yärakoq unë kastankunanömi,+ chukru shonqu tikrakurir cäsukuyarqantsu.
15 Tsënö rurarmi Teyta Dios mandakunqankunata,+ unë kastankunawan ruranqan acuerduta y yarpätsinqankunata mana kaqpaq churayarqan.+ Mana väleq santukunata+ adorarmi upa cuenta tikrayarqan.+ Tsëmi wakin nacion nunakuna rurayanqanta mana qatiyänampaq Jehovä Dios nikaptimpis, pëkunanö jutsata* rurar kakuyarqan.+
16 Jehovä Dios mandakunqanta mana cäsukurmi, metalpita ishkë becërrukunata+ y Aserä santupa postinta* rurayarqan adorayänampaq.+ Tsënöllam Baal santuta,+ ciëluchö këkaq estrëllakunata, killata y intitapis o rupaytapis adorayarqan.+
17 Y santukunata adorarmi wamrankunata ollquta warmitapis altarkunachö rupatsiyarqan.+ Tsënöllam suertita qatiyarqan+ y suertita qateqkunamampis qatitsikoq ëwayarqan. Imëka mana allikunata rurarmi Jehovä Diosta cöleratsiyarqan.
18 Tsëmi Jehovä Diosqa israelïtakunawan alläpa cölerakurqan y rikëtapis mana munarmi llapanta qarqurqan.+ Judä nunakunallanam quedayarqan.
19 Judä nunakunapis, israelïtakunanöllam Jehovä Diosta+ mana cäsukur imëka jutsata* rurayarqan.+
20 Tsëmi Jehovä Diosqa Israelpa llapan kastankunata rikëtapis mana munar dejarirqan. Y sufriyänampaqmi juk nacion soldädukunapa poderninman churarqan.
21 Davidpa familiampa mandädunchö kayänanta mana munarmi Teyta Diosqa israelïtakunata rakirirqan. Tsëmi israelïtakunaqa Nebatpa+ tsurin Jeroboanta gobernantinkuna kanampaq churayarqan. Peru Jeroboanqa Jehovä Diosta mana cäsukurmi israelïtakunata imëka jutsata* ruratsirqan.
22 Tsëmi israelïtakunaqa, Jeroboan+ ruranqannölla imëka jutsata* rurayarqan, awmi, imëka jutsatam rurayarqan
23 Tsënö këkäyaptinmi Jehovä Diosqa, willakoqninkunawan willatsinqannölla,+ rikëtapis mana munar markankunapita qarqurqan. Tsëmi Asiria nacionpita soldädukuna israelïtakunata prësu apakuyarqan.+ Tsënöpam israelïtakunaqa Asiria nacionchö kananyaqpis këkäyan.
24 Tsëpitanam Asiria nacionpa gobernantinqa, Babilonia, Avä Hamat, Sefarvaim+ markakunapita y Cutä sitiupita nunakunata mandarqan Samariachö y wakin markachö täkuyänampaq.*
25 Tsëchö karnimpis Jehovä Diostaqa manam adorayarqantsu. Tsëmi Jehoväqa leonkunata mandarqan,+ leonkunaqa wakin nunakunatam wanutsirqan.
26 Tsënam Asiria nacionpa gobernantinman willakoqkunata mandayarqan kënö niyänampaq: “Samaria markakunachö täkuyänampaq* mandanqëki nunakunaqa manam musyayantsu tsë nacion nunakunapa Diosninta imanö adorayänampaq kaqta. Tsëmi leonkunaqa nunakunata wanuykätsin Diosninkuna mandamushqa kaptin”.
27 Tsënö willayaptinmi Asiria nacionpa gobernantinqa nirqan: “Prësu apamunqantsik sacerdötikunapita jukta kutitsiyë, tsë nacionpa Diosninta imanö adorayänampaq kaqta tsëchö täkoqkunata* yachatsinampaq”
28 Tsënö mandakuptinmi Samariapita prësu apayanqan sacerdötita Betel+ markaman apayarqan. Pëmi Jehovä Diosta imanö adorayänampaq kaqta yachatsirqan.+
29 Tsënö yachëkätsiptimpis, tsë nunakunaqa markankunachö adorayanqan santukunata rurëkurmi, Samaria nunakuna rurayanqan altu sitiukunaman churayarqan.
30 Babiloniapita ëwaq nunakunam adorayänampaq, Sucot-Benot santuta ruratsiyarqan; Cut sitiupita ëwaq nunakunam Nergal santuta ruratsiyarqan; Hamat markapita+ ëwaq nunakunam Asimä santuta ruratsiyarqan,
31 y aveu nunakunanam Nibhaz y Tartac santukunata ruratsiyarqan. Sefarvaim+ markapita ëwaq nunakunanam Adramëlec y Anamëlec santunkunata adorarnin wamrankunata rupatsiyaq.
32 Teyta Jehoväta adorëkarpis, sagrädu altu sitiukunachö+ sacerdöti kayänampaqmi nunakunata churayarqan. Pëkunam templukunachö trabajayaq.
33 Tsënömi pëkunaqa Jehoväta adorëkarpis, markankunachö adorayanqan santukunata adorar kakuyarqan.+
34 Tsë nunakunaqa tsënöllam kananyaqpis santunkunata adorar këkäyan. Manam mëqampis Jehovä Diostaqa adorayantsu. Ni manam mandakunqankunata ni ninqankunata cumpliyantsu. Jacobpa kastankunaqa manam Jehovä Dios mandanqan Leytapis cumpliyantsu. Jacobtaqa Teyta Diosmi Israel nirna jutin churarqan.+
35 Jehovä Diosqa israelïtakunatam+ kënö mandarqan:* “Ama santukunata adorayankitsu, ni sirwiyänëkipaq animalkunata pishtëkur rupatsiyankitsu.+
36 Tsëpa rantinqa, noqa Jehovällatam adorayämänëki+ y sirwiyämänëki. Y noqallapaqmi animalkunata pishtëkurpis rupatsiyanëki. Noqam puëdeq karnin Egiptupita qamkunata pushamurqä.*+
37 Y llapan mandakunqäkunata, ninqäkunata y Leynïtam cumpliyänëki, y manam santukunataqa adorayänëkitsu.+
38 Ruranqantsik acuerduta+ ama qonqayankitsu, y santukunataqa ama adorayankitsu.
39 Tsëpa rantinqa noqa Jehovä Diosta adorayämanki. Noqam llapan chikiyäshoqnikikunapita salvayashqëki”.
40 Tsënö nikaptimpis Samaria markaman täkoq* ëwashqa nunakunaqa, markankunachönömi santunkunata adorar* kakuyarqan.+
41 Y Jehovä Diosta adorëkarpis,+ santunkunatam adorayarqan. Tsënöllam pëkunapa kastankunapis kananyaq rurëkäyan.
Nötakuna
^ Kënöpis niyanmi: pecädutaqa.
^ Kënöpis niyanmi: riu.
^ Kënöpis niyanmi: pecäduta.
^ Rikäri “Bibliachö palabrakunata entiendinapaq” neqchö “sagrädu posti” neqta.
^ Hebreu idiömachö kë palabraqa, capazchi “ismani” ninannö. Tsënöqa despreciarmi niyan.
^ Kënöpis niyanmi: Pecädu.
^ Kënöpis niyanmi: pecäduta.
^ Rikäri “Bibliachö palabrakunata entiendinapaq” neqchö “sagrädu posti” neqta.
^ Kënöpis niyanmi: pecäduta.
^ Kënöpis niyanmi: pecäduta.
^ Kënöpis niyanmi: pecäduta.
^ Kënöpis niyanmi: täräyänampaq; pärayänampaq.
^ Kënöpis niyanmi: täräyänampaq; pärayänampaq.
^ Kënöpis niyanmi: täraqkunata; päraqkunata.
^ O “acuerduta rurar mandarqan”.
^ Kënöpis niyanmi: pushayämurqaq.
^ Kënöpis niyanmi: täraq; päraq.
^ O “unë costumbrinkunata rurar”.
